ଦିଲ୍ଲୀରେ ପୁଣି ଜଣେ କରୋନା ଆକ୍ରାନ୍ତଙ୍କ ଆତ୍ମହତ୍ୟା । ଦକ୍ଷିଣ ଦିଲ୍ଲୀର ବାତ୍ରା ହସପିଟାଲରେ ଘଟିଛି ଏଭଳି ଅଭାବନୀୟ ଘଟଣା । ପୋଲିସର କହିବା ମୁତାବକ ଦିଲ୍ଲୀ ମିଠାପୁରରେ ରହୁଥିବା ୬୩ ବର୍ଷୀୟ ଜଣେ ବ୍ୟକ୍ତି ପୂର୍ବରୁ କିଡନୀ ରୋଗରେ ପୀଡ଼ିତ ଥିଲେ । ଆଉ ଡାଏଲେସିସ୍ ଲାଗି ଗତ ମେ ୨୦ରେ ହସପିଟାଲରେ ଭର୍ତ୍ତି ହୋଇ ଚିକିତ୍ସିତ ମଧ୍ୟ ହେଉଥିଲେ । ମାତ୍ର ଗତ ସପ୍ତାହରେ ତାଙ୍କ ନିକଟରେ କରୋନା ପଜିଟିଭ୍ ଚିହ୍ନଟ ହୋଇଥିଲା । ଆଉ ରବିବାର ଅପରାହ୍ନ ୪ଟା ସମୟରେ ହସପିଟାଲ କୋଠରୀର ସିଲିଂ ଫ୍ୟାନରେ ଝୁଲି ଆତ୍ମହତ୍ୟା କରିଥିବା ସ୍ଥାନୀୟ ଡେପୁଟୀ କମିଶନର ଅଫ୍ ପୋଲିସ କହିଛନ୍ତି ।
ତେବେ ତାଙ୍କର କୌଣସି ସୁସାଇଡ୍ ନୋଟ୍ ପୋଲିସର ହସ୍ତଗତ ହୋଇନାହିଁ । ମାତ୍ର ପାରିପାର୍ଶ୍ୱିକ ଅବସ୍ଥା ଦେଖି ରୋଗାଗ୍ରସ୍ତ ହୋଇ ଅତ୍ୟଧିକ ମାନସିକ ଚାପରେ ସେ ଆତ୍ମହତ୍ୟା କରିଥାଇପାରନ୍ତି ବୋଲି ସନ୍ଦେହ କରୁଛି ପୋଲିସ । ତେବେ ଘଟଣାର ଅଧିକ ତଦନ୍ତ ଚାଲିଛି । ଦେଶର ରାଜଧାନୀରେ ଏହା ହେଉଛି ଦ୍ୱିତୀୟ ଘଟଣା । ଯେଉଁଥିରେ ଜଣେ କରୋନା ଆକ୍ରାନ୍ତ ଆତ୍ମହତ୍ୟା କରିଛନ୍ତି । ଗତ ମାସରେ ଜଣେ ଯବାନ କରୋନା ପଜିଟିଭ ଜଣାପଡ଼ିବା ପରେ ଆର୍ମି ହସପିଟାଲର ଏକ ଗଛରେ ଝୁଲି ଆତ୍ମହତ୍ୟା କରିଥିଲେ ।