ପ୍ରଥମେ କାହାକୁ ମିଳିଥିଲା ଭାରତ ରତ୍ନ, ଜାଣନ୍ତୁ ବର୍ଷକୁ କେତୋଟି ଲୋକଙ୍କୁ ମିଳିପାରିବ ଏହି ସମ୍ମାନ

ଭୁବନେଶ୍ଵର: ଦେଶର ସର୍ବଚ୍ଚୋ ନାଗରିକ ସମ୍ମାନ ‘ଭାରତ ରତ୍ନ’ର ପ୍ରଥା ପ୍ରଥମ ରାଷ୍ଟ୍ରପତି ଡା.ରାଜେନ୍ଦ୍ର ପ୍ରସାଦଙ୍କ ନେତୃତ୍ଵରେ ଆରମ୍ଭ ହୋଇଥିଲା । କୌଣସି ବି କ୍ଷେତ୍ରରେ ଜଣେ ବ୍ୟକ୍ତିର ଅତୁଳନୀୟ ସେବା ପାଇଁ ଏହି ସମ୍ମାନ ପ୍ରଦାନ କରାଯାଏ । ୧୯୫୪ ମସିହାରେ ଏହି ସମ୍ମାନ କେବଳ ଜୀବିତ ବ୍ୟକ୍ତି ମାନଙ୍କୁ ଦିଆଯାଉଥିଲା । କିନ୍ତୁ ପରବର୍ତ୍ତି ସମୟରେ ମୃତ୍ୟୁ ବରଣ କରିଥିବା ଲୋକମାନଙ୍କୁ ମଧ୍ୟ ଦିଆଗଲା । ଭାରତର ରାଜପତ୍ର ‘ଦି ଗେଜେଟ୍ ଅଫ୍ ଇଣ୍ଡିଆ’ରେ ବିଜ୍ଞପ୍ତି ପ୍ରକାଶ କରି ପୁରସ୍କାର ପ୍ରାପ୍ତ ବ୍ୟକ୍ତିଙ୍କ ନାମ ଆନୁଷ୍ଠାନିକ ଭାବରେ ଘୋଷଣା କରାଯାଇଥାଏ । ପରେ ଗଣତନ୍ତ୍ର ଦିବସ ଅର୍ଥାତ୍ ୨୬ ଜାନୁଆରୀରେ ରାଷ୍ଟ୍ରପତି ବିଜେତା ମାନଙ୍କୁ ସମ୍ମାନିତ କରିଥାଆନ୍ତି | ଗୋଟିଏ ବର୍ଷରେ ସର୍ବାଧିକ ତିନି ଜଣଙ୍କୁ ଏହି ଭରତ ରତ୍ନ ସମ୍ମାନ ଦିଆଯାଇଥାଏ ।

ଭାରତରତ୍ନ ସମ୍ମାନ ଦିଆଯାଉଥିବା ବ୍ୟକ୍ତିଙ୍କୁ ସରକାରଙ୍କ ତରଫରୁ ପ୍ରମାଣ ପତ୍ର ଏବଂ ଗୋଟେ ମେଡାଲ ମିଳିଥାଏ । ଏହା ସହ ସର୍ବୋଚ୍ଚ ନାଗରିକ ପୁରଷ୍କାର ବିଜେତାଙ୍କୁ ନିଶେଷ ସମ୍ମାନ ମଧ୍ୟ ମିଳିଥାଏ । ଭାରତରତ୍ନ ପାଇଥିବା ଲୋକଙ୍କୁ ସରକାରୀ କାର୍ଯ୍ୟକ୍ରମରେ ସାମିଲ ହେବାକୁ ନିମନ୍ତ୍ରଣ ଆସିଥାଏ । ଏହା ସହ ଭାରତରତ୍ନ ପାଇଥିବା ସମସ୍ତ ବ୍ୟକ୍ତି ବିଶେଷଙ୍କୁ କେନ୍ଦ୍ର ଓ ରାଜ୍ୟ ସରକାରଙ୍କ ଠାରୁ ସମସ୍ତ ସହାୟତା ଯୋଗାଇ ଦିଆଯାଇଥାଏ । ସ୍ଵାଧିନ ଭାରତର ପ୍ରଥମ ଗଭର୍ଣ୍ଣର ଚକ୍ରବର୍ତ୍ତୀ ରାଜଗୋପାଳାଚାରୀ, ପୂର୍ବତ୍ତନ ରାଷ୍ଟ୍ରପତି ଡା. ସର୍ବପଲ୍ଲୀ ରାଧାକୃଷ୍ଣନ ଏବଂ ମହାନ ବୈଜ୍ଞାନିକ ଡା.ଚନ୍ଦ୍ରଶେଖର ଭେଙ୍କଟରମଣଙ୍କୁ ୧୯୫୪ ମସିହାରେ ପ୍ରଥମଥର ଭାରତ ରତ୍ନ ସମ୍ମାନ ମିଳିଥିଲା ।

ତେବେ ଆପଣ ଜାଣନ୍ତି କି ଆମ ଦେଶରେ ଜଣେ ପାକିସ୍ତାନୀ ବ୍ୟକ୍ତି ମଧ୍ୟ ଏହି ସମ୍ମାନରେ ସମ୍ମାନିତ ହୋଇଛନ୍ତି । ଖାନ୍ ଅବଦୁଲ ଗପ୍ଫାର ଖାନ୍ ହେଉଛନ୍ତି ଏକ ମାତ୍ର ପାକିସ୍ତାନୀ ଯିଏ ଭାରତରତ୍ନ ସମ୍ମାନ ହାସଲ କରିଥିଲେ । ତାଙ୍କ ବ୍ୟତୀତ ମଦର ଟେରେସା ଏବଂ ନେଲସନ ମଣ୍ଡେଲାଙ୍କୁ ମଧ୍ୟ ଭାରତ ରତ୍ନ ପୁରସ୍କାରରେ ସମ୍ମାନିତ କରାଯାଇଛି । ୨୦୧୯ ରେ ଶେଷ ଥର ପାଇଁ ଦେଶର ପୂର୍ବତନ ରାଷ୍ଟ୍ରପତି ପ୍ରଣବ ମୁଖାର୍ଜୀଙ୍କୁ ଭାରତ ରତ୍ନ ସମ୍ମାନରେ ସମ୍ମାନିତ କରାଯାଇଥିଲା । ୨୦୧୪ ରେ, ପ୍ରଥମ ଥର ପାଇଁ କ୍ରୀଡା କ୍ଷେତ୍ରରେ ସର୍ବୋଚ୍ଚ ପ୍ରଦର୍ଶନ ପାଇଁ ସଚିନ ତେନ୍ଦୁଲକରଙ୍କୁ ଭାରତ ରତ୍ନ ପ୍ରଦାନ କରାଯାଇଥିଲା ।  ଭାରତ ରତ୍ନ ପୁରସ୍କାର ଦୁଇଥର ସ୍ଥଗିତ ରଖାଯାଇଛି, ଏହା ପରେ ଏହି ପୁରସ୍କାର ପୁନଃ ଆରମ୍ଭ ହୋଇଥିଲା । ଏପର୍ଯ୍ୟନ୍ତ ୪୯ ଜଣ ମହାନାୟକଙ୍କୁ ଏହି ସମ୍ମାନରେ ସମ୍ମାନିତ କରାଯାଇଛି ।