‘ଏମିତି ଶିକ୍ଷା ଦେବୁ, ତାଙ୍କ ପିଢ଼ି ମନେ ରଖିବ’, ‘ଅପରେସନ ସିନ୍ଦୂର’ର ଆଉ ଏକ ଭିଡିଓ ଜାରି କଲା ସେନା

ନୂଆଦିଲ୍ଲୀ: ସାରା ବିଶ୍ବ ଦେଖିଲା କେମିତି ଅପରେସନ ସିନ୍ଦୂର ମାଧ୍ୟମରେ ଧରାଶାୟୀ ହେଲା ପାକିସ୍ତାନ । ସଠିକ୍ ନିଶାନା କରି, ତାର ସଠିକ୍ ପ୍ରମାଣ ଦେଇ, ନିଜର ପ୍ରତିଶୋଧ ନେଲା ଭାରତ । ଆଉ ଏହି ସଫଳତାର ଆଉ ଏକ ଭିଡିଓ ଜାରି କରିଛି ଭାରତୀୟ ସେନା । ଖାଲି ଭିଡିଓ ଜାରି କରିନି, ଏଥିରେ ପାକିସ୍ତାନକୁ ପୁଣି କଡା ଚେତାବନୀ ବି ଦେଇଛି ।

ଭାରତୀୟ ସେନା ସୋସିଆଲ ମିଡିଆ ପ୍ଲାଟଫର୍ମ ଏକ୍ସରେ ଅପରେସନ ସିନ୍ଦୂର ସହିତ ଜଡିତ ଆଉ ଏକ ଭିଡିଓ ସେୟାର କରିଛି। ଏହି ଭିଡିଓରେ ସେନାର ସୈନିକମାନେ ଆତଙ୍କବାଦୀ ଆଡ୍ଡାଗୁଡ଼ିକୁ ସମ୍ପୂର୍ଣ୍ଣ ଧ୍ୱଂସ କରୁଥିବାର ଦେଖାଯାଉଛି । ଯାହାକୁ ସେୟାର କରି ସେନା ତାର ଭିଡିଓରେ କହିଛି, ଏହା ସବୁ ପହଲଗାମରେ ହୋଇଥିବା ଆତଙ୍କବାଦୀ ଆକ୍ରମଣ ସହିତ ଆରମ୍ଭ ହୋଇଥିଲା। କୌଣସି କ୍ରୋଧ ନଥିଲା, ଲାଭା ଥିଲା । ମନରେ କେବଳ ଗୋଟିଏ କଥା ଥିଲା, ଏଥର ଆମେ ସେମାନଙ୍କୁ ଏପରି ଶିକ୍ଷା ଦେବୁ ଯେ ସେମାନଙ୍କ ପିଢ଼ି ଏହାକୁ ମନେ ରଖିବେ। ଏହା ପ୍ରତିଶୋଧର ଭାବନା ନଥିଲା, ଏହା ନ୍ୟାୟ ଥିଲା। ମେ ୯ ରାତି ପ୍ରାୟ ୯ଟାରେ, ଭାରତୀୟ ସେନା ଦ୍ୱାରା ଅସ୍ତ୍ରବିରତି ଉଲ୍ଲଂଘନ କରିଥିବା ସମସ୍ତ ଶତ୍ରୁ ପୋଷ୍ଟକୁ ଧ୍ୱଂସ କରିଦିଆଯାଇଥିଲା । ଅପରେସନ ସିନ୍ଦୁର କେବଳ ଏକ କାର୍ଯ୍ୟାନୁଷ୍ଠାନ ନଥିଲା, ଏହା ପାକିସ୍ତାନ ପାଇଁ ଏକ ଶିକ୍ଷା ଥିଲା ଯାହା ଦଶନ୍ଧି ଧରି ଶିଖି ନଥିଲା ।

#WATCH | Western Command – Indian Army posts a video of Operation Sindoor on its social media handle 'X'.

"Planned, trained & executed. Justice served"- Indian Army pic.twitter.com/Z3SwvGS1j3

— ANI (@ANI) May 18, 2025

ପହଲଗାମ ଆତଙ୍କବାଦୀ ଆକ୍ରମଣ ପରେ, ଭାରତୀୟ ସେନା ମେ ୬-୭ ରାତିରେ ସିନ୍ଦୂର ଅପରେସନ୍ କରିଥିଲା। ଏହି ଅପରେସନ୍ ଅନ୍ତର୍ଗତ, ପିଓକେରେ ଥିବା ୯ ଟି ଆତଙ୍କବାଦୀ ଆଡ୍ଡାକୁ ଟାର୍ଗେଟ କରାଯାଇ ସମ୍ପୂର୍ଣ୍ଣ ଧ୍ୱଂସ କରାଯାଇଥିଲା। ଏହି ଆକ୍ରମଣରେ ୧୦୦ ରୁ ଅଧିକ ଆତଙ୍କବାଦୀ ନିହତ ହୋଇଥିଲେ। ଅପରେସନ ସିନ୍ଦୂର ପରେ, ପାକିସ୍ତାନ ନିରନ୍ତର ଡ୍ରୋନ୍ ଏବଂ ମିସାଇଲ୍ ସହିତ ଭାରତୀୟ ସହରଗୁଡ଼ିକ ଉପରେ ଆକ୍ରମଣ କରିଥିଲା, ଯାହାର ଭାରତୀୟ ସେନା ଉପଯୁକ୍ତ ଜବାବ ଦେଇଥିଲା।

ପରେ ପାକିସ୍ତାନର ଅସ୍ତ୍ରବିରତି ଆବେଦନ ପରେ, ମେ ୧୦ ସନ୍ଧ୍ୟାରେ ଦୁଇ ଦେଶ ମଧ୍ୟରେ ଏକ ଅସ୍ତ୍ରବିରତି ଚୁକ୍ତିନାମା ହୋଇଥିଲା । ତଥାପି, ସେତେବେଳକୁ ଭାରତୀୟ ସେନା ପାକିସ୍ତାନକୁ ବହୁତ କ୍ଷତି ପହଞ୍ଚାଇ ସାରିଥିଲା। ଭାରତୀୟ ସେନା ପାକିସ୍ତାନର ୧୧ଟି ବାୟୁସେନା ଘାଟିକୁ ସମ୍ପୂର୍ଣ୍ଣ ଧ୍ୱଂସ କରିଦେଛି । ଯାହାକୁ ପାକିସ୍ତାନ କାଳ କାଳ ପାଇଁ ମନେ ରଖିବ ବୋଲି କହିଛି ସେନା ।