୨୦୦୦ କିମି ଦୂରରୁ ବି ପୂରା ଧ୍ବଂସ କରିଦେବ ସହର, ଜାଣନ୍ତୁ କେତେ ମାରାତ୍ମକ ଇରାନର ଏହି ମିସାଇଲ…..

ନୂଆଦିଲ୍ଲୀ: ମଧ୍ୟପ୍ରାଚ୍ୟରେ ଘନାଉଛି ସଙ୍କଟ । ଇସ୍ରାଏଲ ସହିତ ବଢ଼ୁଥିବା ଉତ୍ତେଜନା ମଧ୍ୟରେ, ଏବେ ଇରାନ ତାର ମାରାତ୍ମକ ଯୁଦ୍ଧ ଅସ୍ତ୍ର ବ୍ୟବହାର କରିବା ଆରମ୍ଭ କରିଦେଇଛି । ଯାହା ବିଶେଷ ଭାବେ କୌଣସି ଦେଶ ଏବଂ ତାହାର ନାଗରିକଙ୍କ ପାଇଁ ଘାତକ ବୋଲି ପ୍ରମାଣିତ ହୁଏ । ଇରାନ ପ୍ରଥମ ଥର ପାଇଁ ଏହାର ସ୍ୱଦେଶୀ ବାଲିଷ୍ଟିକ୍ କ୍ଷେପଣାସ୍ତ୍ର ‘ସେଜିଲ୍’କୁ ଯୁଦ୍ଧରେ ଇସ୍ରାଏଲ ଉପରେ ନିକ୍ଷେପ କରିଛି। ଯାହାକୁ ଡ୍ୟାନ୍ସିଂ ମିସାଇଲ ବୋଲି ମଧ୍ୟ କୁହାଯାଏ । ‘ଅପରେସନ୍ ଟ୍ରୁ ପ୍ରମିଜ୍ ୩’ ଅଧୀନରେ, ଇସଲାମିକ୍ ରିଭୋଲ୍ୟୁସନାରୀ ଗାର୍ଡସ୍ କର୍ପସ୍ (IRGC) ଇସ୍ରାଏଲକୁ ଏକ ସ୍ପଷ୍ଟ ସାମରିକ ଏବଂ ରଣନୈତିକ ବାର୍ତ୍ତା ଭାବରେ ଏହି ଆକ୍ରମଣ କରିଛି। ସେଜିଲ୍ କ୍ଷେପଣାସ୍ତ୍ର କୌଣସି ସାଧାରଣ ଅସ୍ତ୍ର ନୁହେଁ। ଏହା ଏକ କଠିନ ଇନ୍ଧନ-ଆଧାରିତ ମଧ୍ୟମ ଦୂରଗାମୀ ବାଲିଷ୍ଟିକ୍ କ୍ଷେପଣାସ୍ତ୍ର (MRBM), ଯାହାର ପରିସର ୨୦୦୦ ରୁ ୨୫୦୦ କିଲୋମିଟର । ଅର୍ଥାତ୍, ଯଦି ଏହାକୁ ଇରାନର ନାଟାଞ୍ଜ ଭଳି ସହରରୁ ନିକ୍ଷେପ କରାଯାଏ, ତେବେ ଏହା ମାତ୍ର ୭ ମିନିଟ୍ ମଧ୍ୟରେ ଇସ୍ରାଏଲର ପ୍ରମୁଖ ସହର ତେଲ ଅଭିଭକୁ ଟାର୍ଗେଟ କରିପାରିବ ।

ଯୁଦ୍ଧରେ ପ୍ରଥମ ଥର ପାଇଁ ବ୍ୟବହୃତ ଏହି କ୍ଷପଣାସ୍ତ୍ରରେ ଇସ୍ରାଏଲୀ ସହରଗୁଡ଼ିକୁ ପ୍ରବଳ କ୍ଷତି ସହିଛି । ଇରାନ ପ୍ରଥମ ଥର ପାଇଁ ଇସ୍ରାଏଲ ବିରୁଦ୍ଧରେ ସେଜିଲ୍ କ୍ଷେପଣାସ୍ତ୍ର ବ୍ୟବହାର କରିଛି। ଦକ୍ଷିଣ ଇସ୍ରାଏଲୀ ସହର ବେରଶେବାରେ ଏହି କ୍ଷେପଣାସ୍ତ୍ର ଆକ୍ରମଣ ବହୁତ କ୍ଷତି କରିଥିଲା। ଆବାସିକ କୋଠା ବ୍ୟତୀତ, ହସ୍ପିଟାଲଗୁଡ଼ିକୁ ମଧ୍ୟ ଟାର୍ଗେଟ କରାଯାଇଥିଲା। ଇରାନ ତେଲ ଅଭିଭ ନିକଟରେ ଅନ୍ୟ ଦୁଇଟି କ୍ଷେପଣାସ୍ତ୍ର ସାହାଯ୍ୟରେ ଏହି ଆକ୍ରମଣ କରିଥିଲା। ସେହି ସମୟରେ, ଭାରତରେ ଥିବା ଇରାନୀ ଦୂତାବାସ ଏହାର ଏକ୍ସ ଆକାଉଣ୍ଟରେ ଏକ ପୋଷ୍ଟ ସେୟାର କରି କହିଛି ଯେ ସେଜିଲ୍ କ୍ଷେପଣାସ୍ତ୍ର ହେଉଛି ଇରାନର ଏକ ଶକ୍ତିଶାଳୀ ଅସ୍ତ୍ର ଯାହା ଦୂର ଦୂରାନ୍ତରୁ ମଧ୍ୟ ଲକ୍ଷ୍ୟଭେଦ କରିବାର କ୍ଷମତା ରଖେ।

