ଲାଲକିଲ୍ଲାରୁ ମୋଦିଙ୍କ ଅବିଭାଷଣ ସମୟରେ Mi-17 ହେଲିକପ୍ଟରରେ ଫରଫର ଉଡିଲା ‘ଅପରେସନ୍ ସିନ୍ଦୂର’ ପତାକା

ନୂଆଦିଲ୍ଲୀ: ସାରା ଦେଶରେ ୭୯ତମ ସ୍ୱାଧୀନତା ଦିବସ ପାଳନ କରାଯାଉଛି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଲାଲକିଲ୍ଲାରୁ ଦେଶକୁ ସମ୍ବୋଧିତ କରୁଛନ୍ତି । ଏହା ପୂର୍ବରୁ ପ୍ରଧାନମନ୍ତ୍ରୀ ମୋଦି ପତାକା ଉତ୍ତୋଳନ କରିଥିଲେ ଏବଂ ଏହି ସମୟରେ ଭାରତୀୟ ବାୟୁସେନାର ଦୁଇଟି Mi-୧୭ ହେଲିକପ୍ଟର ଆକାଶରେ ଫୁଲ ବର୍ଷା କରୁଥିବାର ଦେଖାଯାଇଥିଲା ।

ଗୋଟିଏ ହେଲିକପ୍ଟର ତ୍ରିରଙ୍ଗା ଉଡାଇଥିବାବେଳେ, ଅନ୍ୟଟି ଅପରେସନ ସିନ୍ଦୂରର ବ୍ୟାନର ଧରି ଫୁଲ ବର୍ଷା କରିଚାଲିଥିଲା । ପ୍ରଧାନମନ୍ତ୍ରୀ ମୋଦି କହିଥିଲେ ଯେ ଆଜି ୧୪୦ କୋଟି ଦେଶବାସୀ ତ୍ରିରଙ୍ଗା ରଙ୍ଗରେ ରଙ୍ଗିତ । ମରୁଭୂମି ହେଉ କି ହିମାଳୟର ଶିଖର, ସମୁଦ୍ର କୂଳ ହେଉ କିମ୍ବା ଜନଗହଳିପୂର୍ଣ୍ଣ ଅଞ୍ଚଳ – ସବୁଠି କେବଳ ଗୋଟିଏ ସ୍ୱର ଗୁଞ୍ଜରିତ ହେଉଛି, ମାତୃଭୂମିର ପ୍ରଶଂସା ।

ମୋଦି କହିଥିଲେ ଯେ ସ୍ୱାଧୀନତାର ପର୍ବ ହେଉଛି ଦୃଢ଼ ସଂକଳ୍ପ ଏବଂ ଏକତାର ପର୍ବ । ସମ୍ବିଧାନ ଦେଶର ଆଲୋକମାଳ ପାଲଟିଛି ଏବଂ ଆମକୁ ପଥ ଦେଖାଉଛି । ପର୍ବତମାଳାରେ ବର୍ତ୍ତମାନ ଘଟିଥିବା ପ୍ରାକୃତିକ ବିପର୍ଯ୍ୟୟ ସମ୍ପର୍କରେ ଉଲ୍ଲେଖ କରି ପ୍ରଧାନମନ୍ତ୍ରୀ କହିଥିଲେ ଯେ, କେନ୍ଦ୍ର ଏବଂ ରାଜ୍ୟ ମିଳିତ ଭାବରେ ରିଲିଫ୍ ଏବଂ ଉଦ୍ଧାର କାର୍ଯ୍ୟ ଚଳାଇଛନ୍ତି ।

ସେ କହିଥିଲେ ଯେ ଲାଲକିଲ୍ଲାରୁ ଧାରା ୩୭୦ର ପ୍ରାଚୀର ଭାଙ୍ଗିବା ନିଷ୍ପତ୍ତି ଡକ୍ଟର ଶ୍ୟାମା ପ୍ରସାଦ ମୁଖାର୍ଜୀଙ୍କ ପ୍ରତି ଏକ ପ୍ରକୃତ ଶ୍ରଦ୍ଧାଞ୍ଜଳି । ପ୍ରଧାନମନ୍ତ୍ରୀ ମୋଦି ପହଲଗାମ ଆତଙ୍କବାଦୀ ଆକ୍ରମଣର ପ୍ରତିଶୋଧ ନେବା ପାଇଁ ଆରମ୍ଭ ହୋଇଥିବା ଅପରେସନ ସିନ୍ଦୂରର ମଧ୍ୟ ଉଲ୍ଲେଖ କରିଥିଲେ ।

ସାହସୀ ସୈନିକମାନଙ୍କୁ ସଲାମ କରି ସେ କହିଛନ୍ତି ଯେ, ପହଲଗାମରେ ସୀମା ପାରରୁ ଆସିଥିବା ଆତଙ୍କବାଦୀମାନେ ନିର୍ଦ୍ଦୋଷ ଲୋକଙ୍କୁ ସେମାନଙ୍କ ଧର୍ମ ପଚାରି ହତ୍ୟା କରିଥିଲେ, ସ୍ୱାମୀଙ୍କୁ ତାଙ୍କ ସ୍ତ୍ରୀଙ୍କ ଆଗରେ ଏବଂ ବାପାଙ୍କୁ ତାଙ୍କ ପିଲାମାନଙ୍କ ଆଗରେ ହତ୍ୟା କରିଥିଲେ । ଏହି ଘଟଣା ନେଇ ସମଗ୍ର ଦେଶ କ୍ରୋଧିତ ଏବଂ ଅପରେସନ ସିନ୍ଦୁର ସେହି କ୍ରୋଧର ଏକ କଡା ଜବାବ ।