‘ମୁଁ ସରକାରଙ୍କ ପାଇଁ କାମ କରୁନି’: କାହିଁକି ୟୁଏସରେ ଏମିତି କହିଲେ, ଅପରେସନ ସିନ୍ଦୂରର ପ୍ରତିନିଧିତ୍ବ କରୁଥିବା ଥରୁର?

ନୂଆଦିଲ୍ଲୀ: ଆତଙ୍କବାଦ ପ୍ରସଙ୍ଗରେ ପାକିସ୍ତାନର ପର୍ଦ୍ଦାଫାସ କରିବାକୁ ଆମେରିକା ଯାଇଥିବା କଂଗ୍ରେସ ସାଂସଦ ଶଶି ଥରୁର ପହଲଗାମ ଆତଙ୍କବାଦୀ ଆକ୍ରମଣ ଉପରେ ଭାରତର ପ୍ରତିକ୍ରିୟା ରଖିଛନ୍ତି । ଦେଶ କିପରି ପାକିସ୍ତାନ ପ୍ରାୟୋଜିତ ଆତଙ୍କବାଦର ମୁକାବିଲା ପାଇଁ ପ୍ରସ୍ତୁତ, ଏବଂ ଅପରେସନ ସିନ୍ଦୂର ମାଧ୍ୟମରେ କିପରି ଆତଙ୍କବାଦକୁ ମୂଳପୋଛ କରିବାର ଭାରତର ଳକ୍ଷ୍ୟ ରହିଛି ସେନେଇ ଆମେରିକାକୁ ଅବଗତ କରାଇଛନ୍ତି ।

୨୨ ଏପ୍ରିଲ ପହଲଗାମ ଆକ୍ରମଣ ଉପରେ ମତାମତ ଦେଇ କଂଗ୍ରେସ ସାଂସଦ ଶଶି ଥରୁର, ନ୍ୟୁୟର୍କର ଭାରତୀୟ କନସୁଲେଟରେ ଏକ ଆଲୋଚନା ସମୟରେ ସେ ସରକାରଙ୍କ ପାଇଁ କାମ କରନ୍ତି ନାହିଁ ବୋଲି କହିଥିଲେ । ଏଥିସହିତ କଂଗ୍ରେସ ସାଂସଦ ପାକିସ୍ତାନ ବିରୁଦ୍ଧରେ ଭାରତ ଦ୍ୱାରା ନିଆଯାଇଥିବା କାର୍ଯ୍ୟାନୁଷ୍ଠାନକୁ ପ୍ରଶଂସା ମଧ୍ୟ କରିଛନ୍ତି । ସେ ପାକିସ୍ତାନ ଏବଂ ପାକ୍ ଅଧିକୃତ କାଶ୍ମୀର ଆତଙ୍କବାଦୀ ଶିବିର ଉପରେ ଭାରତର ଆକ୍ରମଣକୁ ପ୍ରଶଂସା କରି ଭାରତ କଠୋର ଏବଂ ବୁଦ୍ଧିମାନ ଭାବରେ ଆକ୍ରମଣ କରିଛି ବୋଲି କହିଥିଲେ ।

ଏହାକୁ ନେଇ ସେ କହିଛନ୍ତି, ଆପଣ ଜାଣନ୍ତି, ମୁଁ ସରକାରଙ୍କ ପାଇଁ କାମ କରେ ନାହିଁ। ମୁଁ ବିରୋଧୀ ଦଳ ପାଇଁ କାମ କରେ, କିନ୍ତୁ ମୁଁ ନିଜେ କିଛି ଦିନ ମଧ୍ୟରେ ଭାରତର ଏକ ପ୍ରମୁଖ ଖବରକାଗଜରେ ଏକ ଲେଖା ଲେଖିଥିଲି ଯେ ଏବେ କଠିନ ଏବଂ ଚତୁରତାର ସହିତ ଆକ୍ରମଣ କରିବାର ସମୟ ଆସିଛି ଏବଂ ମୁଁ ଏହା କହି ଖୁସି ଯେ ଭାରତ ଠିକ୍ ସେହିପରି କରିଛି । ଥରୁରଙ୍କ ଏହି କଥା ଦେଶର ଏକତାକୁ ପ୍ରତିଫଳିତ କରିଛି । ଯେତେବେଳେ ଦେଶ କଥା ଆସେ ସେତେବେଳେ ବିରୋଧୀ ଶାସକ ଉଭୟ କାନ୍ଧରେ ମନ୍ଧ ମିଶାଇ ତାର ମୁକାବିଲା କରନ୍ତି । ଆଉ ଏହା ହିଁ ଏକ ସୁସ୍ଥ ଗଣତନ୍ତ୍ରର ପ୍ରତୀକ ।

