ଲକ୍ଷ୍ନୌ ଏବଂ ଦିଲ୍ଲୀରେ ଉଚ୍ଚସ୍ତରୀୟ ବୈଠକ, ବଦଳିବେ କି ୟୁପିର ମୁଖ୍ୟମନ୍ତ୍ରୀ?

ନୂଆଦିଲ୍ଲୀ: ଉତ୍ତରପ୍ରଦେଶରେ ରାଜନୈତିକ ହଟଚମଟ । ଲକ୍ଷ୍ନୌରୁ ଦିଲ୍ଲୀ ପର୍ଯ୍ୟନ୍ତ ବୈଠକ ପରେ ବୈଠକ ଚାଲିଛି। ଲୋକସଭା ନିର୍ବାଚନରେ ଭାରତୀୟ ଜନତା ପାର୍ଟି (ବିଜେପି)ର ଖରାପ ପ୍ରଦର୍ଶନ ଯୋଗୁଁ ରାଜ୍ୟରେ ଦଳ ଅନେକ ପରିବର୍ତ୍ତନ କରିପାରେ ବୋଲି ଚର୍ଚ୍ଚା ହେଉଛି। ରାଜ୍ୟ କାର୍ଯ୍ୟକାରିଣୀ ବୈଠକ ପରେ ରାଜ୍ୟରେ ରାଜନୈତିକ ହଟଚମଟ ସୃଷ୍ଟି ହୋଇଛି। ବୁଧବାର ପ୍ରଧାନମନ୍ତ୍ରୀ ମୋଦୀ ଓ ଅମିତ ଶାହାଙ୍କ ମଧ୍ୟରେ ଭେଟ ହୋଇଥିଲା । ଏହା ପୂର୍ବରୁ ଉତ୍ତରପ୍ରଦେଶ ବିଜେପି ସଭାପତି ଭୁପେନ୍ଦ୍ର ଚୌଧୁରୀ ପ୍ରଧାନମନ୍ତ୍ରୀ ମୋଦୀଙ୍କୁ ଭେଟିଥିଲେ।

ଉତ୍ତରପ୍ରଦେଶ ଉପମୁଖ୍ୟମନ୍ତ୍ରୀ କେଶବ ପ୍ରସାଦ ମୌର୍ଯ୍ୟ ବୁଧବାର ପୁଣି ଥରେ କହିଛନ୍ତି ଯେ ସଂଗଠନ ସରକାରଙ୍କ ଠାରୁ ବଡ଼ ଏବଂ ସେ କର୍ମୀଙ୍କ ଯନ୍ତ୍ରଣାକୁ ଜଣେ କର୍ମୀ ଭାବରେ ନିଜର ବୋଲି ଭାବନ୍ତି। ରବିବାର ବିଜେପି କାର୍ଯ୍ୟକାରିଣୀ ବୈଠକରେ ମଧ୍ୟ ମୌର୍ଯ୍ୟ ଏହା କହିଥିଲେ।

ଉପମୁଖ୍ୟମନ୍ତ୍ରୀ କେଶବ ପ୍ରସାଦ ମୌର୍ଯ୍ୟ ମଧ୍ୟ ମଙ୍ଗଳବାର ଦଳର ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡ୍ଡାଙ୍କୁ ଭେଟିଛନ୍ତି। ଏହି ସବୁ ବୈଠକ ମଧ୍ୟରେ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ବୁଧବାର ରାଜ୍ୟପାଳଙ୍କ ନିକଟରେ ପହଞ୍ଚିଥିଲେ। ବିରୋଧୀ ଦଳ ସମାଜବାଦୀ ପାର୍ଟି ମଧ୍ୟ ସମଗ୍ର ଘଟଣା ଉପରେ ତୀକ୍ଷ୍ଣ ନଜର ରଖିଛି।

ଉପମୁଖ୍ୟମନ୍ତ୍ରୀ ମୌର୍ଯ୍ୟ ଏବଂ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କ ମଧ୍ୟରେ ବିବାଦ ଥିବା କୁହାଯାଉଛି। ଯାହା ନୂଆଦିଲ୍ଲୀରେ ଦଳର ଅଧ୍ୟକ୍ଷ ଜେପି ନଡ୍ଡାଙ୍କ ସହ ଉପମୁଖ୍ୟମନ୍ତ୍ରୀଙ୍କ ସାକ୍ଷାତର ଗୋଟିଏ ଦିନ ପରେ ଚର୍ଚ୍ଚାକୁ ଆସିଛି।

