ଇନ୍ଦୋର ଦୂଷିତ ପାଣି ଟ୍ରାଜେଡି: ଗଣମାଧ୍ୟମର ପ୍ରଶ୍ନରେ ରାଗିଯାଇ କହଲେ ଅପଶବ୍ଦ, ବିବାଦ ବଢ଼ିବା ପରେ କ୍ଷମା ମାଗିଲେ କୈଳାସ ବିଜୟବର୍ଗୀୟ

ଇନ୍ଦୋର: ଇନ୍ଦୋରରେ ଦୂଷିତ ପାଣି ପିଇବା ଯୋଗୁଁ ୧୦ ଜଣଙ୍କ ମୃତ୍ୟୁ ଘଟିଛି। ଆଉ କିଛି ଲୋକେ ଏବେ ବି ଅସୁସ୍ଥ ଅଛନ୍ତି। ଏହି ଘଟଣା ଏବେ ଇନ୍ଦୋର ସହର ଏବଂ ସାରା ଦେଶ ପାଇଁ ଏକ ଚିନ୍ତାର କାରଣ ପାଲଟିଛି। ଏହାରି ଭିତରେ ଗଣମାଧ୍ୟମ ମଧ୍ୟପ୍ରଦେଶର ନଗର ଉନ୍ନୟନ ଏବଂ ଗୃହନିର୍ମାଣ ମନ୍ତ୍ରୀ କୈଳାସ ବିଜୟବର୍ଗୀୟଙ୍କୁ ଏହି ଦୂଷିତ ପାଣି ସମ୍ପର୍କରେ କିଛି ପ୍ରଶ୍ନ ପଚାରିଥିଲେ ଯାହାକୁ ଉତ୍ତର ନ ଦେବା ବଦଳରେ ସେ କ୍ରୋଧିତ ହୋଇଥିଲେ। ଯାହାକୁ ନେଇ ଏବେ ସେ କ୍ଷମା ପ୍ରାର୍ଥନା କରିଛନ୍ତି।

କୈଳାସ ବିଜୟବର୍ଗୀୟଙ୍କ ବୟାନକୁ ନେଇ ସୃଷ୍ଟି ହୋଇଥିବା ବିବାଦ ପରେ ସେ ସୋସିଆଲ ମିଡିଆ ପ୍ଲାଟଫର୍ମ X ରେ ପୋଷ୍ଟ କରି କହିଛନ୍ତି ଯେ ସେ ଗଣମାଧ୍ୟମର ଏକ ପ୍ରଶ୍ନର ଭୁଲ ବ୍ୟାଖ୍ୟା ପାଇଁ ଦୁଃଖିତ। ବିଜୟବର୍ଗୀୟ ଲେଖିଛନ୍ତି, “ମୁଁ ଏବଂ ମୋର ଦଳ ଗତ ଦୁଇ ଦିନ ଧରି ପ୍ରଭାବିତ ଅଞ୍ଚଳର ପରିସ୍ଥିତିକୁ ସୁଧାରିବା ପାଇଁ ଅନିଦ୍ରା ଅକ୍ଲାନ୍ତ ପରିଶ୍ରମ କରିଛୁ। ମୋର ଲୋକମାନେ ଦୂଷିତ ପାଣିରେ ପୀଡିତ ଅଛନ୍ତି, ଏବଂ କିଛି ଲୋକ ଆମକୁ ଛାଡି ଚାଲିଯାଇଛନ୍ତି। ଏହି ଗଭୀର ଦୁଃଖର ଅବସ୍ଥାରେ, ମୁଁ ଗଣମାଧ୍ୟମର ଏକ ପ୍ରଶ୍ନର ଭୁଲ ବ୍ୟାଖ୍ୟା କରିଥିଲି। ମୁଁ ଏଥିପାଇଁ କ୍ଷମା ପ୍ରାର୍ଥନା କରୁଛି। କିନ୍ତୁ ମୋ ଲୋକମାନେ ସମ୍ପୂର୍ଣ୍ଣ ନିରାପଦ ଏବଂ ସୁସ୍ଥ ନହେବା ପର୍ଯ୍ୟନ୍ତ ମୁଁ ବିଶ୍ରାମ ନେବି ନାହିଁ।”

