ନୂଆଦିଲ୍ଲୀ: ଦେଶର ୨୮ଟି ରାଜ୍ୟ ଏବଂ ୩ଟି କେନ୍ଦ୍ରଶାସିତ ଅଞ୍ଚଳର ୪୦୯୨ ଜଣ ବିଧାୟକଙ୍କ ଆର୍ଥିକ ସତ୍ୟପାଠ ଅନୁଯାୟୀ, କିଛି ବିଧାୟକଙ୍କ ପାଖରେ ଶହ ଶହ କୋଟି ଟଙ୍କାର ସମ୍ପତ୍ତି ଅଛି। ଆସୋସିଏସନ୍ ଫର୍ ଡେମୋକ୍ରାଟିକ୍ ରିଫର୍ମସ୍ (ଏଡିଆର)ର ରିପୋର୍ଟ ଅନୁଯାୟୀ ଦେଶର ବିଧାୟକମାନଙ୍କ ସମ୍ପତ୍ତିରେ ବହୁତ ପାର୍ଥକ୍ୟ ରହିଛି।
ସାରା ଦେଶରେ ବିଧାୟକଙ୍କ ହାରାହାରି ସମ୍ପତ୍ତି ୧୫.୭ କୋଟି ଟଙ୍କା ହେବ। କିନ୍ତୁ ଏହି ସଂଖ୍ୟା ପ୍ରତ୍ୟେକ ରାଜ୍ୟରେ ଭିନ୍ନଭିନ୍ନ। ଆନ୍ଧ୍ର ପ୍ରଦେଶ ପ୍ରତ୍ୟେକ ବିଧାୟକଙ୍କ ହାରାହାରି ୬୫ କୋଟି ଟଙ୍କା ହେବ। ଏହା ପରେ କର୍ଣ୍ଣାଟକରେ ହାରାହାରି ସମ୍ପତ୍ତି ୬୩ କୋଟି ଟଙ୍କା ଏବଂ ମହାରାଷ୍ଟ୍ରରେ ଏହା ୪୩ କୋଟି ଟଙ୍କା। ଦେଶର ୧୬ଟି ରାଜ୍ୟ ଏବଂ କେନ୍ଦ୍ରଶାସିତ ଅଞ୍ଚଳର ବିଧାୟକଙ୍କ ହାରାହାରି ସମ୍ପତ୍ତି ୧୦ କୋଟି ଟଙ୍କାରୁ ଅଧିକ।
ସେହିପରି ତ୍ରିପୁରାର ବିଧାୟକମାନଙ୍କର ହାରାହାରି ସମ୍ପତ୍ତି ସବୁଠାରୁ କମ୍, ଯାହା ମାତ୍ର ୧ କୋଟି ଟଙ୍କା। ମିଜୋରାମରେ ଏହି ପରିମାଣ ୭ କୋଟି ଟଙ୍କା ଏବଂ ମଣିପୁରରେ ୩ କୋଟି ଟଙ୍କା।
ରିପୋର୍ଟ ଅନୁଯାୟୀ, ଦକ୍ଷିଣ ଭାରତର ବିଧାୟକମାନଙ୍କ ସମ୍ପତ୍ତି ସର୍ବାଧିକ। ଆନ୍ଧ୍ରପ୍ରଦେଶ ଏବଂ କର୍ଣ୍ଣାଟକରେ ଏହି ସଂଖ୍ୟା ୬୦ କୋଟିରୁ ଅଧିକ। ତେଲେଙ୍ଗାନା ବିଧାୟକଙ୍କ ହାରାହାରି ସମ୍ପତ୍ତି ୩୮ କୋଟି ଟଙ୍କା ହୋଇଥିଲା ବେଳେ ତାମିଲନାଡୁରେ ଏହା ୧୨ କୋଟି ଟଙ୍କା। ସେହିପରି, କେରଳ ରେ ବିଧାୟକମାନଙ୍କ ହାରାହାରି ସମ୍ପତ୍ତି ମାତ୍ର ୩ କୋଟି ଟଙ୍କା। ସବୁଠାରୁ ଧନୀ ବିଧାୟକ ଥିବା ରାଜ୍ୟ ମଧ୍ୟରେ ଗୁଜରାଟ, ହରିୟାଣା ଏବଂ ମହାରାଷ୍ଟ୍ର ମଧ୍ୟ ସାମିଲ ରହିଛି।
