ଭାରତ-ଆମେରିକା ମଧ୍ୟରେ ଟାରିଫ ଓ୍ୱାର: ବାଣିଜ୍ୟ ମନ୍ତ୍ରୀ ପୀୟୁଷ ଗୋୟଲ କହିଲେ ‘ଝୁକେଗା ନେହିଁ ଭାରତ’

ନୂଆଦିଲ୍ଲୀ: ଆମେରିକା ଓ ଭାରତ ମଧ୍ୟରେ ଟାରିଫ ନେଇ ବିବାଦ ବଢୁଛି। ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଭାରତୀୟ ଜିନିଷ ଉପରେ ୨୫% ଅତିରିକ୍ତ ଟାରିଫ ଲଗାଇବାକୁ ନିଷ୍ପତ୍ତି ନେଇଛନ୍ତି । ଏହା ସତ୍ତ୍ୱେ ଭାରତ ରୁଷିଆରୁ ତେଲ କିଣା ଜାରି ରଖିବ। କେନ୍ଦ୍ରମନ୍ତ୍ରୀ ପୀୟୂଷ ଗୋୟଲ ଏକ କାର୍ଯ୍ୟକ୍ରମରେ କହିଛନ୍ତି, “ଭାରତ କାହା ଆଗରେ ମୁଣ୍ଡ ନୁଆଁଇବ ନାହିଁ।”

ଏକ ନ୍ୟୁଜ୍ ଚ୍ୟାନେଲର କାର୍ଯ୍ୟକ୍ରମରେ ମନ୍ତ୍ରୀ ପୀୟୁଷ ଗୋୟଲ କହିଛନ୍ତି, ଭାରତ ଏବେ ବହୁତ ଶକ୍ତିଶାଳୀ ଓ ଆତ୍ମବିଶ୍ୱାସୀ। ଦେଶର ଜିଡିପି ବାର୍ଷିକ ୬.୫% ହାରରେ ବଢୁଛି। ଏହା ଆଗକୁ ମଧ୍ୟ ଦ୍ରୁତ ଗତିରେ ବଢିବ। ସେ ଡି-ଗ୍ଲୋବାଲାଇଜେସନର ବିଚାରକୁ ଖାରଜ କରି କହିଛନ୍ତି, ଦେଶମାନେ କେବଳ ସେମାନଙ୍କ ବ୍ୟାପାର ରାସ୍ତା ଓ ସହଭାଗୀଙ୍କୁ ପୁନର୍ଗଠନ କରୁଛନ୍ତି। ସେ ଆହୁରି କହିଛନ୍ତି, “ମୋର ପୂରା ବିଶ୍ୱାସ, ଏ ବର୍ଷ ଭାରତ ଗତ ବର୍ଷ ତୁଳନାରେ ଅଧିକ ରପ୍ତାନି କରିବ।” ବ୍ୟାପାର ବାଧା ମୁକାବିଲା ପାଇଁ ପଦକ୍ଷେପ ନିଆଯାଇଛି। ୨୦୨୪-୨୫ ଆର୍ଥିକ ବର୍ଷରେ ଭାରତର ଜିନିଷ ଓ ସେବା ରପ୍ତାନି ୮୨.୫ କୋଟି ଆମେରିକୀୟ ଡଲାରରେ ପହଞ୍ଚିଛି।

ମୁକ୍ତ ବ୍ୟାପାର ଚୁକ୍ତି ନେଇ ଗୋୟଲ କହିଛନ୍ତି, ଭାରତର ଦୃଷ୍ଟିକୋଣ ଏବେ ଟାରିଫ ରିହାତି ମାଗିବା ଠାରୁ ଆଗକୁ ବଢିଛି। ଚାରି ଦେଶର ଇଏଫଟିଏ ବ୍ଲକ୍ ସହ ଆଲୋଚନାକୁ ମନେ ପକାଇ ସେ କହିଛନ୍ତି, “ଆମେ ୪ ଟ୍ରିଲିୟନ ଡଲାରର ଅର୍ଥନୀତି। ଆମେ ଦୁନିଆର ସବୁଠାରୁ ଦ୍ରୁତ ବଢୁଥିବା ବଡ଼ ଅର୍ଥନୀତି। ଆମ ପାଖରେ ଯୁବଶକ୍ତି ଅଛି, କିନ୍ତୁ ତୁମର ଜନସଂଖ୍ୟା ବୁଢା ହେଉଛି।”

