ନୂଆଦିଲ୍ଲୀ: ଭାରତୀୟମାନେ ଶୋଇବାକୁ ଅଧିକ ଭଲ ପାଆନ୍ତି ବୋଲି ଏକ ସର୍ଭେରୁ ଜଣାପଡିଛି । ଜାନୁଆରୀ ଏବଂ ଡିସେମ୍ବର ୨୦୧୯ ମଧ୍ୟରେ ୫୯୪୭ ଗ୍ରାମ ଏବଂ ୩୯୯୮ ସହରାଞ୍ଚଳରେ ଥିବା ୧୩୮୭୯୯ ଘରେ ଏନଏସଓ ଦ୍ୱାରା ଏହି ସର୍ଭେ କରାଯାଇଥିଲା । ଆଣ୍ଡାମାନ ଏବଂ ନିକୋବର ଦ୍ୱୀପପୁଞ୍ଜ ବ୍ୟତୀତ ସମଗ୍ର ଦେଶରେ ଏହି ସର୍ଭେ କରାଯାଇଥିଲା । ଏହି ସର୍ବେକ୍ଷଣର ଉଦ୍ଦେଶ୍ୟ ଥିଲା ଗ୍ରାମାଞ୍ଚଳ ଏବଂ ସହରାଞ୍ଚଳରେ ଲୋକମାନେ ଦିନକୁ କେତେ ସମୟ ନିଜ କାର୍ଯ୍ୟ ପାଇଁ ବିତାଉଛନ୍ତି । ସର୍ବେକ୍ଷଣର ଫଳାଫଳରୁ ବିଭିନ୍ନ ବିଭାଗ ଏବଂ ମନ୍ତ୍ରଣାଳୟ ନୀତି ନିର୍ଣ୍ଣୟ ପାଇଁ ଗୁରୁତ୍ୱପୂର୍ଣ୍ଣ ସୂଚନା ପାଇବେ ବୋଲି ଆଶା କରାଯାଉଛି ।
ସର୍ବେକ୍ଷଣ ଅନୁଯାୟୀ, ହାରାହାରି ପ୍ରତ୍ୟେକ ଭାରତୀୟ ୫୫୨ ମିନିଟ୍ କିମ୍ବା ୯.୨ ଘଣ୍ଟା ଶୋଇବାରେ ବିତାଇଥାନ୍ତି। ଗ୍ରାମାଞ୍ଚଳରେ ପୁରୁଷମାନେ ଖାଲି ସମୟରେ ହାରାହାରି ୫୫୪ ମିନିଟ୍ ଶୋଇଥିବାବେଳେ ମହିଳାମାନେ ୫୫୭ ମିନିଟ ଶୋଇଥିଲେ । ଏଥି ସହିତ, ଏହି ସର୍ଭେରେ ଗ୍ରାମ ତୁଳନାରେ ସହରରେ ଅନୁପାତ କମ୍ ଦେଖିବାକୁ ମିଳିଥିଲା । ସହରଗୁଡିକରେ, ପୁରୁଷମାନେ ଖାଲି ସମୟରେ ୫୩୪ ମିନିଟ୍ ଶୋଇବାରେ ବିତାଇଥିବାବେଳେ ମହିଳାମାନେ ୫୫୨ ମିନିଟ୍ ଶୋଇଥିଲେ।