ରାଜ୍ୟପାଳ ଓ ମୁଖ୍ୟମନ୍ତ୍ରୀଙ୍କ ମଧ୍ୟରେ ସାକ୍ଷାତ ଏକ ନିୟମିତ ଘଟଣା। ବିଶେଷ କରି ବିଧାନସଭା ଅଧିବେଶନ ଓ ଅନ୍ୟାନ୍ୟ ପ୍ରସଙ୍ଗରେ ବୈଠକ ଅନୁଷ୍ଠିତ ହୋଇଥାଏ। ତେବେ ରାଜ୍ୟରେ ଦ୍ରୁତ ଗତିରେ ବଦଳୁଥିବା ରାଜନୈତିକ ଗତିବିଧି ମଧ୍ୟରେ ରାଜ୍ୟପାଳ ଆନନ୍ଦୀବେନ ପଟେଲଙ୍କ ସହ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କ ସାକ୍ଷାତକୁ ନେଇ କଳ୍ପନାଜଳ୍ପନା ଜୋର ଧରିଛି। ଆନନ୍ଦୀବେନ ପଟେଲ ଦୀର୍ଘ ଦିନ ଧରି ଉତ୍ତରପ୍ରଦେଶର ରାଜ୍ୟପାଳ ଥିବା ବେଳେ ଗୁଜରାଟର ମୁଖ୍ୟମନ୍ତ୍ରୀ ମଧ୍ୟ ରହିଛନ୍ତି । ତାଙ୍କ ଉପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଭରସା ରହିଛି। ଏଭଳି ସ୍ଥିତିରେ ଦିଲ୍ଲୀରେ ଅମିତ ଶାହା ଓ ପ୍ରଧାନମନ୍ତ୍ରୀ ମୋଦୀଙ୍କ ମଧ୍ୟରେ ଏବଂ ଲକ୍ଷ୍ନୈାରେ ମୁଖ୍ୟମନ୍ତ୍ରୀ ଯୋଗୀ ଓ ଆନନ୍ଦୀବେନ ପଟେଲଙ୍କ ସାକ୍ଷାତ ପରେ ରାଜନୈତିକ ହଟଚମଟ ବଢ଼ିଛି।

ଉତ୍ତରପ୍ରଦେଶରେ ଦଳର ଖରାପ ପ୍ରଦର୍ଶନ ପରେ ସଂଗଠନ ଓ ସରକାରଙ୍କ ମଧ୍ୟରେ ମୁହାଁମୁହିଁ ପରିସ୍ଥିତି ସୃଷ୍ଟି ହୋଇଛି ବୋଲି ଚର୍ଚ୍ଚା ହେଉଛି। ଅନେକ ସମୟରେ ନେତାମାନେ ଏହାକୁ ସାର୍ବଜନୀନ ଭାବେ ଉଲ୍ଲେଖ କରିଛନ୍ତି। ଉପମୁଖ୍ୟମନ୍ତ୍ରୀ କେଶବ ପ୍ରସାଦ ମୌର୍ଯ୍ୟ ସଂଗଠନ ଓ ସରକାରଙ୍କୁ ନେଇ ବୟାନ ଦେଇଛନ୍ତି। ତେବେ ରାଜ୍ୟମନ୍ତ୍ରୀ ବିଏଲ ବର୍ମା କୌଣସି ପ୍ରକାର ବିବାଦ ଖବରକୁ ଖଣ୍ଡନ କରିଛନ୍ତି।

ବିଏଲ ବର୍ମା କହିଛନ୍ତି, ସରକାର ମଧ୍ୟ ଆମର ଏବଂ ସେଥିପାଇଁ ଆମେ ପରସ୍ପରର ପରିପୂରକ। ସଂଗଠନର ନିଜର ସ୍ଥାନ ଅଛି ଏବଂ ସରକାରଙ୍କର ସ୍ଥାନ ଅଛି । ମୁଁ ମଧ୍ୟ ଜଣେ କର୍ମୀ ଏବଂ କର୍ମୀକୁ ସମ୍ମାନ କରେ । ବିଜେପି ଏକ କ୍ୟାଡର ଭିତ୍ତିକ ଦଳ, ଆମେ ସମସ୍ତେ କର୍ମୀଙ୍କୁ ସମ୍ମାନ କରୁ । ସଂଗଠନ ଓ ସରକାର ମିଳିତ ଭାବେ ଆଗକୁ ବଢ଼ୁଛନ୍ତି ବୋଲି ସେ କହିଛନ୍ତି। ସଂଗଠନର କାର୍ଯ୍ୟ ସଂଗଠନ ଦ୍ୱାରା ହୋଇଥାଏ ଏବଂ ସରକାରଙ୍କ କାର୍ଯ୍ୟ ସରକାର କରନ୍ତି ।

