ଭୁବନେଶ୍ବର: ଖଣ୍ଡଗିରି ପୋଲିସକୁ ବଡ ସଫଳତା । ଡକାୟତି ଯୋଜନା କରୁଥିବାବେଳେ ୫ ଅଭିଯୁକ୍ତଙ୍କୁ ପୋଲିସ ଗିରଫ କରିଛି । ସୂଚନା ମୂତାବକ ଖଣ୍ଡଗିରି ଥାନା ଅଧିକାରୀଙ୍କ ନିର୍ଦ୍ଦେଶକ୍ରମେ ସମ୍ପୃକ୍ତ ଥାନାର ଏକ ଟିମ୍ ରାତ୍ରିକାଳୀନ ପାଟ୍ରୋଲିଂ କରୁଥିଲେ । ରାଜଧାନୀ କଲେଜ ନିକଟରେ ଥିବା ଏକ ନିଛାଟିଆ ସ୍ଥାନରେ ୫ଜଣ ଲୁଟେରା ଗ୍ୟାଙ୍ଗ ଡକାୟତି ନିମନ୍ତେ ଯୋଜନା କରୁଥିବା ଖବର ମିଳିଥିଲା । ପୋଲିସ ପୂର୍ବ ସୂଚନା ଆଧାରରେ ଘଟଣାସ୍ଥଳରେ ପହଞ୍ଚି ୫ ଡକାୟତଙ୍କୁ ଗିରଫ କରିଥିଲା । ସେମାନଙ୍କ ନିକଟରୁ ଖଣ୍ଡା, ଛୁରୀ , ଲଙ୍କାଗୁଣ୍ଡ , ମଦ ବୋତଲ ଏବଂ ୨ଟି ବାଇକ୍ ଜବତ କରାଯାଇଛି ।
ଗିରଫ ଅଭିଯୁକ୍ତ ମାନେ ପୁରୀ ଅଞ୍ଚଳର ମୁରଲୀ ବେହେରା , ଗଞ୍ଜାମର ଶଙ୍କର ଡାକୁଆ , ପୁରୀର ମାନସ ପ୍ରଧାନ , ବରମୁଣ୍ଡା ଅଞ୍ଚଳର ମଣ୍ଟୁ ପାଇକରାଏ ଓ ନୟାଗଡ ଜିଲ୍ଲାର ଆକାଶ ନାୟକ ବୋଲି ଜଣାପଡିଛି । ଅଭିଯୁକ୍ତ ମଣ୍ଟୁ ନାଁରେ ପୂର୍ବରୁ ବିଭିନ୍ନ ଥାନାରେ ୨୩ଟି ମାମଲା ଥିବା ସୂଚନା ମିଳିଛି । ସେହିପରି ମୁରଲି ବେହେରା ଙ୍କ ନାଁରେ ୩ଟି ଓ ଶଙ୍କର ନାଁରେ ୩ଟି ମାମଲା ରହିଛି । ପୋଲିସ ଏମାନଙ୍କୁ ଗିରଫ କରି କୋର୍ଟ ଚାଲାଣ କରିଛି ।
Comments are closed.