ହେଲିକପ୍ଟର ଦୁର୍ଘଟଣା ପରେ ବଡ଼ ନିଷ୍ପତ୍ତି; ଚାରିଧାମରେ ​ନିଷେଧ ହେଲା ​ହେଲିକପ୍ଟର ସେବା

ଡେରାଡୁନ: ଆଜି ସକାଳେ ଉତ୍ତରାଖଣ୍ଡର କେଦାରନାଥରେ ହେଲିକପ୍ଟର ଦୁର୍ଘଟଣା ଘଟିଛି । ଯେଉଁଥିରେ ୭ ଜଣଙ୍କର ମୃତ୍ୟୁ ହୋଇଛି । ଏହି ଘଟଣା ପରେ, ଚାରିଧାମ ଯାତ୍ରା ସମୟରେ ଉପଲବ୍ଧ ହେଲିକପ୍ଟର ସେବାକୁ ନିଷିଦ୍ଧ କରାଯାଇଛି । ପରବର୍ତ୍ତୀ ନିର୍ଦ୍ଦେଶ ଜାରି ନହେବା ପର୍ଯ୍ୟନ୍ତ UKADA ଏବଂ DGCA ଏହି ସେବାକୁ ନିଷିଦ୍ଧ କରିଛନ୍ତି । ଏହା ସହିତ, ଉତ୍ତରାଖଣ୍ଡ ମୁଖ୍ୟମନ୍ତ୍ରୀ ପୁଷ୍କର ସିଂହ ଧାମି ରାଜ୍ୟରେ ହେଲିକପ୍ଟର ପରିଚାଳନା ସମ୍ପର୍କରେ SOP ପ୍ରସ୍ତୁତ କରିବାକୁ କଡ଼ା ନିର୍ଦ୍ଦେଶ ଦେଇଛନ୍ତି ।

ହେଲିକପ୍ଟର ଦୁର୍ଘଟଣାକୁ ଗମ୍ଭୀରତାର ସହ ନେଇ ମୁଖ୍ୟମନ୍ତ୍ରୀ ଧାମି ହେଲିକପ୍ଟର ପରିଚାଳନା ସମ୍ପର୍କରେ କଡ଼ା ନିର୍ଦ୍ଦେଶ ଜାରି କରିଛନ୍ତି । ମୁଖ୍ୟମନ୍ତ୍ରୀ କହିଛନ୍ତି ଯେ ରାଜ୍ୟରେ ହେଲି ସେବା ପରିଚାଳନା ପାଇଁ ଏକ କଠୋର SOP ପ୍ରସ୍ତୁତ କରାଯିବା ଉଚିତ, ଯେଉଁଥିରେ ହେଲିକପ୍ଟରର ବୈଷୟିକ ସ୍ଥିତିର ସମ୍ପୂର୍ଣ୍ଣ ଯାଞ୍ଚ ଏବଂ ଉଡ଼ାଣ ପୂର୍ବରୁ ସଠିକ୍ ପାଣିପାଗ ସୂଚନା ପାଇବାକୁ ବାଧ୍ୟତାମୂଳକ କରାଯିବା ଉଚିତ୍ ।

ହେଲି ପରିଚାଳନାର ସମସ୍ତ ବୈଷୟିକ ଏବଂ ସୁରକ୍ଷା ଦିଗକୁ ପୁଙ୍ଖାନୁପୁଙ୍ଖ ସମୀକ୍ଷା କରିବା ପରେ SOP ପ୍ରସ୍ତୁତ କରିବା ପାଇଁ ମୁଖ୍ୟମନ୍ତ୍ରୀ ବୈଷୟିକ ବିଶେଷଜ୍ଞଙ୍କ ଏକ କମିଟି ଗଠନ କରିବାକୁ ମୁଖ୍ୟ ସଚିବଙ୍କୁ ନିର୍ଦ୍ଦେଶ ଦେଇଛନ୍ତି । ଏହି କମିଟି ନିଶ୍ଚିତ କରିବ ଯେ ହେଲି ସେବାଗୁଡ଼ିକର ପରିଚାଳନା ସମ୍ପୂର୍ଣ୍ଣ ନିରାପଦ, ସ୍ୱଚ୍ଛ ଏବଂ ନିର୍ଦ୍ଧାରିତ ମାନଦଣ୍ଡ ଅନୁଯାୟୀ ହେବ ।

