ରାଉରକେଲା: ହକି ଇଣ୍ଡିଆ ଲିଗ୍ରେ ଘରୋଇ ଦଳ ବେଦାନ୍ତ କଳିଙ୍ଗ ଲାନ୍ସର୍ସ ଦମଦାର ବିଜୟ ହାସଲ କରିଛି । ଦଳ ଅପରାଜେୟ ଶ୍ରାଚୀ ରା’ ବେଙ୍ଗଲ ଟାଇଗର୍ସକୁ ସିଧାସଳଖ ୬-୦ ଗୋଲ୍ରେ ପରାସ୍ତ କରି ଦମ୍ଦାର ବିଜୟ ଲାଭ କରିଛି । ଆଜିର ବିଜୟ ପରେ କଳିଙ୍ଗ ଲାନ୍ସର୍ସ ପଞ୍ଚମ ସ୍ଥାନକୁ ଅକ୍ତିଆର କରିଛି ।
ମଙ୍ଗଳବାର ଖେଳିଥିବା ଏହି ମ୍ୟାଚ୍ ରେ କଳିଙ୍ଗ ଲାନ୍ସର୍ସ ଆରମ୍ଭରୁ ଶେଷ ପର୍ଯ୍ୟନ୍ତ ଲାନ୍ସର୍ସ ଖେଳାଳି ବିପକ୍ଷଙ୍କ ଉପରେ ଭାରି ପଡ଼ିଥିଲେ । ଦଳର ଖେଳାଳି ପ୍ରଥମ କ୍ବାର୍ଟର୍ ରେ ହିଁ ୩ଟି ଗୋଲ୍ ଦେଇ ମ୍ୟାଚ୍ କୁ ନିଜ ନିୟନ୍ତ୍ରଣକୁ ଆଣିଥିଲା । ଦ୍ବିତୀୟ କ୍ବାର୍ଟର୍ ରେ ଲାନସର୍ସ ମଧ୍ୟ ସଂପୂର୍ଣ୍ଣ ଆଧିପତ୍ୟ ବିସ୍ତାର କରିଥିଲା । ଫଳରେ ଶକ୍ତିଶାଳୀ ବେଙ୍ଗଲ ଟାଇଗର୍ସ ଏକପ୍ରକାର ଧରାଶାୟୀ ହୋଇଯାଇଥିଲା । ବିପକ୍ଷ ଗୋଟିଏ ବି ଗୋଲ୍ ସୁଝିନପାରି ପରାଜୟର ସ୍ବାଦ ଚାଖିଛି ।
ଏହାସହ ଲାନ୍ସର୍ସ ସର୍ବାଧିକ ଗୋଲ୍ ବ୍ୟବଧାନରେ ମ୍ୟାଚ୍ ଜିତିବାର ରେକର୍ଡ ନିଜ ନାଁରେ କରିଛି । ଦଳ ପକ୍ଷରୁ ଥିଏରୀ ବ୍ରିଙ୍କ୍ମ୍ୟାନ୍ ୨ଟି ଗୋଲ୍ (୩ ଓ ୪୭) ଦେଇଥିବାବେଳେ ସଞ୍ଜୟ (୪), ଆଲେକଜାଣ୍ଡାର୍ ହେଣ୍ଡ୍ରିକ୍ସ (୬), ନିକୋଲାସ ବନ୍ଦୁରାକ୍ (୨୯), ବବି ସିଂହ ଧାମୀ (୪୯) ପ୍ରମୁଖ ଗୋଟିଏ ଲେଖାଏ ଗୋଲ୍ ଦେଇଥିଲେ ।
