ରାତିରେ ଶୋଇବାକୁ ଡେରି ହେଉଛି କି ? ଆପଣଙ୍କ ମସ୍ତିଷ୍କ ସହ ଘଟୁଛି ଏହି ଭୟଙ୍କର ପରିବର୍ତ୍ତନ, ସତ ଜାଣିଲେ ଉଡ଼ିଯିବ ହୋସ୍!
ଭୁବନେଶ୍ୱର: ଆଜିକାଲିର ବ୍ୟସ୍ତବହୁଳ ଜୀବନଶୈଳୀ ଭିତରେ ରାତି ଅନିଦ୍ରା ହେବା କିମ୍ବା ସବୁବେଳେ ମାନସିକ ଚାପରେ ରହିବା ଏକ ସାଧାରଣ କଥା ପାଲଟିଗଲାଣି। କର୍ମକ୍ଷେତ୍ରରେ ସଫଳତା ପାଇବା ପାଇଁ ହେଉ କିମ୍ବା ରାତିସାରା ମୋବାଇଲ୍ ସ୍କ୍ରିନ୍ ଆଗରେ ବସିବା ଅଭ୍ୟାସ କାରଣରୁ ଆମେ ନିଜ ନିଦ ସହ ବହୁତ ବଡ଼ ସାଲିସ୍ କରୁଛୁ। କିନ୍ତୁ ଆପଣ ଜାଣନ୍ତି କି ଆପଣଙ୍କର ଏହି ଛୋଟିଆ ଅବହେଳା ଭବିଷ୍ୟତରେ କେତେ ବଡ଼ ବିପଦ ଡାକି ଆଣୁଛି। ସ୍ୱାସ୍ଥ୍ୟ ବିଶେଷଜ୍ଞଙ୍କ ଏକ ନୂଆ ଗବେଷଣା ରିପୋର୍ଟ ସାମ୍ନାକୁ ଆସିଛି ଯାହା ଆପଣଙ୍କ ନିଦ ହଜାଇ ଦେବ।
ବିଶେଷଜ୍ଞମାନଙ୍କ ମତରେ କ୍ରମାଗତ ଭାବରେ କମ୍ ଶୋଇବା ଏବଂ ଅତ୍ୟଧିକ ମାନସିକ ଚାପ ବା କ୍ରୋନିକ୍ ଷ୍ଟ୍ରେସ୍ ନେବା ଦ୍ୱାରା ମଣିଷର ମସ୍ତିଷ୍କ ସମୟ ପୂର୍ବରୁ ବୁଢ଼ା ହୋଇଯାଉଛି। ଶୁଣିବାକୁ ଆଶ୍ଚର୍ଯ୍ୟ ଲାଗୁଥିଲେ ମଧ୍ୟ ଏହା ସମ୍ପୂର୍ଣ୍ଣ ସତ୍ୟ ପ୍ରମାଣିତ ହୋଇଛି। ଡାକ୍ତରୀ ଭାଷାରେ ଏହାକୁ ବ୍ରେନ୍ ଏଜିଂ ବୋଲି କୁହାଯାଉଛି। ଯେଉଁ ବୟସରେ ମସ୍ତିଷ୍କ ସମ୍ପୂର୍ଣ୍ଣ ସକ୍ରିୟ ରହିବା କଥା ସେହି ସମୟରେ ଏହା ନିଜର କାର୍ଯ୍ୟକ୍ଷମତା ହରାଇ ବସୁଛି।
ଗବେଷଣାରୁ ଜଣାପଡ଼ିଛି ଯେ ନିଦ ଆମ ଶରୀର ଏବଂ ମସ୍ତିଷ୍କ ପାଇଁ ଏକ ପ୍ରକାର ମରାମତି ପ୍ରକ୍ରିୟା ଭଳି କାମ କରେ। ଯେତେବେଳେ ଆମେ ଶୋଇଥାଉ ମସ୍ତିଷ୍କ ଦିନଯାକର ଥକ୍କାପଣ ଦୂର କରି ନିଜକୁ ସୁସ୍ଥ ରଖିବାକୁ ଚେଷ୍ଟା କରେ। ମାତ୍ର ଦୀର୍ଘ ଦିନ ଧରି ପର୍ଯ୍ୟାପ୍ତ ନିଦ ନହେଲେ ଶରୀରରେ ଭିତର ସୁଜନ ବା କ୍ରୋନିକ୍ ଇନ୍ଫ୍ଲାମେସନ୍ ବଢ଼ିଯାଏ। ଏହା ସିଧାସଳଖ ମସ୍ତିଷ୍କର କୋଷିକା ବା ନ୍ୟୁରନ୍ସ ଉପରେ ଆକ୍ରମଣ କରେ। ଫଳରେ ମସ୍ତିଷ୍କର ବୟସ ଆପଣଙ୍କ ପ୍ରକୃତ ବୟସ ଠାରୁ ଅଧିକ ବୃଦ୍ଧି ପାଇଥାଏ।
କେବଳ ସେତିକି ନୁହେଁ ଏହି ସମସ୍ୟା ଯୋଗୁଁ ଲୋକଙ୍କର ସ୍ମରଣଶକ୍ତି ଦୁର୍ବଳ ହେବା ସହ ଏକାଗ୍ରତା ସମ୍ପୂର୍ଣ୍ଣ କମିଯାଉଛି। ଅତ୍ୟଧିକ ଚାପ ଏବଂ ଖରାପ ନିଦ ଯୋଗୁଁ ଭବିଷ୍ୟତରେ ଡିମେନ୍ସିଆ ଏବଂ ଆଲଜାଇମର ଭଳି ଭୟଙ୍କର ରୋଗର ଆଶଙ୍କା ଯଥେଷ୍ଟ ବୃଦ୍ଧି ପାଉଥିବା ନେଇ ଡାକ୍ତରମାନେ କଡ଼ା ଚେତାବନୀ ଦେଇଛନ୍ତି।
ଏହି ମାରାତ୍ମକ ପରିସ୍ଥିତିରୁ ବର୍ତ୍ତିବା ପାଇଁ ସ୍ୱାସ୍ଥ୍ୟ ବିଶେଷଜ୍ଞମାନେ କିଛି ଜରୁରୀ ପରାମର୍ଶ ଦେଇଛନ୍ତି। ପ୍ରତ୍ୟେକ ବ୍ୟକ୍ତି ଦିନକୁ ଅତିକମରେ ସାତ ରୁ ଆଠ ଘଣ୍ଟା ନିରବଚ୍ଛିନ୍ନ ନିଦ ନେବା ନିତାନ୍ତ ଆବଶ୍ୟକ। ଶୋଇବାର ଠିକ୍ ଏକ ଘଣ୍ଟା ପୂର୍ବରୁ ମୋବାଇଲ୍ ଏବଂ ଟିଭି ଠାରୁ ନିଜକୁ ଦୂରେଇ ରଖିବା ଉଚିତ୍। ଏହାବ୍ୟତୀତ ନିଜ ଜୀବନରୁ ମାନସିକ ଚାପ କମାଇବା ପାଇଁ ନିୟମିତ ଯୋଗ ଏବଂ ଧ୍ୟାନ କରିବାକୁ ସ୍ୱାସ୍ଥ୍ୟ ବିଶେଷଜ୍ଞମାନେ ପରାମର୍ଶ ଦେଇଛନ୍ତି।
