ନୂଆଦିଲ୍ଲୀ: ମୌସୁମୀ ଆସିବା ମାତ୍ରେ ମହାଙ୍ଗା ହେଲାଣି ସବୁଜ ପନିପରିବା ଦର। ଏକ ସପ୍ତାହ ପୂର୍ବରୁ ଟମାଟୋ କିଲୋ ପ୍ରତି ୩୦-୪୦ ଟଙ୍କାରେ ବିକ୍ରି ହେଉଥିଲା। ବର୍ତ୍ତମାନ ଏହା କିଲୋ ପ୍ରତି ୮୦-୧୦୦ ଟଙ୍କା ହେଲାଣି। ବଜାରରେ ଟମାଟୋ କିଲୋ ପ୍ରତି ୭୦ ରୁ ୮୦ ଟଙ୍କା ମୂଲ୍ୟରେ ହୋଲସେଲ ହାରରେ ବିକ୍ରି ହେଉଛି। ଗତ ମେ ମାସରେ ଟମାଟୋର ମୂଲ୍ୟ କିଲୋ ପ୍ରତି ୧୦ ଟଙ୍କା ଥିଲା। ଟମାଟୋର ମୂଲ୍ୟ ହଠାତ୍ ୧୦୦ ଟଙ୍କାକୁ ବୃଦ୍ଧି ପାଇବାରୁ ଗ୍ରାହକମାନେ ଅସନ୍ତୋଷ ପ୍ରକାଶ କରିଛନ୍ତି।
ବ୍ୟବସାୟୀଙ୍କ କହିବାନୁସାରେ, ମେ ମାସରେ ଟମାଟୋ ମୂଲ୍ୟ ହୋଲସେଲ ବଜାରରେ କିଲୋ ପିଛା ୩-୫ ଟଙ୍କା ଏବଂ ଖୁଚୁରା ବଜାରରେ କିଲୋ ପ୍ରତି ୧୦-୨୦ ଟଙ୍କା ଥିଲା। କିନ୍ତୁ ଜୁନ୍ ମାସରେ ଏହା ହଠାତ୍ ବୃଦ୍ଧି ପାଇ ୧୦୦ ଟଙ୍କାରୁ ଅଧିକ ହୋଇଛି। ଗତ ସପ୍ତାହ ତୁଳନାରେ ଚଳିତ ସପ୍ତାହ ଟମାଟୋ ମୂଲ୍ୟ ତିନି ଗୁଣ ବୃଦ୍ଧି ପାଇଛି। ହରିୟାଣା ଏବଂ ଉତ୍ତରପ୍ରଦେଶରୁ ଟମାଟୋ ଯୋଗାଣ କମ୍ ଥିବାରୁ ବେଙ୍ଗାଲୁରୁରୁ ଟମାଟୋ ଆସୁଛି। ସମ୍ପ୍ରତି ବର୍ଷା ଯୋଗୁଁ ଫସଲ ନଷ୍ଟ ହୋଇଯାଇଛି। ଦିଲ୍ଲୀର ବ୍ୟବସାୟୀମାନେ ଟମାଟୋ ପାଇଁ ମହାରାଷ୍ଟ୍ରର ଚାଷୀଙ୍କ ସହ ଆଲୋଚନା କରୁଛନ୍ତି।
ବ୍ୟବସାୟୀମାନେ କହିଛନ୍ତି ଯେ ଭବିଷ୍ୟତରେ ଏହାର ମୂଲ୍ୟ ଅଧିକ ରହିବ ନାହିଁ। ଯେତେବେଳେ ନୂଆ ଫସଲ ଆସିବ, ମୂଲ୍ୟ ହ୍ରାସ ପାଇବ ବୋଲି ଆଶା କରାଯାଉଛି। କିନ୍ତୁ ଯଦି ହିମାଚଳ ପ୍ରଦେଶ ଏବଂ ଅନ୍ୟାନ୍ୟ ରାଜ୍ୟରେ ଅଧିକ ବର୍ଷା ହୁଏ, ତେବେ ଫସଲ ପ୍ରଭାବିତ ହୋଇପାରେ ଏବଂ ମୂଲ୍ୟ ଅଧିକ ରହିପାରେ। ଖବର ଅନୁଯାୟୀ, ଗତ ବର୍ଷ ଅଧିକାଂଶ ଚାଷୀ ବିନ୍ସ ଚାଷ ଅଧିକ କରିଥିଲେ। ତେଣୁ ଟମାଟୋ ଚାଷ ହ୍ରାସ ପାଇଥିଲା। ଟମାଟୋ ତୁଳନାରେ ବିନ୍ସ ଦର ଅଧିକ ଥାଏ ବୋଲି କୃଷକମାନେ ଏହି ଫସଲରେ ଭଲ ରୋଜଗାର କରନ୍ତି।
ବିଶେଷଜ୍ଞମାନେ କହିଛନ୍ତି ଯେ ଗୋଟିଏ ପଟେ ବିପର୍ଯ୍ୟୟ ବାତ୍ୟା ଯୋଗୁଁ ମହାରାଷ୍ଟ୍ର, ରାଜସ୍ଥାନ ଏବଂ ଗୁଜୁରାଟ ଭଳି ରାଜ୍ୟରେ ଟମାଟୋ ଫସଲ ଉପରେ ପ୍ରଭାବ ପକାଇଛି। ଅନ୍ୟପଟେ ବିହାର ଏବଂ ପଶ୍ଚିମବଙ୍ଗରେ ପ୍ରଚଣ୍ଡ ଗରମ ଯୋଗୁଁ ଟମାଟୋ ଫସଲ ମଧ୍ୟ କ୍ଷତିଗ୍ରସ୍ତ ହୋଇଛି। ଫଳସ୍ୱରୂପ, ଦେଶର ଅନେକ ରାଜ୍ୟର ମଣ୍ଡିରେ ଟମାଟୋର ଆଗମନ ହ୍ରାସ ପାଇଛି। ଯେଉଁ କାରଣରୁ ରାତାରାତି ମୂଲ୍ୟ ବୃଦ୍ଧି ପାଇଛି। ମୌସୁମୀ ବର୍ଷା ଆରମ୍ଭ ହେବା ପରେ ଟମାଟୋ ଫସଲକୁ ପ୍ରଭାବିତ କରିଥିଲା । କେବଳ ଟମାଟୋ ନୁହେଁ, ମଣ୍ଡିରେ ଥିବା ଅନ୍ୟ ସବୁଜ ପନିପରିବା ମୂଲ୍ୟ ଅଧିକ ଥିବା ଦେଖିବାକୁ ମିଳିଛି। ତେବେ ଟମାଟୋ ଏବଂ ଅନ୍ୟାନ୍ୟ ପନିପରିବାର ନୂତନ ସାମଗ୍ରୀ ଆସିବା ପରେ ଆସନ୍ତା ଏକ କିମ୍ବା ଦୁଇ ମାସ ମଧ୍ୟରେ କେତେକ ରାଜ୍ୟରେ ମୂଲ୍ୟ ହ୍ରାସ ହେବ ବୋଲି ଆଶା କରାଯାଉଛି।
Comments are closed.