ମାନହାନି ମାମଲା ବାତିଲ ପାଇଁ ଆବେଦନ ପ୍ରତ୍ୟାହାର କଲେ କଙ୍ଗନା, ସୁପ୍ରିମକୋର୍ଟ ଦେଇଥିଲେ କଡ଼ା ମନ୍ତବ୍ୟ

ନୂଆଦିଲ୍ଲୀ: ମାନହାନି ମାମଲାକୁ ନେଇ ଅଭିନେତ୍ରୀ ତଥା ବିଜେପି ନେତ୍ରୀ କଙ୍ଗନା ରାଣାୱତଙ୍କ ସମସ୍ୟା ବଢ଼ିଛି । ଏହି ମାମଲାରେ ତାଙ୍କୁ ସୁପ୍ରିମକୋର୍ଟରୁ କୌଣସି ଆଶ୍ୱସ୍ତି ମିଳିନାହିଁ । କଙ୍ଗନା ରାଣାୱତ ସୁପ୍ରିମକୋର୍ଟରେ ଦାୟର ମାନହାନି ମାମଲାକୁ ରଦ୍ଦ କରିବା ପାଇଁ ଆବେଦନ ପ୍ରତ୍ୟାହାର କରିନେଇଛନ୍ତି । ଏହି ମାମଲା କଙ୍ଗନା ରାଣାୱତଙ୍କ ୨୦୨୧ ଟ୍ୱିଟ୍ ସହିତ ଜଡିତ, ଯେଉଁଥିରେ ସେ କୃଷକ ଆନ୍ଦୋଳନର ଜଣେ ମହିଳାଙ୍କୁ ଶାହିନ ବାଗର ବିଲକିସ୍ ବାନୋ ବୋଲି ଭୁଲ ଭାବରେ ବର୍ଣ୍ଣନା କରିଥିଲେ ।

ଏହି ମାମଲାର ଶୁଣାଣି ବିଚାରପତି ବିକ୍ରମ ନାଥ ଏବଂ ବିଚାରପତି ସନ୍ଦୀପ ମେହେଟ୍ଟାଙ୍କ ଖଣ୍ଡପୀଠ କରିଥିଲେ । ଜଷ୍ଟିସ ମେହେଟ୍ଟା କହିଛନ୍ତି ଯେ, ଏହି ଟ୍ୱିଟ୍ କେବଳ ଏକ ରି-ଟ୍ୱିଟ୍ ନୁହେଁ, ବରଂ ଏହାକୁ ମସଲାଦାର କରାଯାଇଛି ଏବଂ ଏହା ଏକ ବିଚାରର ବିଷୟ ।

ରାଣାୱତଙ୍କ ମାନହାନି ମାମଲାର ଶୁଣାଣି ସମୟରେ ସୁପ୍ରିମକୋର୍ଟ କହିଥିଲେ ଯେ, ଯଦିଓ ଆପଣ ରିଟ୍ୱିଟ୍ କରିଛନ୍ତି ଏବଂ ଟ୍ୱିଟ୍ ଅନ୍ୟ କାହାର, ଆମେ ଏହି ମାମଲାକୁ ଖାରଜ କରିପାରିବୁ ନାହିଁ । ଏହା ବିଚାରର ବିଷୟ । ଏହା ବ୍ୟତୀତ, କୋର୍ଟ ଏକ କଡ଼ା ମନ୍ତବ୍ୟ ଦେଇ କହିଛନ୍ତି ଯେ ଆପଣଙ୍କ ଟ୍ୱିଟ୍ ଉପରେ ଆମକୁ ମନ୍ତବ୍ୟ ଦେବାକୁ କୁହନ୍ତୁ ନାହିଁ । ଏହା ଆପଣଙ୍କ ମାମଲାକୁ ପ୍ରତିକୂଳ ପ୍ରଭାବିତ କରିପାରେ । ଆପଣ ଏହାକୁ ପ୍ରତ୍ୟାହାର କରିବା ଉଚିତ । କୋର୍ଟ ରାଣାୱତଙ୍କ ଓକିଲଙ୍କୁ ପଚାରିଥିଲେ ଯେ ଆପଣ ଏହାକୁ ପ୍ରତ୍ୟାହାର କରିବାକୁ ଚାହାଁନ୍ତି କି ନାହିଁ? କୋର୍ଟଙ୍କ ଏହି ମନ୍ତବ୍ୟ ପରେ, ରାଣାୱତ ତାଙ୍କ ଆବେଦନକୁ ପ୍ରତ୍ୟାହାର କରିନେଇଥିଲେ ।

ସୂଚନାଯୋଗ୍ୟ, ୨୦୨୦-୨୧ କୃଷକଙ୍କ ପ୍ରତିବାଦ ସମୟରେ, କଙ୍ଗନା ଜଣେ ମହିଳାଙ୍କ ଉପରେ ଅପମାନଜନକ ମନ୍ତବ୍ୟ ଦେଇଥିଲେ । ତାଙ୍କ ମନ୍ତବ୍ୟରେ ସେ ଭୁଲ ଭାବରେ ମହିଳାଙ୍କୁ ଶାହିନ ବାଗର ବିଲକିସ୍ ବାନୋ ବୋଲି କହିଥିଲେ । ଏହି ଅଭିଯୋଗ ୨୦୨୧ ମସିହାରେ ବଠିଣ୍ଡା ଜିଲ୍ଲାର ୭୩ ବର୍ଷୀୟା ମହିନ୍ଦର କୌରଙ୍କ ଦ୍ୱାରା ଦାୟର କରାଯାଇଥିଲା, ଯେଉଁଥିରେ ସେ ଅଭିଯୋଗ କରିଥିଲେ ଯେ, କଙ୍ଗନା ଏକ ରିଟ୍ୱିଟ୍‌ରେ ତାଙ୍କ ବିରୁଦ୍ଧରେ ମିଥ୍ୟା ଅଭିଯୋଗ ଆଣିଥିଲେ ଏବଂ ଏହା ମଧ୍ୟ କହିଥିଲେ ଯେ ସେ ସେହି ଜେଜେମା ଅର୍ଥାତ୍ ବିଲକିସ୍ ବାନୋ, ଯିଏ ଶାହିନ ବାଗର ପ୍ରତିବାଦରେ ଅଂଶ ଗ୍ରହଣ କରିଥିଲେ ।