ବ୍ରହ୍ମପୁର: ମାଁ ମଶାଣୀରେ ଜଳୁଛି ଜୁଇ । ଏ ଜୁଇର ଲେଲିହାନ ନିଆଁ ଖାଲି ଜଣେ ସହୀଦ ଯବାନଙ୍କ ଶରୀରକୁ ଜାଳି ଦେଉନି, ଏ ଜୁଇରେ ଜଳି ଯାଉଛି ବୃଦ୍ଧ ମା’ର ମମତା, କୁନି ପୁଅଟିର ଆଶା ଓ ଭରସା, ଜଳି ଯାଉଛି ପ୍ରାଣ ଦେଇ ଭଲ ପାଉଥିବା ପତ୍ନୀର ଆଶ୍ୱାସନା, ଅପେକ୍ଷା । ଛାତି ପିଟ କାନ୍ଦୁଛି ମା’.. କୁଆଡେ ଗଲା ମୋ ପୁଅ ବୋଲି କହି ବିକଳ ହେଉଛି । ପ୍ରାଣପ୍ରିୟା ପତ୍ନୀ ଯାହାର ଆସିବା ବାଟକୁ ଅପେକ୍ଷା କରି ଯନ୍ତ୍ରଣାକୁ ପିଇ ଯାଉଥିଲା..ସେ ଅପେକ୍ଷା ତାର ଆଜି ଶେଷ ହୋଇ ଯାଇଛି । କୁନି ପୁଅଟି ମଥାରୁ ସବୁଦିନ ପାଇଁ ହଟିଯାଇଛି ବାପାର ହାତ ।
ସହିଦଙ୍କ ବିୟୋଗରେ କାନ୍ଦୁଛି ସାରା ଗାଁ । ଏହି କେଇ ଦିନ ତଳେ ଜାନୁଆରୀ 26 ପେରଡ଼ରେ ସାମିଲ ହୋଇଥିଲେ । ହେଲେ ଆଜି ଆଉ ନାହାନ୍ତି । ଗଞ୍ଜାମ ଜିଲ୍ଲା ଧରାକୋଟ ଜଗମୋହନ ଗ୍ରାମରେ ଯବାନ ସୌଦାଗର ବିଶ୍ୱାଳ। ଦେଢ଼ ମାସର ପୁଅକୁ ଦେଖିବା ପାଇଁ ନିଜ ଗାଁ ଜଗମୋହନ କୁ ଫେରୁଥିଲେ ସୌଦାଗର । କିନ୍ତୁ ସେ ସ୍ୱପ୍ନ ସବୁ ତାଙ୍କରି ଅଧୁରା ରହିଗଲା । ଟ୍ରେନ ଯାତ୍ରା ବେଳେ ଛତିଶଗଡ଼ର ଦନ୍ତେୱାଡା ଠାରେ ତାଙ୍କର ହୃଦଘାତ ହୋଇ ମୃତ୍ୟୁ ଘଟିଛି। ସେ ଗାଁକୁ ଫେରିଲେ ସତ, କିନ୍ତୁ ଶବ ହୋଇ ।
ଗାଁର ରଘୁନାଥ ବିଶ୍ୱାଳଙ୍କ ସାନ ପୁଅ ସୌଦାଗର ବିଶ୍ୱାଳ। ୨୦୧୩ ରେ ସେ ରେଳ ବିଭାଗର ସ୍ୱତନ୍ତ୍ର ସୁରକ୍ଷା ଫୋର୍ସର କନେଷ୍ଟବଳ ଭାବେ କାମ କରୁଥିଲେ। ସେ ବର୍ତ୍ତମାନ ଛତିଶଗଡ଼ କାମରୁଲରେ କାଯ୍ୟରତ ଥିଲେ । ଗତ ୨୭ ତାରିଖରେ ସେ ଗ୍ରାମକୁ ଆସିବା ପାଇଁ ଟ୍ରେନରେ ବସିଥିଲେ । ହେଲେ ଘରେ ପହଞ୍ଚିବା ପର୍ଯ୍ୟନ୍ତ ଯେମିତି ଫୁରସତ ଦେଲାନି ଯମ । ଦନ୍ତେବାଡା ଷ୍ଟେସନରେ ଟ୍ରେନ ଉପରେ ହଠାତ ଅସୁସ୍ଥ ହୋଇ ପଡ଼ିଥିଲେ। ପରେ ତାଙ୍କୁ ନିକଟରେ ଥିବା ଗିଦମ ହସ୍ପିଟାଲକୁ ନିଆ ଯାଇଥିଲା । ସେଠାରେ ତାଙ୍କର ହୃଦଘାତରେ ମୃତ୍ୟୁ ହୋଇଥିବା ଡକ୍ଟର ଘୋଷଣା କରିଥିଲେ।
ସୌଦାଗରଙ୍କ ବାପା ରଘୁନାଥ ପୂର୍ବରୁ ଦେହାନ୍ତ ହୋଇ ସାରିଛି। ବିଧବା ମା , ସ୍ତ୍ରୀ ଓ ଦେଢ଼ ମାସର ପୁତ୍ର ସନ୍ତାନଙ୍କୁ ନେଇ ତାଙ୍କ ଛୋଟ ପରିବାର। ସୌଦାଗରଙ୍କ ମୃତ୍ୟୁରେ ନିଷ୍ପପ ଶିଶୁ ବାପାକୁ ହାଇଛି। ସ୍ତ୍ରୀ ଅସହାୟ ହୋଇଛି , ମା ର କୋଳ ଶୂନ୍ୟ ପାଲଟିଛ। ପରିବାରର ଭବିଷ୍ୟତ ଏବେ ଅନ୍ଧାରକୁ ଠେଲି ହୋଇଯାଛି। ଅନ୍ୟପଟେ ସୌଦାଗର ଗ୍ରାମର ଜଣେ ମିଷ୍ଟଭାସି, ମେଳାପୀ ହୋଇଥିବାରୁ ଝୁରୁଛନ୍ତି ଏବେ ଗ୍ରାମବାସୀ।
