ରାଜସ୍ଥାନ: ଭାରତ-ପାକିସ୍ତାନ ଉତ୍ତେଜନାକୁ ଦୃଷ୍ଟିରେ ରଖି ଜୈସଲମେରରେ ପ୍ରଶାସନର ବଡ଼ ନିଷ୍ପତ୍ତି। ଜୈସଲମେର ଜିଲ୍ଲାରେ ବାଣ ଦୋକାନ ବନ୍ଦ ରହିବ। ବାଣ ଫୁଟାଇବା, ବିକ୍ରୟ କରିବା ଏବଂ କିଣିବା ଉପରେ ସମ୍ପୂର୍ଣ୍ଣ ନିଷେଧ ରହିବ ବୋଲି ଜିଲ୍ଲା ପ୍ରଶାସନ ସୂଚନା ଦେଇଛି । ଆଦେଶର ଉଲ୍ଲଂଘନ ହେଲେ, ଭାରତୀୟ ଫୌଜଦାରୀ କାର୍ଯ୍ୟବିଧି ସଂହିତା, ୨୦୨୩ର ଧାରା ୨୨୩ ଅନୁଯାୟୀ ନିୟମ ଅନୁଯାୟୀ ଦଣ୍ଡନୀୟ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ଏହି ଆଦେଶ ତୁରନ୍ତ କାର୍ଯ୍ୟକାରୀ ହେବ ଏବଂ ପରବର୍ତ୍ତୀ ନିର୍ଦ୍ଦେଶ ପର୍ଯ୍ୟନ୍ତ ବଳବତ୍ତର ରହିବ।
ନିର୍ଦ୍ଦେଶ ଅନୁଯାୟୀ, UAV, ଡ୍ରୋନ୍ କ୍ୟାମେରା,ହଟ୍ ଏୟାର ବେଲୁନ୍ ଇତ୍ୟାଦିର ଉଡ଼ାଣ ଉପରେ ପ୍ରତିବନ୍ଧକ ରହିବ। ଯଦି କେହି ଏହା ନମାନ୍ତି ତେବେ ତାଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
ଜିଲ୍ଲା କଲେକ୍ଟରଙ୍କ ନିର୍ଦ୍ଦେଶକ୍ରମେ, ଶୁକ୍ରବାର ରାତି ୯ଟାରୁ ସକାଳ ୬ଟା ପର୍ଯ୍ୟନ୍ତ ସମଗ୍ର ଜିଲ୍ଲାରେ ସମ୍ପୂର୍ଣ୍ଣ ବିଦ୍ୟୁତ୍ କାଟ ରହିବ। ପୂର୍ବରୁ ଏହି ସମୟ ସୀମା ରାତି ୯ଟାରୁ ସକାଳ ୪ଟା ପର୍ଯ୍ୟନ୍ତ ସ୍ଥିର କରାଯାଇଥିଲା, କିନ୍ତୁ ଏବେ ଏହାକୁ ଦୁଇ ଘଣ୍ଟା ବୃଦ୍ଧି କରି ସକାଳ ୬ଟା କରାଯାଇଛି। ସୁରକ୍ଷା କାରଣକୁ ଧ୍ୟାନରେ ରଖି ଏହି ନିଷ୍ପତ୍ତି ନିଆଯାଇଛି, ଏବଂ ଏହାକୁ ଗମ୍ଭୀରତାର ସହ ପାଳନ କରିବାକୁ ଅପିଲ୍ କରାଯାଇଛି।
ସୁରକ୍ଷାକୁ ଦୃଷ୍ଟିରେ ରଖି ବ୍ଲାକଆଉଟ୍ କାର୍ଯ୍ୟକାରୀ କରାଯାଇଛି ଏବଂ ଏଥିରେ ଅସାବଧାନ ରହିବା ସମସ୍ତଙ୍କ ପାଇଁ କ୍ଷତିକାରକ ହୋଇପାରେ। ପ୍ରଶାସନ ସମସ୍ତଙ୍କଠାରୁ ସହଯୋଗ ଆଶା କରିଛି।
ପ୍ରଶାସନ ସମସ୍ତ ନାଗରିକଙ୍କୁ ଅନୁରୋଧ କରିଛି ଯେ, ସେମାନେ ସମୟ ମଧ୍ୟରେ ନିଜ ଘରର ସମସ୍ତ ଲାଇଟ୍ ବନ୍ଦ କରନ୍ତୁ ଏବଂ ଝରକାଗୁଡ଼ିକୁ ପରଦାରେ ଭଲ ଭାବରେ ଘୋଡ଼ାନ୍ତୁ, ଯାହା ଦ୍ଵାରା କୌଣସି ଆଲୋକ ବାହାରକୁ ଯେପରି ନଯାଏ । ଟ୍ୟୁବ୍ ଲାଇଟ୍, ବଲବ୍, ସାଜସଜ୍ଜା ଲାଇଟ୍ ଇତ୍ୟାଦି ବାହ୍ୟ ଲାଇଟ୍ଗୁଡ଼ିକୁ ମଧ୍ୟ ସମ୍ପୂର୍ଣ୍ଣ ବନ୍ଦ କରିବାକୁ ଅନୁରୋଧ କରାଯାଇଛି।
ଏହା ସହିତ, ପ୍ରତିରକ୍ଷା କ୍ଷେତ୍ରର ପାଞ୍ଚ କିଲୋମିଟର ପରିଧି ମଧ୍ୟରେ ଗତିବିଧି ସମ୍ପୂର୍ଣ୍ଣ ନିଷେଧ କରାଯିବ।
ସେହିପରି, ଯଦି କୌଣସି ବ୍ୟକ୍ତିଙ୍କୁ ଏହି ଅଞ୍ଚଳଗୁଡ଼ିକରେ ଅବାଞ୍ଛିତ ଭାବରେ ବୁଲୁଥିବାର ଦେଖାଯାଏ, ତେବେ ତାଙ୍କ ବିରୁଦ୍ଧରେ କଠୋର ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
ସୂଚନାଥାଉକି, ପାକିସ୍ତାନ ଗତକାଲି ଜୈସଲମେର ଉପରେ ଡ୍ରୋନ ଏବଂ କ୍ଷେପଣାସ୍ତ୍ର ଆକ୍ରମଣ କରି ଉତ୍ତେଜନାମୂଳକ କାର୍ଯ୍ୟ ଆରମ୍ଭ କରିଥିଲା । ଭାରତର ଶକ୍ତିଶାଳୀ ବାୟୁ ପ୍ରତିରକ୍ଷା ପ୍ରଣାଳୀ ସତର୍କତା ପ୍ରଦର୍ଶନ କରି ଆକାଶ ମାର୍ଗରେ ହିଁ ସମସ୍ତ ଆକ୍ରମଣକୁ ବିଫଳ କରିଥିଲା।
Comments are closed.