ନୂଆଦିଲ୍ଲୀ: ଭାରତର ବ୍ୟାଟ୍ସମ୍ୟାନ କେଏଲ ରାହୁଲ ଇଂଲଣ୍ଡ ବିପକ୍ଷ ଘରୋଇ କ୍ରିକେଟ ସିରିଜରେ ଖେଳିବେନି । ତାଙ୍କୁ ବିଶ୍ରାମ ଦିଆଯାଇଛି । ଚୟନ କମିଟି ତାଙ୍କୁ ଆଶ୍ୱସନା ଦେଇଛନ୍ତି ଯେ, ଫେବୃୟାରୀରେ ହେବାକୁ ଥିବା ଚାମ୍ପିୟନ୍ସ ଟ୍ରଫିରେ ତାଙ୍କୁ ନିଶ୍ଚିତ ଭାବେ ଦଳରେ ସାମିଲ କରାଯିବ । ରାହୁଲଙ୍କ ଅନୁପସ୍ଥିତିରେ ସଞ୍ଜୁ ସାମସନଙ୍କୁ ଚୂଡାନ୍ତ ଦଳରେ ସାମିଲ କରାଯିବା ଏକପ୍ରକାର ନିଶ୍ଚିତ ହୋଇଯାଇଛି । ଖୁବ ଶୀଘ୍ର ଇଂଲଣ୍ଡ ବିପକ୍ଷ ଧଳା ବଲ ମୁକାବିଲା ପାଇଁ ଦଳ ଘୋଷଣା କରାଯିବ । ଅବଶ୍ୟ ୨୦୨୨ ପରଠାରୁ ରାହୁଲ ଆଉ ଆନ୍ତର୍ଜାତୀୟ ଟି୨୦ ମ୍ୟାଚ ଖେଳି ନାହାନ୍ତି । ତେବେ ଦିିନିକିଆରେ ସେ ୱିକେଟକିପର ଦାୟିତ୍ୱ ତୁଲାଇବା ସହ ବ୍ୟାଟିଂରେ ଭଲ ପ୍ରଦର୍ଶନ ଜାରୀ ରଖିଛନ୍ତି ।
ନିକଟରେ ସମ୍ପନ୍ନ ହୋଇଥିବା ଅଷ୍ଟ୍ରେଲିଆ ବିପକ୍ଷ ବର୍ଡର-ଗାଭାସ୍କର ଟ୍ରଫିର ସମସ୍ତ ମ୍ୟାଚରେ ରାହୁଲ ଖେଳିଥିଲେ । ସେ ୩୦.୬୬ ଆଭରେଜରେ ୨୭୬ ରନ ସଂଗ୍ରହ କରିଥିଲେ । ସେହିପରି ଚଳିତ ବିଜୟ ହଜାରେ ଟ୍ରଫିରେ ରାହୁଲ ଖେଳିବେ ବୋଲି ଆଶା କରାଯାଉଥିଲା । ମାତ୍ର ଏଥିରେ ମଧ୍ୟ ସେ ଖେଳିବେ ନାହିଁ ବୋଲି ସ୍ପଷ୍ଟ ହୋଇଯାଇଛି । ଜାନୁୟାରୀ ୧୧ରେ ବରୋଦା ଓ କର୍ଣ୍ଣାଟକ ମଧ୍ୟରେ କ୍ୱାର୍ଟର ଫାଇନାଲ ମ୍ୟାଚ ଖେଳାଯିବ ।