Build homes in Australia: ଅଷ୍ଟ୍ରେଲିଆରେ ଭାରତ ନିର୍ମାଣ କରିବ ୧୦ ଲକ୍ଷ ଘର ! ଚାଲିଛି ଆଲୋଚନା

ନୂଆଦିଲ୍ଲୀ: ଭାରତ ଏବେ ଅଷ୍ଟ୍ରେଲିଆ(Australia)ରେ ରିଅଲ ଇଷ୍ଟେଟ୍ ନିବେଶ କରିବାକୁ ଯାଉଛି। କେନ୍ଦ୍ରମନ୍ତ୍ରୀ ପୀୟୁଷ ଗୋୟଲ(Piyush Goyal ) କହିଛନ୍ତି ଯେ ଭାରତ ସରକାର ଏଥିପାଇଁ ୟୁଏଇରୁ ମଧ୍ୟ ସାହାଯ୍ୟ ନେଇପାରେ । ପ୍ରକୃତରେ, ଏହି ପ୍ରକଳ୍ପ ବହୁତ ବଡ଼ ହେବାକୁ ଯାଉଛି ଏବଂ ଏଥିପାଇଁ ଭାରତକୁ ବାହ୍ୟ ପାଣ୍ଠିର ଆବଶ୍ୟକତା ପଡ଼ିପାରେ।

କେନ୍ଦ୍ରମନ୍ତ୍ରୀ ପୀୟୁଷ ଗୋୟଲ କହିଛନ୍ତି ଯେ ଭାରତ ଅଷ୍ଟ୍ରେଲିଆରେ ୧୦ ଲକ୍ଷ ଘର ନିର୍ମାଣ କରିବାକୁ ଆଲୋଚନା କରୁଛି ଏବଂ ଏଥିପାଇଁ UAE ଠାରୁ ଆର୍ଥିକ ସହାୟତା ଲୋଡିଛି। ମନ୍ତ୍ରୀ ଗୋୟଲ ଏହି ପ୍ରକଳ୍ପକୁ ୫୦୦ ବିଲିୟନ ଡଲାର($500 billion)ର ସୁଯୋଗ ବୋଲି କହିଛନ୍ତି।

ଗୋୟଲ ପ୍ରକଳ୍ପ ବିଷୟରେ ଅଧିକ ସୂଚନା ଦେଇ ନାହାଁନ୍ତି, ଯେପରିକି ଅଷ୍ଟ୍ରେଲିଆରେ ଏହି ଘରଗୁଡ଼ିକ କେଉଁଠାରେ ନିର୍ମାଣ ହେବ, ଅଷ୍ଟ୍ରେଲିଆ ସରକାର ଏଥିରେ କେତେ ଟଙ୍କା ଖର୍ଚ୍ଚ କରିବେ, କିମ୍ବା ସମଗ୍ର ପ୍ରକଳ୍ପରେ ଭାରତ କ’ଣ ଭୂମିକା ଗ୍ରହଣ କରିବ।

ସେ କହିଥିଲେ, “ମୁଁ ଅଷ୍ଟ୍ରେଲିଆରେ ମୋର ପ୍ରତିପକ୍ଷଙ୍କ ସହ ୧୦ ଲକ୍ଷ ଘର ନିର୍ମାଣ ପାଇଁ ଆଲୋଚନା କରୁଛି। ୧୦ ଲକ୍ଷ ଘର। କେହି ହିସାବ କରିବାକୁ ଚାହାଁନ୍ତି କି? ଅଷ୍ଟ୍ରେଲିଆରେ ୧୦ ଲକ୍ଷ ଘର ନିର୍ମାଣ କରିବା ଅତି କମରେ ୫୦୦ ବିଲିୟନ ଡଲାର ମୂଲ୍ୟର ଏକ ସୁଯୋଗ।”

ଗୋୟଲ କହିଛନ୍ତି ଯେ ଭାରତ ସରକାର ପ୍ରସ୍ତାବ ଦେଇଛନ୍ତି ଯେ ଭାରତୀୟ ଶ୍ରମିକମାନଙ୍କୁ ଅଷ୍ଟ୍ରେଲିଆ ପଠାଯିବା , ଯେଉଁଠାରେ ସେମାନଙ୍କୁ ଘର ନିର୍ମାଣ ପାଇଁ ତାଲିମ ଦିଆଯିବ। ଏହା ସେମାନଙ୍କୁ ସେଠାକାର ନିୟମ ଅନୁଯାୟୀ ଘର ନିର୍ମାଣ କରିବାକୁ ସକ୍ଷମ କରିବ।

କିଛି ରିପୋର୍ଟ ଅନୁଯାୟୀ, ଅଷ୍ଟ୍ରେଲିଆରେ ଘରର ଚାହିଦା ଅଧିକ ଥିବା ବେଳେ ଯୋଗାଣ କମ୍ ଅଛି। ଏହି କାରଣରୁ ସେଠାରେ ଘରର ମୂଲ୍ୟ ବହୁତ ବୃଦ୍ଧି ପାଇଛି। ସାମ୍ପ୍ରତିକ ନିର୍ବାଚନରେ ​​ମଧ୍ୟ ଘର ଏକ ଗୁରୁତ୍ୱପୂର୍ଣ୍ଣ ପ୍ରସଙ୍ଗ ଥିଲା।

ଗୋୟଲ କହିଛନ୍ତି ଯେ ସେ ଭାରତୀୟ ରିଅଲ୍ ଇଷ୍ଟେଟରେ ଏକ ଗୁରୁତ୍ୱପୂର୍ଣ୍ଣ ନିବେଶକ ସଂଯୁକ୍ତ ଆରବ ଏମିରେଟ୍ସ (UAE) ସହିତ ଆର୍ଥିକ କ୍ଷେତ୍ରରେ ସାହାଯ୍ୟ ପାଇଁ ଯୋଗାଯୋଗ କରିଛନ୍ତି।

UAE ବାଣିଜ୍ୟ ମନ୍ତ୍ରୀ ଥାନି ବିନ୍ ଅହମ୍ମଦ ଅଲ୍ ଜେୟୁଦିଙ୍କ ନେତୃତ୍ୱରେ ଏକ ବ୍ୟବସାୟିକ ପ୍ରତିନିଧିମଣ୍ଡଳୀ ସହ ସାକ୍ଷାତ ସମୟରେ, ଗୋୟଲ କହିଛନ୍ତି ଯେ ସେ UAE କୁ ଏକ ସହଭାଗୀତା ପ୍ରସ୍ତାବ ମଧ୍ୟ ଦେଇଛନ୍ତି।