ଉତ୍ତର ପ୍ରଦେଶରେ ହେବାକୁ ଥିବା ଉପନିର୍ବାଚନରେ ବିଜେପି ଯେକୌଣସି ପରିସ୍ଥିତିରେ ଭଲ ପ୍ରଦର୍ଶନ କରିବାକୁ ଚାହୁଁଛି। ଏହି ଉପନିର୍ବାଚନ ପୂର୍ବରୁ ଦଳ ସବୁ ପ୍ରକାର ଆଭ୍ୟନ୍ତରୀଣ ମତଭେଦ ଦୂର କରିବା ମୁଡରେ ରହିଛି।

୨୦୨୭ରେ ଉତ୍ତରପ୍ରଦେଶରେ ବିଧାନସଭା ନିର୍ବାଚନ ହେବ। ବିଧାନସଭା ନିର୍ବାଚନକୁ ଆଉ ଦୁଇ ବର୍ଷରୁ ଅଧିକ ସମୟ ବାକି ଅଛି। ବିଜେପି ପାଇଁ ୟୁପି ସବୁବେଳେ ଗୁରୁତ୍ୱପୂର୍ଣ୍ଣ ରହି ଆସିଛି । ୟୁପିରେ ଯେତେବେଳେ ବି ବିଜେପି ଶକ୍ତିଶାଳୀ ହୋଇଛି। ଏହା କେନ୍ଦ୍ରର କ୍ଷମତାରେ ପହଞ୍ଚିଛି। ରାମ ମନ୍ଦିର ଆନ୍ଦୋଳନ ସମୟରେ ବିଜେପି ୧୯୯୬, ୧୯୯୮ ଓ ୧୯୯୯ ଲୋକସଭା ନିର୍ବାଚନରେ ପାଖାପାଖି ୫୦ଟି ଆସନରେ ବିଜୟୀ ହୋଇଥିଲା।

ସେହି ସମୟରେ କେନ୍ଦ୍ରରେ ସରକାର ଗଢ଼ିବାରେ ୟୁପିର ପ୍ରମୁଖ ଅବଦାନ ରହିଥିଲା। ୨୦୧୪ ଓ ୨୦୧୯ ନିର୍ବାଚନରେ ମଧ୍ୟ ବିଜେପି ୬୦ଟି ଆସନ ରେ ବିଜୟୀ ହୋଇ କେନ୍ଦ୍ରରେ ସଂଖ୍ୟାଗରିଷ୍ଠ ତା’ର ସରକାର ଗଢ଼ିଥିଲା। ଯଦିଓ ଏହି ନିର୍ବାଚନରେ ବିଜେପିକୁ କ୍ଷତି ସହିବାକୁ ପଡିଛି, କିନ୍ତୁ ଏହି ପରିସ୍ଥିତିରେ ମଧ୍ୟ ଉତ୍ତର ପ୍ରଦେଶରୁ ସର୍ବାଧିକ ସଂଖ୍ୟକ ବିଜେପି ସାଂସଦ ଜିତିଛନ୍ତି । ଏଭଳି ସ୍ଥିତିରେ ଦଳ ଏହି ରାଜ୍ୟରେ କୌଣସି ସ୍ତରରେ ନିଜର ସ୍ଥିତିକୁ ଦୁର୍ବଳ କରିବାକୁ ଚାହିଁବ ନାହିଁ। ୨୦୦୯ ଲୋକସଭା ନିର୍ବାଚନ ଏବଂ ୨୦୧୨ ବିଧାନସଭା ନିର୍ବାଚନରେ ନୈରାଶ୍ୟଜନକ ପ୍ରଦର୍ଶନ ପରେ ବିଜେପି ୟୁପିକୁ ଚମତ୍କାର ପ୍ରତ୍ୟାବର୍ତ୍ତନ କରିଛି।