ନବରଙ୍ଗପୁର: ଆଜି ସମଗ୍ର ଦେଶରେ ଦଶହରାର ମାହୋଲ ଦେଖାଯାଇଥିବା ବେଳେ ନବରଙ୍ଗପୁର ଜିଲ୍ଲାରେ ଦେଖିବାକୁ ମିଳିଛି ଅଭାବନୀୟ ଘଟଣା। ନବରଙ୍ଗପୁର ଶରଧାପୁର ଗ୍ରାମରେ ଦାନ ମାଝୀ ଘଟଣାର ପୁନରାବୃତ୍ତି। ଶବ ଦାହ ଗାଡ଼ି ନମିଳିବାରୁ କାନ୍ଧରେ ୮ କି.ମି ଶବ ବୋହିଲେ ପରିବାର ଲୋକ।
ସୂଚନା ଅନୁସାରେ ଚନ୍ଦାହାଣ୍ଡି ଡାକ୍ତରଖାନାରେ ମହାପ୍ରୟାଣ ଗାଡ଼ି ନମିଳିବାରୁ ପରିବାର ଲୋକେ ମୃତ ମହିଳାଙ୍କ ଶବକୁ କାନ୍ଧରେ ବୋହି ପ୍ରାୟ ୮ କିମି ଦୂର ଶରଧାପୁର ଗ୍ରାମକୁ ନେଇଛନ୍ତି। ଶରଧାପୁର ଗାଁର ନରେନ୍ଦ୍ର ମାଝୀଙ୍କ ସ୍ତ୍ରୀ ଦେମତି ମାଝୀ ଅସୁସ୍ଥ ହୋଇ ଚନ୍ଦାହାଣ୍ଡି ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି ହୋଇଥିଲେ। ଡାକ୍ତରଖାନାରେ ପୂର୍ବାହ୍ନ ୧୧ଟାରେ ତାଙ୍କର ମୃତ୍ୟୁ ହୋଇଥିଲା। ପରେ ପରିବାର ଲୋକେ ଶବ ବାହକ ଗାଡ଼ି ସହ ଯୋଗାଯୋଗ କରିଥିଲେ। ହେଲେ ଦୀର୍ଘ ୨ ଘଣ୍ଟା ବିତିଯାଇଥିଲା କିନ୍ତୁ କୌଣସି ଗାଡ଼ି ଆସିଲା ନାହିଁ।
ଶେଷରେ ବାଧ୍ୟ ହୋଇ ପରିବାର ଲୋକେ ଶବକୁ କାନ୍ଧରେ ବହି ଦୀର୍ଘ ୮ କିଲୋମିଟର ଦୂର ଶରଧାପୁର ଗାଁକୁ ନେଇଥିଲେ। ଏହି ଘଟଣା ପୁଣି ଦାନ ମାଝୀ ଘଟଣାକୁ ମନେ ପକାଇଛି। ସୂଚନା ଯୋଗ୍ୟ, ୨୦୧୬ ମସିହା ଅଗଷ୍ଟ ମାସରେ ସ୍ତ୍ରୀଙ୍କ ମୃତ୍ୟୁ ପରେ କଳାହାଣ୍ଡି ଜିଲ୍ଲା ମୁଖ୍ୟ ଡାକ୍ତରଖାନାରେ ମହାପ୍ରୟାଣ ଗାଡ଼ି ନମିଳିବାରୁ ଦାନ ମାଝୀଙ୍କୁ କାନ୍ଧରେ ଶବ ବୋହିଥିଲେ। ଆଉ ଏହି ଘଟଣା ସେତେବେଳେ ଚାଞ୍ଚଲ୍ୟ ସୃଷ୍ଟି କରିଥିଲା।
Comments are closed.