ତେବେ ୩୫ ବର୍ଷ ପୂର୍ବେ, ଇରାନ ନିଜେ ସେଜିଲ୍ କ୍ଷେପଣାସ୍ତ୍ର ବିକଶିତ କରିଥିଲା। ଏହାର ପ୍ରଥମ ସଫଳ ପରୀକ୍ଷଣ ୧୩ ନଭେମ୍ବର ୨୦୦୮ ରେ ହୋଇଥିଲା । ସମ୍ପୂର୍ଣ୍ଣ ସ୍ୱଦେଶୀ ପ୍ରଯୁକ୍ତିବିଦ୍ୟାରେ ନିର୍ମିତ ଏହି କ୍ଷେପଣାସ୍ତ୍ରର ସବୁଠାରୁ ବଡ଼ ବୈଶିଷ୍ଟ୍ୟ ହେଉଛି ଯେ କଠିନ ଇନ୍ଧନ ଯୋଗୁଁ ଏହାକୁ ତୁରନ୍ତ ଲଞ୍ଚ କରାଯାଇପାରିବ ଏବଂ ଲୁଚାଇବା ସହଜ। ଏହାର ପରିସର ପ୍ରାୟ ୨୦୦୦ ରୁ ୨୫୦୦ କିଲୋମିଟର। ଏହି କ୍ଷେପଣାସ୍ତ୍ର ୫୦୦ ରୁ ୭୦୦ କିଲୋଗ୍ରାମ ବିସ୍ଫୋରକ ବହନ କରିବାର କ୍ଷମତା ରଖେ, ଅର୍ଥାତ୍ ଏହାର ପରମାଣୁ ଅସ୍ତ୍ର ବହନ କରିବାର ସମ୍ଭାବ୍ୟ କ୍ଷମତା ଅଛି। ଏହାର ଗତି ପ୍ରାୟ ୬୦୦୦ କିଲୋମିଟର ପ୍ରତି ଘଣ୍ଟା ବୋଲି କୁହାଯାଉଛି । ଏହା ତାଠୁ ବି ଅଧିକ ହୋଇପାରେ ବୋଲି କେତେକ ରିପୋର୍ଟରେ ଦାବି କରାଯାଇଛି ।

୧୦ ମିଟର ବ୍ୟାସାର୍ଦ୍ଧ ମଧ୍ୟରେ ଲକ୍ଷ୍ୟଭେଦ କରିବାର କ୍ଷମତା ମଧ୍ୟ ଏହାର ବୈଶିଷ୍ଟ୍ୟରେ ଅନ୍ତର୍ଭୁକ୍ତ। ରୋଡ୍-ମୋବାଇଲ୍ ଏବଂ ଭର୍ଟିକାଲ୍ ଲଞ୍ଚ ସିଷ୍ଟମ୍ ଏହାକୁ ଚଳପ୍ରଚଳ ଏବଂ ରାଡାରକୁ ଏଡାଇବାରେ ସକ୍ଷମ କରିଥାଏ। ଏହା ଇସ୍ରାଏଲର ଆଇରନ ଡୋମ୍ ପରି ଯେକୌଣସି କ୍ଷେପଣାସ୍ତ୍ର ପ୍ରତିରକ୍ଷା ପ୍ରଣାଳୀକୁ ଏଡାଇବାରେ ସାହାଯ୍ୟ କରେ। ଇରାନ ଦାବି କରେ ଯେ ଏହା ସମ୍ପୂର୍ଣ୍ଣ ସ୍ୱଦେଶୀ ପ୍ରଯୁକ୍ତିବିଦ୍ୟାରେ ନିର୍ମିତ, ଯଦିଓ ଏହାର କିଛି ବୈଶିଷ୍ଟ୍ୟ ରୁଷିଆର ଇସ୍କନ୍ଦର କ୍ଷେପଣାସ୍ତ୍ର ସହିତ ମିଶିଥାଏ ।

ଇସ୍ରାଏଲ ଦାବି କରିଛି ଯେ ଏହାର ପ୍ରତିରକ୍ଷା ବାହିନୀ (IDF) ଏହି କ୍ଷେପଣାସ୍ତ୍ରକୁ ସଫଳତାର ସହ ପ୍ରତିହତ କରିଛି। ଏହା ସତ୍ତ୍ୱେ, ସେଜିଲ୍ ବ୍ୟବହାର ଏକ ସ୍ପଷ୍ଟ ସଙ୍କେତ ଯେ ଇରାନ ଆଉ ସଂଘର୍ଷରେ ଏହାର ରଣନୈତିକ ଅସ୍ତ୍ରଶସ୍ତ୍ରକୁ ସାମିଲ କରିବାରୁ ନିବୃତ୍ତ ରହୁନାହିଁ। ବିଶ୍ଳେଷକମାନେ ବିଶ୍ୱାସ କରନ୍ତି ଯେ ସେଜିଲ୍ କ୍ଷେପଣାସ୍ତ୍ରର ବ୍ୟବହାର କେବଳ ମଧ୍ୟପ୍ରାଚ୍ୟର ରଣନୈତିକ ସ୍ଥିରତାକୁ ଚ୍ୟାଲେଞ୍ଜ କରେ ନାହିଁ, ବରଂ ବଡ଼ ଶକ୍ତିଗୁଡ଼ିକୁ ସେମାନଙ୍କର ସୁରକ୍ଷା ନୀତିର ପୁନର୍ବିଚାର କରିବାକୁ ବାଧ୍ୟ କରିପାରିବ। ଯାହା ଆଗକୁ ଇରାନ ଇସ୍ରାଏଲ ଯୁଦ୍ଧକୁ ଆହୁରି ଭୟଙ୍କର କରିବା ନେଇ ଆଶଙ୍କା ।