ଇଏଫଟିଏ ଦେଶମାନେ ଭାରତରେ ୧୦୦ ବିଲିୟନ ଡଲାର ବିନିଯୋଗ ପାଇଁ ରାଜି ହୋଇଛନ୍ତି। ଏହା ଦ୍ୱାରା ୧୦ ଲକ୍ଷ ପ୍ରତ୍ୟକ୍ଷ ଚାକିରି ଓ ମୋଟ ୫୦ ଲକ୍ଷ ଚାକିରି ସୃଷ୍ଟି ହେବ। ଗୋୟଲ କହିଛନ୍ତି, “ଅକ୍ଟୋବର ୧ ତାରିଖରୁ ଇଏଫଟିଏ ଚୁକ୍ତି ଲାଗୁ ହେବ ଓ ଏହାର ଫଳ ଦେଖାଯିବ।”

କଂଗ୍ରେସ ସାଂସଦଙ୍କ ଦ୍ୱାରା ଭାରତୀୟ ଅର୍ଥନୀତିକୁ “ମୃତ” କହିବାର ଗୋୟଲ ନିନ୍ଦା କରିଛନ୍ତି। ସେ କହିଛନ୍ତି, “କଂଗ୍ରେସ ଶାସନକୁ ଦେଶ କେବେ ଭୁଲିବ ନାହିଁ। ବିରୋଧୀ ନେତାଙ୍କ ନକାରାତ୍ମକ ବୟାନ ଲଜ୍ଜାଜନକ।” ସେ ରାହୁଲ ଗାନ୍ଧୀଙ୍କୁ ଭାରତର ଉନ୍ନତିର କାହାଣୀକୁ ଅପମାନ କରିବା ପାଇଁ ନିନ୍ଦା କରିଛନ୍ତି।

ଗୋୟଲ କହିଛନ୍ତି, ଭାରତର ମୁଦ୍ରା, ବୈଦେଶିକ ମୁଦ୍ରା ଭଣ୍ଡାର, ଷ୍ଟକ୍ ମାର୍କେଟ ଓ ଭିତ୍ତିଭୂମି ଦୃଢ଼ ଅଛି। ମୁଦ୍ରାସ୍ଫୀତି ଅନ୍ୟ ଆହ୍ୱାନମୂଳକ ଅର୍ଥନୀତି ତୁଳନାରେ ସବୁଠାରୁ କମ। ସେ କହିଛନ୍ତି, ” ଆମେ ବିଶ୍ୱ ଉନ୍ନୟନରେ ୧୬% ଯୋଗଦାନ ଦେଉଛୁ।” ଭାରତର ୧୪୦ କୋଟି ଯୁବ, କୁଶଳୀ ଓ ଉଚ୍ଚାଭିଳାଷୀ ନାଗରିକ ବିଶ୍ୱ ସହଭାଗୀଙ୍କ ପାଇଁ ଆକର୍ଷଣ।

ପୀୟୁଷ ଗୋୟଲ ୨୦୦୦ ପରେ ଭାରତରେ ହୋଇଥିବା ବଡ଼ ପରିବର୍ତ୍ତନ ବିଷୟରେ କହିଛନ୍ତି। ସେ ଆଇଟି ଇଣ୍ଡଷ୍ଟ୍ରୀକୁ ହଜାର ହଜାର ଚାକିରି ସୃଷ୍ଟି ପାଇଁ ଶ୍ରେୟ ଦେଇଛନ୍ତି। କୋଭିଡ ମହାମାରୀ ସଙ୍କଟକୁ ଭାରତ ସୁଯୋଗରେ ବଦଳାଇଛି। ସେ ଆଶ୍ୱାସନା ଦେଇଛନ୍ତି, “ଆହ୍ୱାନ ମୂଳକ ସମୟରେ ଭାରତ ବିଜୟ ହୁଏ।”