ଦେଶରୁ ଦିନକରେ ପୁଣି ୪ ଲକ୍ଷରୁ ଅଧିକ କରୋନା ଆକ୍ରାନ୍ତ, ଡେଥ୍ କେସ୍ ପାଖାପାଖି ୪ ହଜାର

ନୂଆଦିଲ୍ଲୀ: ଦେଶରେ କରୋନାରେ ସେକେଣ୍ଡ ଓ୍ୱେଭରେ ସଂକ୍ରମଣରେ ବ୍ରେକ ଲାଗୁନି । ମୃତ୍ୟୁର ବିଭୀଷିକା ରଚୁଛି ମହମାରୀ । ଦୈନିକ ସଂକ୍ରମଣ ପୁଣି ଥରେ ୪ ଲକ୍ଷ ପାର କରିଥିବା ବେଳେ ପ୍ରଥମ ଥର ମୃତ୍ୟୁସଂଖ୍ୟା ପାଖାପାଖି ୪ ହଜାର ହୋଇଛି । ଗତ ୨୪ ଘଣ୍ଟାରେ ସାରା ଦେଶରୁ ଚିହ୍ନଟ ହୋଇଛନ୍ତି ୪ଲକ୍ଷ ୧୨ ହଜାର ୨୬୨ କରୋନା ଆକ୍ରାନ୍ତ । ଯାହାକି ମହାମାରୀ ପରଠୁ କୌଣସି ଦେଶରେ ଦିନକରେ ସର୍ବାଧିକ । ଦେଶରେ କରୋନା ଆକ୍ରାନ୍ତଙ୍କ ମୋଟ୍ ସଂଖ୍ୟା ୨କୋଟି ୧୦ଲକ୍ଷ ୭୭ହଜାର ୪୧୦କୁ ବୃଦ୍ଧି ପାଇଛି ।
ଦ୍ୱିତୀୟ ଥର ଦୈନିକ ସଂକ୍ରମଣ ୪ ଲକ୍ଷ ପାର
ଦ୍ୱିତୀୟ ଥର ଦେଶରେ ଦୈନିକ ସଂକ୍ରମିତଙ୍କ ସଂଖ୍ୟା ୪ଲକ୍ଷ ପାର କରିଛି । ପୂର୍ବରୁ ଗତ ଏପ୍ରିଲ ୩୦ ତାରିଖରେ ବାହାରିଥିଲେ ୪ଲକ୍ଷ ୨ହଜାର ୩୫୧ ପଜିଟିଭ୍ । ସେଦିନ ଦେଶରେ ୧୯ ଲକ୍ଷରୁ ଅଧିକ କୋଭିଡ୍ ଟେଷ୍ଟ ହୋଇଥିଲା । ତାପରେ ଦୈନିକ ଟେଷ୍ଟ ହ୍ରାସ ପାଇଛି । ମହାରାଷ୍ଟ୍ରରେ ଦୈନିକ ସଂକ୍ରମଣ ସାମାନ୍ୟ ଖସିଛି । କିନ୍ତୁ କର୍ଣ୍ଣାଟକରେ ଏହି ସଂଖ୍ୟା ୫୦ହଜାର ପାର କରିଛି । ସେହିପରି କେରଳ, ତାମିଲନାଡୁ, ପଶ୍ଚିମବଙ୍ଗ ଭଳି ୧୨ଟି ରାଜ୍ୟରେ ଦୈନିକ ସଂକ୍ରମଣରେ ବୃଦ୍ଧି ହେଉଛି ।
୪ ହଜାର ମୁହାଁ ଦୈନିକ ମୃତ୍ୟୁସଂଖ୍ୟା
ସଂକ୍ରମଣ ସହ କରୋନା ଅଧିକ ଜୀବନ ନେଉଛି । ଦୈନିକ ମୃତ୍ୟୁସଂଖ୍ୟା ୪ ହଜାର ମୁହାଁ ହେଲାଣି । ଗତ ୨୪ ଘଣ୍ଟାରେ ମହାମାରୀ ନେଇଛି ୩ହଜାର ୯୮୦ ସଂକ୍ରମିତଙ୍କ ଜୀବନ । ୬ଟି ରାଜ୍ୟ ମହାରାଷ୍ଟ୍ର, ଉତ୍ତରପ୍ରଦେଶ, କର୍ଣ୍ଣାଟକ, ପଞ୍ଜାବ, ହରିୟାଣା ଓ ତାମିଲନାଡୁରେ ଦୈନିକ ମୃତ୍ୟୁସଂଖ୍ୟା ବଢ଼ିବାରେ ଲାଗିଛି । ବର୍ତ୍ତମାନ ସୁଦ୍ଧା ଦେଶରେ କରୋନା ୨ଲକ୍ଷ ୩୦ହଜାର ୧୬୮ ଜୀବନ ନେଲାଣି । ଏବେ ଦେଶରେ ୩୫ଲକ୍ଷ ୬୬ହଜାର ୩୯୮ଟି କୋଭିଡ୍ ଆକ୍ଟିଭ୍ କେସ୍ ରହିଛି ।