Iran’s Navy Chief: ଇସ୍ରାଏଲର ବଡ଼ ଦାବି:ହୋର୍ମୁଜ୍ ପ୍ରଣାଳୀ ବନ୍ଦ କରିଥିବା IRGC ନୌସେନା ମୁଖ୍ୟ ନିହତ
ନୂଆଦିଲ୍ଲୀ: ମଧ୍ୟପ୍ରାଚ୍ୟରେ ଚାଲିଥିବା ଯୁଦ୍ଧ ମଧ୍ୟରେ ଇସ୍ରାଏଲ ଏକ ବଡ଼ ଦାବି କରିଛି। ଜଣେ ଇସ୍ରାଏଲୀ ସାମରିକ ଅଧିକାରୀଙ୍କ ଅନୁଯାୟୀ, ବନ୍ଦର ଆବାସରେ ହୋଇଥିବା ଆକ୍ରମଣରେ ଇରାନର IRGC ନୌସେନା ମୁଖ୍ୟ ଆଲିରେଜା ତାଙ୍ଗସିରିଙ୍କ(Alireza Tangsiri) ମୃତ୍ୟୁ ହୋଇଛି। ଇସ୍ରାଏଲୀ ଅଧିକାରୀ କହିଛନ୍ତି ଯେ ଆଲିରେଜା ତାଙ୍ଗସିରି ହୋର୍ମୁଜ୍ ପ୍ରଣାଳୀ ବନ୍ଦ କରିବା ପାଇଁ ଦାୟୀ ଥିଲେ।
ଇରାନ ଯୁଦ୍ଧ ଯୋଗୁଁ, ଗତ ୨୦ ଦିନ ଧରି ହୋର୍ମୁଜ୍ ପ୍ରଣାଳୀ ପ୍ରାୟ ବନ୍ଦ ହୋଇଯାଇଛି, ଯାହା ଯୋଗୁଁ ସମଗ୍ର ବିଶ୍ୱରେ ଅସ୍ଥିରତା ଦେଖାଦେଇଛି ।
ଏପଟେ ଇରାନ ଇସ୍ରାଏଲୀ ସାମରିକ ଆକ୍ରମଣ କିମ୍ବା ଆଲିରେଜା ତାଙ୍ଗସିରିଙ୍କ ମୃତ୍ୟୁ ସମ୍ପର୍କରେ କୌଣସି ବିବୃତ୍ତି ଜାରି କରିନାହିଁ।
ଟାଇମ୍ସ ଅଫ୍ ଇସ୍ରାଏଲ ଅନୁଯାୟୀ, ବନ୍ଦର ଆବାସରେ ହୋଇଥିବା ଆକ୍ରମଣରେ ଆଲିରେଜା ତାଙ୍ଗସିରିଙ୍କ ମୃତ୍ୟୁ ହୋଇଥିଲା। ଗୁପ୍ତ ସୂଚନା ଆଧାରରେ ଇସ୍ରାଏଲ ଏହି କାର୍ଯ୍ୟାନୁଷ୍ଠାନ କରିଥିଲା। ଇସଲାମିକ୍ ରିଭୋଲ୍ୟୁସନରୀ ଗାର୍ଡ କର୍ପସ ଏହି ଘଟଣା ଉପରେ କୌଣସି ମନ୍ତବ୍ୟ ଦେଇନାହିଁ।
ଅଗଷ୍ଟ ୨୦୧୮ ଠାରୁ IRGC ନୌସେନାର ନେତୃତ୍ୱ ନେଉଥିବା ତାଙ୍ଗସିରି ଗତ ସପ୍ତାହରେ ଉପସାଗର ଦେଶଗୁଡ଼ିକରେ ଥିବା ଆମେରିକୀୟ ଘାଟି ବିରୁଦ୍ଧରେ ପ୍ରତିଶୋଧମୂଳକ ଆକ୍ରମଣ ଧମକ ଦେଇଥିଲେ, ସାଧାରଣ ନାଗରିକ ଏବଂ କର୍ମଚାରୀମାନଙ୍କୁ ଏହି ଅଞ୍ଚଳରୁ ଦୂରେଇ ରହିବାକୁ ଚେତାବନୀ ଦେଇଥିଲେ।
ତାଙ୍ଗସିରିଙ୍କ ହତ୍ୟା ପରେ, ପ୍ରଶ୍ନ ଉଠାଯାଉଛି: କ’ଣ କେବେ ହୋର୍ମୁଜ୍ ପ୍ରଣାଳୀ ସମସ୍ତଙ୍କ ପାଇଁ ଖୋଲାଯାଇପାରିବ? ତାଙ୍ଗସିରିଙ୍କୁ ହୋର୍ମୁଜ୍ ପ୍ରଣାଳୀ ବନ୍ଦ କରିବା ପଛରେ ମାଷ୍ଟରମାଇଣ୍ଡ ବୋଲି ବିବେଚନା କରାଯାଉଥିଲା। ଇସ୍ରାଏଲ ଜାନୁଆରୀ ୨୦୨୬ରେ ମଧ୍ୟ ତାଙ୍ଗସିରିଙ୍କୁ ହତ୍ୟା କରିବାକୁ ଚେଷ୍ଟା କରିଥିଲା, କିନ୍ତୁ ସେ ଇସ୍ରାଏଲୀ ଆକ୍ରମଣରୁ ବଞ୍ଚି ଯାଇଥିଲେ।
ତାଙ୍ଗସିରି ଇରାନର ଲୋକପ୍ରିୟ କମାଣ୍ଡର କାସିମ ସୋଲେମାନି ଏବଂ ପୂର୍ବତନ ସର୍ବୋଚ୍ଚ ନେତା ଅୟତୁଲ୍ଲା ଅଲି ଖାମେନେଇଙ୍କ ନିକଟତର ବୋଲି କୁହାଯାଏ ।