ଶପଥ ନେଲେ ଓଡ଼ିଶା ହାଇକୋର୍ଟଙ୍କ ୨ ନୂଆ ବିଚାରପତି

କଟକ: ଓଡ଼ଶା ହାଇକୋର୍ଟରେ ଦୁଇ ଜଣ ନୂଆ ବିଚାରପତି ଭାବରେ ଆଜି ଶପଥ ନେଇଛନ୍ତି । ଜଷ୍ଟିସ୍ ଯଶୋବନ୍ତ ସିଂହ ଓ ଜଷ୍ଟିସ୍ ଅରିନ୍ଦମ ସିହ୍ନା ଶପଥ ଗ୍ରହଣ କରିଛନ୍ତି । ମୁଖ୍ୟ ବିଚାରପତି ଜଷ୍ଟିସ୍ ଏସ୍. ମୁରଲୀଧର ସେମାନଙ୍କୁ ହାଇକୋର୍ଟ ସମ୍ମିଳନୀ କକ୍ଷରେ ଶପଥ ପାଠ କରାଇଥିଲେ । ପଞ୍ଜାବ ହରିୟାଣା ହାଇକୋର୍ଟରୁ ବଦଳି ହୋଇ ଜଷ୍ଟିସ ଯଶୋବନ୍ତ ସିଂ ଆସିଥିବା ବେଳେ କଲିକତା ହାଇକୋର୍ଟରୁ ବଦଳି ହୋଇ ଆସିଛନ୍ତି ଜଷ୍ଟିସ ଅରିନ୍ଦମ ସିହ୍ନା । ଏମାନେ ଦାୟିତ୍ୱଗ୍ରହଣ କରିବା ପରେ ଓଡ଼ିଶା ହାଇକୋର୍ଟରେ ବିଚାରପତିଙ୍କ ସଂଖ୍ୟା ୧୪କୁ ବୃଦ୍ଧି ପାଇଛି ।
ଜଷ୍ଟିସ ଯଶୋବନ୍ତ ସିଂ ୧୯୬୧, ଫେବୃଆରୀ ୨୩ ତାରିଖରେ ହରିୟାଣା ରୋହତକରେ ଜନ୍ମଗ୍ରହଣ କରିଥିଲେ । ରୋହତକର ମହର୍ଷି ଦୟାନନ୍ଦ ବିଶ୍ୱବିଦ୍ୟାଳୟରୁ ଆଇନ ଡିଗ୍ରୀ ହାସଲ କରିଥିଲେ । ୧୯୮୮ରେ ସୀର୍ସା ଜିଲ୍ଲା କୋର୍ଟରେ ଓକିଲାତି କ୍ୟାରିୟର ଆରମ୍ଭ କରିଥିଲେ । ୧୯୯୧ରେ ସେ ପଞ୍ଜାବ ହରିୟାଣା ହାଇକୋର୍ଟରେ ଓକିଲାତି ଆରମ୍ଭ କରିଥିଲେ । ପରେ ସେଠାରେ ସରକାରୀ ଓକିଲ ଭାବେ ଦୀର୍ଘ ଦିନ କାମ କରିଥିଲେ ଜଷ୍ଟିସ ଯଶୋବନ୍ତ ସିଂ । ୨୦୦୭, ଡିସେମ୍ବର ୫ ତାରିଖରେ ପଞ୍ଜାବ ହରିୟାଣା ହାଇକୋର୍ଟର ବିଚାରପତି ଭାବେ ଶପଥ ନେଇଥିଲେ ।
ଜଷ୍ଟିସ ଅରିନ୍ଦମ ସିହ୍ନା ୧୯୬୫, ସେପ୍ଟେମ୍ବର ୨୨ ତାରିଖରେ ପଶ୍ଚିମବଙ୍ଗରେ ଜନ୍ମଗ୍ରହଣ କରିଥିଲେ । ଆଇନ ଶିକ୍ଷା ଶେଷ କରିବା ପରେ ୧୯୯୧ ମସିହାରେ କଲିକାତା ହାଇକୋର୍ଟରେ ଆରମ୍ଭ କରିଥିଲେ ଓକିଲାତି । ୨୦୧୩, ଅକ୍ଟୋବର ୩୦ରେ କଲିକତା ହାଇକୋର୍ଟରେ ଅତିରିକ୍ତ ବିଚାରପତି ଭାବେ ଦାୟିତ୍ୱ ଗ୍ରହଣ କରିଥିଲେ । ୨୦୧୬, ମାର୍ଚ୍ଚ ୧୪ ତାରିଖରୁ କଲିକତା ହାଇକୋର୍ଟର ସ୍ଥାୟୀ ବିଚାରପତି ଭାବକେ କାର୍ୟ୍ୟ ସମ୍ପାଦକ କରି ଆସୁଥିଲେ ଜଷ୍ଟିସ ଅରିନ୍ଦମ ସିହ୍ନା ।