ରୁଷ, ଜାପାନରେ ଭୂମିକମ୍ପ ସାଙ୍ଗକୁ ସୁନାମୀ: ପରାମର୍ଶ ଜାରି କଲା ଆମେରିକାରେ ଥିବା ଭାରତୀୟ କନସୁଲେଟ୍

ନୂଆଦିଲ୍ଲୀ: ଆଜି ଭୋରରୁ ରୁଷିଆର କାମଚାଟକା ଉପଦ୍ୱୀପ ନିକଟରେ ଏକ ଭୟଙ୍କର ଭୂମିକମ୍ପ ପରେ ରୁଷ, ଜାପାନ ସମେତ ଆମେରିକା, ବ୍ରାଜିଲକୁ ସୁନାମି ଚେତାବନୀ ଜାରି କରାଯାଇଥିଲା । ଆଉ ଏବେ ଭୟଙ୍କର ଭୂମିକମ୍ପ ପରେ ରୁଷ ଏବଂ ଜାପାନର ଅନେକ ଅଞ୍ଚଳରେ ସୁନାମି ତରଙ୍ଗ ଉଠିବା ଆରମ୍ଭ ହୋଇଛି । ଏହି ଭୂମିକମ୍ପର ତୀବ୍ରତା ରିକ୍ଟର ସ୍କେଲରେ ୮.୮ ମାପ କରାଯାଇଛି । ରୁଷ ଏବଂ ଜାପାନ ସହିତ, ଆମେରିକାର ହାୱାଇ, ଆଲାସ୍କା ଏବଂ କାନାଡାର ପଶ୍ଚିମ ଉପକୂଳରେ ମଧ୍ୟ ସୁନାମି ଚେତାବନୀ ଜାରି କରାଯାଇଛି । ରିପୋର୍ଟ ଅନୁସାରେ, ୮.୮ ତୀବ୍ରତାର ଭୂମିକମ୍ପ ପରେ, ରୁଷର କୁରିଲ ଦ୍ୱୀପପୁଞ୍ଜ ଏବଂ ଜାପାନର ବିଶାଳ ଉତ୍ତର ଦ୍ୱୀପ ହୋକାଇଡୋର ଉପକୂଳବର୍ତ୍ତୀ ଅଞ୍ଚଳରେ ସୁନାମି ଆସିଛି। ସୁନାମି ତରଙ୍ଗର ଅନେକ ଭିଡିଓ ସୋସିଆଲ ମିଡିଆରେ ମଧ୍ୟ ଭାଇରାଲ ହେଉଛି।

ଏହାକୁ ନେଇ ଏବେ ସତର୍କ ହୋଇଛି ଆମେରିକାରେ ଥିବା ଭାରତୀୟ କନସୁଲେଟ୍ । ଆମେରିକାର ସାନ ଫ୍ରାନ୍ସିସ୍କୋରେ ଥିବା ଭାରତୀୟ କନସୁଲେଟ୍ ଜେନେରାଲ୍ କାଲିଫର୍ନିଆ ଏବଂ ହାୱାଇର ପଶ୍ଚିମ ଉପକୂଳବର୍ତ୍ତୀ ରାଜ୍ୟଗୁଡ଼ିକରେ ରହୁଥିବା ଭାରତୀୟ ନାଗରିକମାନଙ୍କ ପାଇଁ ଏକ ପରାମର୍ଶ ଜାରି କରିଛି। ଭାରତୀୟ କନସୁଲେଟ୍ ଜେନେରାଲ କହିଛନ୍ତି ଯେ ଆମେ ରୁଷର କାମଚଟକା ଉପଦ୍ୱୀପରେ ସମ୍ଭାବ୍ୟ ସୁନାମିର ବିପଦ ଉପରେ ନଜର ରଖୁଛୁ। ଆମେରିକାର ପଶ୍ଚିମ ଉପକୂଳବର୍ତ୍ତୀ ରାଜ୍ୟଗୁଡ଼ିକରେ ରହୁଥିବା ଭାରତୀୟ ନାଗରିକମାନଙ୍କୁ ଭୂମିକମ୍ପ ଏବଂ ସୁନାମିର ବିପଦକୁ ଦୃଷ୍ଟିରେ ରଖି ଅନେକ ପଦକ୍ଷେପ ନେବାକୁ ପରାମର୍ଶ ଦିଆଯାଇଛି।

ଭାରତୀୟ ନାଗରିକଙ୍କ ପାଇଁ ଜାରି କରାଯାଇଥିବା ପରାମର୍ଶରେ କୁହାଯାଇଛି ଯେ ସ୍ଥାନୀୟ ସତର୍କତା ଅନୁସରଣ କରନ୍ତୁ। ଜରୁରୀକାଳୀନ ପରିଚାଳନା ଏବଂ ଆମେରିକା ସୁନାମି ଚେତାବନୀ କେନ୍ଦ୍ର ସମେତ ଆମେରିକୀୟ କର୍ତ୍ତୃପକ୍ଷଙ୍କ ଦ୍ୱାରା ଜାରି କରାଯାଇଥିବା ଚେତାବନୀ ଉପରେ କଡ଼ା ନଜର ରଖନ୍ତୁ। ସୁନାମି ଚେତାବନୀ ଜାରି ହେଲେ ଉଚ୍ଚ ସ୍ଥାନକୁ ଯାଆନ୍ତୁ। ଏଥିସହିତ ଆମେରିକାର ଉପକୂଳବର୍ତ୍ତୀ ଅଞ୍ଚଳକୁ ଯିବାରୁ ବଞ୍ଚିବା ପାଇଁ ଏକ ଅପିଲ୍ କରାଯାଇଛି। ଏହା ବ୍ୟତୀତ, ଯେକୌଣସି ପ୍ରକାରର ଜରୁରୀକାଳୀନ ପରିସ୍ଥିତି ପାଇଁ ପ୍ରସ୍ତୁତ ରହିବାକୁ ଏବଂ ସମସ୍ତ ଇଲେକ୍ଟ୍ରୋନିକ୍ ଡିଭାଇସ୍ ଚାର୍ଜ ରଖିବାକୁ କୁହାଯାଇଛି। ସାନ ଫ୍ରାନ୍ସିସ୍କୋରେ ଥିବା ଭାରତର କନସୁଲେଟ୍ ଜେନେରାଲ ଏକ ହେଲ୍ପଲାଇନ୍ ନମ୍ବର ମଧ୍ୟ ଜାରି କରିଛନ୍ତି, +୧-୪୧୫-୪୮୩-୬୬୨୯ । ଯାହା ଦ୍ବାରା ଭାରତୀୟମାନେ ତୁରନ୍ତ ସେମାନଙ୍କ ଅସୁବିଧା ଜଣାଇବାକୁ ପରାମର୍ଶ ଜାରି କରାଯାଇଛି ।