ଏହାବ୍ୟତୀତ ଥରୁର ଆତଙ୍କବାଦୀ ଆକ୍ରମଣ ପଛରେ ଥିବା ଉଦ୍ଦେଶ୍ୟକୁ ନେଇ କହିଥିଲେ, ଯେ ପହଲଗାମ ଆତଙ୍କବାଦୀ ଆକ୍ରମଣ ପଛରେ ଲୋକଙ୍କୁ ବିଭାଜିତ କରିବା ଉଦ୍ଦେଶ୍ୟ ଥିଲା । କିନ୍ତୁ ଏହା ଭାରତରେ ଲୋକମାନଙ୍କୁ ସେମାନଙ୍କର ଧର୍ମ କିମ୍ବା ଅନ୍ୟ କୌଣସି ବିଭାଜନ ନିର୍ବିଶେଷରେ ଏକାଠି କରିଛି। ଲୋକମାନେ ଯେଉଁ ଧାର୍ମିକ ଏବଂ ଅନ୍ୟାନ୍ୟ ପାର୍ଥକ୍ୟକୁ ଉସ୍କାଇବାକୁ ଚେଷ୍ଟା କରିଥିଲେ, ସେଥିରେ ଅସାଧାରଣ ଏକତା ଥିଲା। ବାର୍ତ୍ତାଟି ସ୍ପଷ୍ଟ ଯେ ଏଥିରେ ମନ୍ଦ ଉଦ୍ଦେଶ୍ୟ ଥିଲା। ଦୁଃଖର ବିଷୟ, ଭାରତ ପାଖରେ ଏହି ଉଦ୍ଦେଶ୍ୟ କେଉଁଠାରୁ ଆସିଛି ତାହା ସନ୍ଦେହ କରିବାର କୌଣସି କାରଣ ନଥିଲା ବୋଲି ୟୁଏସରେ ମତ ରଖିଥିଲେ ଥରୁର ।

ଅପରେସନ୍ ସିନ୍ଦୂରକୁ ନେଇ ଥରୁର କହିଥିଲେ ଯେ କିପରି ୯ ଟି ନିର୍ଦ୍ଦିଷ୍ଟ ଜଣାଶୁଣା ଆତଙ୍କବାଦୀ ଆଡ୍ଡା, ମୁଖ୍ୟାଳୟ ଏବଂ ଲଞ୍ଚପ୍ୟାଡ୍ ଉପରେ ସଠିକ୍ ଏବଂ ସୁଚିନ୍ତିତ ଆକ୍ରମଣ କରିଥିଲା ଭାରତ । ଏଥିରେ ମୁରିଦକେରେ ଲସ୍କର-ଏ-ତୈବା ଆଡ୍ଡା ଏବଂ ବାହାୱଲପୁରରେ ଜୈଶ-ଏ-ମହମ୍ମଦ ଆଡ୍ଡା ଅନ୍ତର୍ଭୁକ୍ତ, ଯାହା ଡାନିଏଲ୍ ପର୍ଲଙ୍କ ହତ୍ୟା ପାଇଁ ଅନ୍ୟାନ୍ୟ ବିଷୟ ମଧ୍ୟରେ ଦାୟୀ ଥିଲା । ସେ କହିଛନ୍ତି, ଭାରତ ଏକ ସ୍ପଷ୍ଟ ବାର୍ତ୍ତା ଦେଇଛି ଯେ ଏହା ଆତଙ୍କବାଦକୁ ସହ୍ୟ କରିବ ନାହିଁ, ଏହାର ଜବାବ ଦେବ, କିନ୍ତୁ ସେହି ସମୟରେ, ଅତି ସଠିକ୍ ଭାବରେ, ଯୋଜନାବଦ୍ଧ ଭାବରେ ଏବଂ ଅତି ନିର୍ଦ୍ଦିଷ୍ଟ ଲକ୍ଷ୍ୟସ୍ଥଳ ଉପରେ ଆକ୍ରମଣ କରି, ଏହା ଏକ ବାର୍ତ୍ତା ମଧ୍ୟ ଦେଇଛି ଯେ ଏହା ଏକ ଦୀର୍ଘ ଯୁଦ୍ଧର ଆରମ୍ଭ ନୁହେଁ, ବରଂ ଏହା କେବଳ ପ୍ରତିଶୋଧର କାର୍ଯ୍ୟ ଏବଂ ଆମେ ଏହି କାର୍ଯ୍ୟକୁ ବନ୍ଦ କରିବାକୁ ପ୍ରସ୍ତୁତ ।