ହେଲିକପ୍ଟର ଦୁର୍ଘଟଣାର ତଦନ୍ତ ପାଇଁ ଗଠିତ ଉଚ୍ଚସ୍ତରୀୟ କମିଟି ଏହି ମାମଲାରେ ଏକ ରିପୋର୍ଟ ଦାଖଲ କରିବାକୁ ମଧ୍ୟ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଛନ୍ତି । ଏହି କମିଟି ରାଜ୍ୟରେ ଘଟିଥିବା ହେଲିକପ୍ଟର ଦୁର୍ଘଟଣାର ତଦନ୍ତ କରିବ । ତଦନ୍ତରେ କେବଳ ରବିବାର ଦୁର୍ଘଟଣା ନୁହେଁ ବରଂ ଅତୀତର ଘଟଣାଗୁଡ଼ିକୁ ମଧ୍ୟ ଅନ୍ତର୍ଭୁକ୍ତ କରାଯିବ । ଏହି କମିଟି ପ୍ରତ୍ୟେକ ଘଟଣାର କାରଣ ଗଭୀର ଭାବରେ ତଦନ୍ତ କରିବ ଏବଂ ଦୋଷୀ ବ୍ୟକ୍ତି କିମ୍ବା ଅନୁଷ୍ଠାନକୁ ଚିହ୍ନଟ କରିବ ଏବଂ ସେମାନଙ୍କ ବିରୁଦ୍ଧରେ କଠୋର କାର୍ଯ୍ୟାନୁଷ୍ଠାନ ଦାବି କରିବ । ମୁଖ୍ୟମନ୍ତ୍ରୀ କହିଛନ୍ତି ଯେ ତୀର୍ଥଯାତ୍ରା, ବିପର୍ଯ୍ୟୟ ପରିଚାଳନା ଏବଂ ଜରୁରୀକାଳୀନ ସେବା ପାଇଁ ରାଜ୍ୟରେ ହେଲି ସେବାର ଗୁରୁତ୍ୱ ଅତ୍ୟନ୍ତ, ତେଣୁ ଏଗୁଡ଼ିକରେ ସୁରକ୍ଷାକୁ ସର୍ବୋଚ୍ଚ ପ୍ରାଥମିକତା ଦିଆଯିବ ।

ସୂଚନାଯୋଗ୍ୟ, ଦୁର୍ଘଟଣାଗ୍ରସ୍ତ ହେଲିକପ୍ଟରଟି ତୀର୍ଥଯାତ୍ରୀମାନଙ୍କୁ ନେଇ ଗୁପ୍ତକାଶୀ ଫେରୁଥିଲା । ଗୌରୀକୁଣ୍ଡର ଧୁରୀ ଖର୍କ ନିକଟସ୍ଥ ଜଙ୍ଗଲରେ ହେଲିକପ୍ଟରଟି ଦୁର୍ଘଟଣାଗ୍ରସ୍ତ ହୋଇଛି । ଏହି ଦୁର୍ଘଟଣାରେ ସାତ ଜଣଙ୍କର ମୃତ୍ୟୁ ହୋଇଥିଲା । ରବିବାର ସକାଳ ପ୍ରାୟ ୫ଟାରେ ଏହି ଦୁର୍ଘଟଣା ଘଟିଥିଲା । ହେଲିକପ୍ଟରଟି ଆର୍ଯ୍ୟନ ହେଲି ଆଭିଏସନ୍‌ର ବୋଲି କୁହାଯାଉଛି । ଗୌରୀକୁଣ୍ଡର ଉପର ଅଞ୍ଚଳରେ ଘାସ କାଟୁଥିବା ନେପାଳୀ ବଂଶୋଦ୍ଭବ ମହିଳାମାନେ ହେଲିକପ୍ଟର ଦୁର୍ଘଟଣା ବିଷୟରେ ସୂଚନା ଦେଇଥିଲେ । ଏହା ପରେ ଉଦ୍ଧାର କାର୍ଯ୍ୟ ଆରମ୍ଭ ହୋଇଥିଲା । ଦୁର୍ଘଟଣାରେ ମୁଖ୍ୟମନ୍ତ୍ରୀ ଧାମି ଦୁଃଖ ପ୍ରକାଶ କରିଛନ୍ତି ।