Jeep Fell Mountain: ଶହେ ମିଟର ଘାଟି ରାସ୍ତାରୁ ତଳକୁ ଖସିଲା ଜିପ୍, ୨ ଭାରତୀୟଙ୍କ ସମେତ ୬ ମୃତ
କାଠମାଣ୍ଡୁ: ନେପାଳର ମକୱାନପୁର ଜିଲ୍ଲାରେ ଏକ ଭୟଙ୍କର ସଡ଼କ ଦୁର୍ଘଟଣା ଘଟିଛି । ଏକ ଜିପ୍ ରେ ନଅ ଜଣ ଯାତ୍ରା କରୁଥିବା ବେଳେ ପାହାଡ଼ି ରାସ୍ତାରୁ ୧୦୦ ମିଟର ତଳକୁ ଏକ ଘାଟିରେ ଖସି ପଡ଼ିଥିଲା । ଏଥିରେ ଦୁଇ ଜଣ ଭାରତୀୟଙ୍କ ସମେତ ଛଅ ଜଣଙ୍କର ମୃତ୍ୟୁ ହୋଇଛି ।
ଘଟଣାଟି ଶନିବାର ରାତିରେ ଘଟିଥିବା ଜଣାପଡ଼ିଛି । ଦୁର୍ଘଟଣା ସମୟରେ ଜିପ୍ରେ ପ୍ରାୟ ନଅ ଜଣ ଥିଲେ । ପୋଲିସ ଆହତ ତିନି ଜଣଙ୍କୁ ଉଦ୍ଧାର କରି ସ୍ଥାନୀୟ ହସ୍ପିଟାଲରେ ଭର୍ତ୍ତି କରିଛି ।
ପୋଲିସ କହିଛି ଯେ, ଦୁର୍ଘଟଣା ସମୟରେ ଗାଡିଟି କାଠମାଣ୍ଡୁରୁ ହେଟୌଡା ଅଭିମୁଖେ ଯାତ୍ରା କରୁଥିଲା । ମୃତକଙ୍କ ମଧ୍ୟରୁ ଚାରି ଜଣଙ୍କୁ ଚିହ୍ନଟ କରାଯାଇଛି, ସେମାନଙ୍କ ମଧ୍ୟରୁ ଦୁଇଜଣ ଭାରତୀୟ ନାଗରିକ । ବିହାରର ମୂଳ ବାସିନ୍ଦା ଭାରତୀୟ ନାଗରିକଙ୍କ ନାମ ରଜନୀଶ କୁମାର ଏବଂ ଅରବିନ୍ଦ କୁମାର ବୋଲି ଚିହ୍ନଟ କରାଯାଇଛି । ସେମାନେ କାମ ପାଇଁ ନେପାଳ ଯାତ୍ରା କରୁଥିବା ଜଣାପଡିଛି । ନେପାଳ ପୋଲିସ ସେମାନଙ୍କ ପରିବାରକୁ ସୂଚନା ଦେଇଛି । ପୋଲିସ ଅନୁସାରେ, ଦୁର୍ଘଟଣାର କାରଣ ଏପର୍ଯ୍ୟନ୍ତ ଜଣାପଡିନାହିଁ ।
ଜିଲ୍ଲା ପୋଲିସ କାର୍ଯ୍ୟାଳୟ, ମକୱାନପୁରର ମୁଖପାତ୍ର ଡେପୁଟି ପୋଲିସ ସୁପରିଣ୍ଟେଣ୍ଡେଣ୍ଟ (ଡିଏସପି) ପୁଷ୍କର ବୋଗଟିଙ୍କ ଅନୁଯାୟୀ, ଜିପ୍ରେ ୬ ଜଣ ପୁରୁଷ, ଜଣେ ମହିଳା ଏବଂ ଦୁଇ ଜଣ ଛୋଟ ପିଲା ଥିଲେ । ଦୁର୍ଘଟଣା ପରେ ତୁରନ୍ତ ସମସ୍ତ ଆହତଙ୍କୁ ହେଟୌଣ୍ଡା ଡାକ୍ତରଖାନାକୁ ନିଆଯାଇଥିଲା, ସେଠାରେ ଚିକିତ୍ସା ସମୟରେ ୬ ଜଣଙ୍କର ମୃତ୍ୟୁ ହୋଇଥିଲା । ଆହତଙ୍କ ମଧ୍ୟରୁ ତିନି ଜଣ ବର୍ତ୍ତମାନ ହେଟୌଣ୍ଡା ଡାକ୍ତରଖାନାରେ ଚିକିତ୍ସାଧୀନ ଅଛନ୍ତି, ସେମାନଙ୍କ ମଧ୍ୟରୁ ଦୁଇଜଣଙ୍କ ଅବସ୍ଥା ସ୍ଥିର ଥିବା ଜଣାପଡ଼ିଛି । ପୋଷ୍ଟମର୍ଟମ ପାଇଁ ସମସ୍ତ ମୃତଦେହକୁ ହେଟୌଣ୍ଡା ଅଣାଯାଇଛି । ଦୁର୍ଘଟଣାର କାରଣ ଜାଣିବା ପାଇଁ ତଦନ୍ତ ଆରମ୍ଭ ହୋଇଛି ।