ବାଂଲାଦେଶରେ ହିନ୍ଦୁ ବ୍ୟବସାୟୀଙ୍କୁ ମାରଣାନ୍ତକ ଆକ୍ରମଣ, ଜୀବନ ପାଇଁ ସଂଘର୍ଷ କରୁଛନ୍ତି ଖୋକନ ଦାସ

ଢାକା: ବାଂଲାଦେଶରେ ସଂଖ୍ୟାଲଘୁ ହିନ୍ଦୁଙ୍କ ଉପରେ ବଢ଼ୁଥିବା ଆକ୍ରମଣ ମଧ୍ୟରେ ଆଉ ଏକ ହୃଦୟ ବିଦାରକ ଘଟଣା ସାମ୍ନାକୁ ଆସିଛି। ରାଜଧାନୀ ଢାକା ଠାରୁ ପ୍ରାୟ ୧୫୦କିଲୋମିଟର ଦୂରରେ ଏକ ଗାଁରେ ହିନ୍ଦୁ ବ୍ୟବସାୟୀ ଖୋକନ ଚନ୍ଦ୍ର ଦାସଙ୍କୁ ଧାରୁଆ ଅସ୍ତ୍ରରେ ଆକ୍ରମଣ କରାଯାଇଛି ଏବଂ ତାଙ୍କୁ ଜୀବନ୍ତ ଜାଳି ଦେବାକୁ ଚେଷ୍ଟା କରାଯାଇଛି। ଆକ୍ରମଣରେ ଗୁରୁତର ଭାବରେ ଦଗ୍ଧ ଖୋକନ ଦାସ ହସ୍ପିଟାଲରେ ଜୀବନ ପାଇଁ ସଂଘର୍ଷ କରୁଛନ୍ତି।

ତାଙ୍କ ପତ୍ନୀ ସୀମା ଦାସ କହିଛନ୍ତି ଯେ ତାଙ୍କ ସ୍ୱାମୀଙ୍କୁ ଏତେ ନିର୍ମମ ଭାବରେ କାହିଁକି ଟାର୍ଗେଟ କରାଯାଇଥିଲା ତାହା ସେ ଏପର୍ଯ୍ୟନ୍ତ ବୁଝିପାରୁ ନାହାଁନ୍ତି। ସୀମା କହିଛନ୍ତି, ଆମର କୌଣସି ପ୍ରସଙ୍ଗରେ କାହା ସହିତ ଝଗଡା ହୋଇନାହିଁ। ମୁଁ ବୁଝିପାରୁନାହିଁ ଯେ ମୋ ସ୍ୱାମୀଙ୍କୁ ହଠାତ୍ କାହିଁକି ଟାର୍ଗେଟ କରାଯାଇଥିଲା। ଖୋକନ ଦାସ ଘରକୁ ଫେରୁଥିବା ସମୟରେ ଦୁର୍ବୃତ୍ତମାନେ ତାଙ୍କ ଉପରେ ଧାରୁଆ ଅସ୍ତ୍ରରେ ଆକ୍ରମଣ କରିଥିଲେ।

ଡିସେମ୍ବର ୧୮ ତାରିଖରେ ଦୀପୁ ଚନ୍ଦ୍ର ଦାସଙ୍କୁ ହତ୍ୟା କରାଯାଇଥିଲା। ଡିସେମ୍ବର ୨୪ ତାରିଖରେ ଅମୃତ ମଣ୍ଡଳଙ୍କୁ ପିଟିପିଟି ହତ୍ୟା କରାଯାଇଥିଲା। କିଛି ଦିନ ପୂର୍ବରୁ ବଜେନ୍ଦ୍ର ବିଶ୍ୱାସଙ୍କୁ ଗୁଳି କରି ହତ୍ୟା କରାଯାଇଥିଲା। ଏବେ ଖୋକନ ଦାସଙ୍କୁ ଟାର୍ଗେଟ କରାଯାଇଛି।