ଏହି ୪୦୯୨ ବିଧାୟକଙ୍କ ମୋଟ ସମ୍ପତ୍ତିର ପରିମାଣ ୭୩,୩୪୮ କୋଟି ଟଙ୍କା। ଏହି ପରିମାଣ ୨୦୨୩-୨୪ର ନାଗାଲ୍ୟାଣ୍ଡ, ତ୍ରିପୁରା ଏବଂ ମେଘାଳୟର ସମଗ୍ର ବଜେଟ୍ ଠାରୁ ଅଧିକ, ଯାହାର ପରିମାଣ ପ୍ରାୟ ୭୨,୦୦୦ କୋଟି ଟଙ୍କା। ଅପରପକ୍ଷରେ ଦଳଗୁଡ଼ିକ ମଧ୍ୟରେ ତେଲୁଗୁ ଦେଶମ ପାର୍ଟି (ଟିଡିପି)ର ବିଧାୟକମାନେ ସବୁଠାରୁ ଧନୀ। ୧୩୪ ଜଣ ବିଧାୟକଙ୍କ ହାରାହାରି ହିସାବରେ ତାଙ୍କର ସମ୍ପତ୍ତିର ମୂଲ୍ୟ ୬୮ କୋଟି ଟଙ୍କା। ୬୪୬ ଜଣ କଂଗ୍ରେସ ବିଧାୟକଙ୍କ ହାରାହାରି ସମ୍ପତ୍ତି ୨୬.୯ କୋଟି ଟଙ୍କା। ୧,୬୫୩ ଜଣ ବିଜେପି ବିଧାୟକଙ୍କ ହାରାହାରି ସମ୍ପତ୍ତି ୧୫.୯ କୋଟି ଟଙ୍କା।
ତେବେ ମହାରାଷ୍ଟ୍ରର ଘାଟକୋପର ପୂର୍ବର ବିଜେପି ବିଧାୟକ ପରାଗ ଶାହ ୩୩୮୩କୋଟି ଟଙ୍କାର ସମ୍ପତ୍ତି ସହିତ ଧନୀ ତାଲିକାର ଶୀର୍ଷରେ ଅଛନ୍ତି। ତାଙ୍କ ପରେ ଅଛନ୍ତି କର୍ଣ୍ଣାଟକ କଂଗ୍ରେସର ଡିକେ ଶିବକୁମାର, ଯାହାଙ୍କ ସମ୍ପତ୍ତିର ମୂଲ୍ୟ ୧,୪୧୩ କୋଟି ଟଙ୍କା। ତୃତୀୟ ସ୍ଥାନରେ ସ୍ୱାଧୀନ ବିଧାୟକ କେ.ଏଚ୍. ପୁଟ୍ଟାସ୍ୱାମୀ ଗୌଡା ଅଛନ୍ତି, ଯାହାଙ୍କ ସମ୍ପତ୍ତିର ମୂଲ୍ୟ ୧,୨୬୭ କୋଟି ଟଙ୍କା।
ସବୁଠାରୁ କମ୍ ସମ୍ପତ୍ତି ଥିବା ବିଧାୟକ ହେଉଛ୦ ପଶ୍ଚିମବଙ୍ଗ ବିଜେପି ବିଧାୟକ ନିର୍ମଳ କୁମାର ଧାରା। ଯାହାଙ୍କର ସମ୍ପତ୍ତି ମାତ୍ର ୧୭୦୦ ଟଙ୍କା। ତାଙ୍କ ପରେ ଆମ ଆଦମୀ ପାର୍ଟିର ପଞ୍ଜାବ ବିଧାୟକ ନରିନ୍ଦର ପାଲ ସିଂହ ସାୱନା, ଯାହାଙ୍କ ସମ୍ପତ୍ତିର ମୂଲ୍ୟ ୧୮,୦୦୦ ଟଙ୍କା। ସେହିପରି ଦଳର ଆଉ ଜଣେ ନେତା ତଥା ପଞ୍ଜାବର ସଙ୍ଗରୁ ବିଧାୟକ ନରିନ୍ଦର କୌର ଭରାଜଙ୍କର ସମ୍ପତ୍ତି ମାତ୍ର ୨୪,୦୦୦ ଟଙ୍କା ରହିଥିବା ରିପୋର୍ଟରୁ ଜଣାପଡିଛି।
Comments are closed.