ଦୂଷିତ ପାଣି ଘଟଣା କ’ଣ?
ପ୍ରକୃତରେ, ଦେଶର ସବୁଠାରୁ ସ୍ୱଚ୍ଛ ସହର ଇନ୍ଦୋରର ଭାଗୀରଥପୁରା ଅଞ୍ଚଳରେ ଦୂଷିତ ପାନୀୟ ଜଳ ଯୋଗୁଁ ଡାଇରିଆ ବ୍ୟାପିବା ପରେ ଏପର୍ଯ୍ୟନ୍ତ ୧୦ ଜଣଙ୍କର ମୃତ୍ୟୁ ହୋଇଛି। ୨୧୨ ଜଣଙ୍କୁ ବିଭିନ୍ନ ହସ୍ପିଟାଲରେ ଭର୍ତ୍ତି କରାଯାଇଛି। ଏଥିମଧ୍ୟରୁ ୫୦ ରୋଗୀଙ୍କୁ ଚିକିତ୍ସା ପରେ ଡିସଚାର୍ଜ କରାଯାଇଛି। ଭାଗୀରଥପୁରା ଅଞ୍ଚଳ ବିଜୟବର୍ଗୀୟଙ୍କ ଇନ୍ଦୋର-୧ ବିଧାନସଭା ନିର୍ବାଚନମଣ୍ଡଳୀରେ ପଡ଼ିଥାଏ।

ପ୍ରଶ୍ନ ଶୁଣି ମନ୍ତ୍ରୀ କ୍ରୋଧିତ
ବୁଧବାର ଦିନ, ଗଣମାଧ୍ୟମ ସଂସ୍ଥା NDTV ସହିତ ଏକ ସାକ୍ଷାତକାର ସମୟରେ, ଘରୋଇ ହସ୍ପିଟାଲରେ ଚିକିତ୍ସାଧୀନ ରୋଗୀଙ୍କ ବିଲ୍ ପ୍ରଦାନ ଏବଂ ପ୍ରଭାବିତ ଅଞ୍ଚଳରେ ବିକଳ୍ପ ପାନୀୟ ଜଳ ଯୋଗାଣ ବିଷୟରେ ପଚରାଯିବାରୁ ବିଜୟବର୍ଗୀୟ ହଠାତ୍ କ୍ରୋଧିତ ହୋଇଗଲେ। ସେ କ୍ୟାମେରା ସମ୍ମୁଖରେ କହିଥିଲେ, “ଅଯଥା ପ୍ରଶ୍ନ ପଚାରନ୍ତୁ ନାହିଁ,” ଏହା ପରେ ଯୁକ୍ତିତର୍କ ବଢ଼ିଗଲା ଏବଂ ମନ୍ତ୍ରୀ ଏକ ଆପତ୍ତିଜନକ ଶବ୍ଦ ବ୍ୟବହାର କଲେ। ସମଗ୍ର ଘଟଣାର ଏକ ଭିଡିଓ ସୋସିଆଲ ମିଡିଆରେ ଭାଇରାଲ ହେଲା, ଯାହା ଫଳରେ ମନ୍ତ୍ରୀଙ୍କୁ ନେଇ କଠୋର ସମାଲୋଚନା କରାଗଲା।

କଂଗ୍ରେସ ଆକ୍ରମଣ, ଇସ୍ତଫା ଦାବି
ରାଜ୍ୟ କଂଗ୍ରେସ ସଭାପତି ଜିତୁ ପଟୱାରୀ ଭିଡିଓ ସେୟାର କରି କହିଛନ୍ତି ଯେ ବିଷାକ୍ତ ପାଣି ପିଇବା ଯୋଗୁଁ ମୃତ୍ୟୁ ସଂଖ୍ୟା ବଢ଼ୁଛି, କିନ୍ତୁ ବିଜେପି ନେତାଙ୍କ ମନୋଭାବ ଅପରିବର୍ତ୍ତିତ ରହିଛି। ସେ ମୁଖ୍ୟମନ୍ତ୍ରୀ ମୋହନ ଯାଦବଙ୍କୁ ନୈତିକତା ଦୃଷ୍ଟିରୁ ବିଜୟବର୍ଗୀୟଙ୍କ ଇସ୍ତଫା ଗ୍ରହଣ କରିବାକୁ ଦାବି କରିଥିଲେ।