କୋଲକାତା: କୋଲକାତାର ଆରଜି କର ମେଡିକାଲ କଲେଜର ପୂର୍ବତନ ପ୍ରିନ୍ସିପାଲ ସନ୍ଦୀପ ଘୋଷଙ୍କ ଅବସ୍ଥା ଏବେ ସଙ୍କଟାପନ୍ନ ରହିଛି। ସିବିଆଇ ଦୁର୍ନୀତି ମାମଲାରେ ସନ୍ଦୀପ ଘୋଷଙ୍କୁ ଗିରଫ କରିସାରିଛି। ବର୍ତ୍ତମାନ ଆରଜି କର ମେଡିକାଲ କଲେଜ ଓ ହସ୍ପିଟାଲର ଆର୍ଥିକ ଦୁର୍ନୀତି ସହ ଜଡ଼ିତ ମାମଲାର ତଦନ୍ତ ଆରମ୍ଭ କରିଛି ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି)।
ଆଜି ପଶ୍ଚିମବଙ୍ଗର ତିନୋଟି ସ୍ଥାନରେ ଚଢାଉ କରାଯାଇଛି। ଏହି ଚଢାଉ ମଧ୍ୟରେ ଆରଜି କର ମେଡିକାଲ କଲେଜର ପୂର୍ବତନ ପ୍ରିନ୍ସିପାଲ ଡ. ସନ୍ଦୀପ ଘୋଷଙ୍କ ଜଣେ ସମ୍ପର୍କୀୟଙ୍କ ସମ୍ପତ୍ତି ଥିବା କୁହାଯାଉଛି। ଇଡି କୋଲକାତାର ୫ରୁ ୬ଟି ସ୍ଥାନରେ ଚଢାଉ କରିଛି। ଏହି ଚଢାଉରେ ସନ୍ଦୀପ ଘୋଷ ଏବଂ ତାଙ୍କର ଘନିଷ୍ଠ ସହଯୋଗୀଙ୍କ ସମେତ ଆର.ଜି କର ହସ୍ପିଟାଲର ଡାଟା ଏଣ୍ଟ୍ରି ଅପରେଟର ପ୍ରସନ୍ନ ଚାଟାର୍ଜୀଙ୍କ ଘର ଏବଂ ସନ୍ଦୀପ ଘୋଷଙ୍କ ପୁରୁଣା ଘନିଷ୍ଠ ସହଯୋଗୀଙ୍କ ଘର ସାମିଲ ରହିଛି। ପଶ୍ଚିମବଙ୍ଗର ହାୱଡ଼ା, ସୋନାରପୁର ଏବଂ ହୁଗଳିରେ ଏକାଧିକ ସ୍ଥାନରେ ଚଢ଼ାଉ ଆରମ୍ଭ କରିଛି।
ଅନ୍ୟପକ୍ଷରେ ସିବିଆଇ ତଦନ୍ତ ବର୍ତ୍ତମାନ ଶେଷ ପର୍ଯ୍ୟାୟରେ ଅଛି। ଡିଏନ୍ଏ ରିପୋର୍ଟ ସିବିଆଇରେ ପହଞ୍ଚିସାରିଛି, ଯାହା ଚୂଡ଼ାନ୍ତ ମତ ପାଇଁ AIIMS କୁ ପଠାଯାଇଛି। ଏମ୍ସର ଡାକ୍ତରଙ୍କ ପ୍ୟାନେଲ୍ ଡିଏନ୍ଏ ରିପୋର୍ଟକୁ ଅତି ନିକଟରୁ ଅଧ୍ୟୟନ କରୁଛି ଏବଂ ଚୂଡ଼ାନ୍ତ ରିପୋର୍ଟ ଶୀଘ୍ର ସିବିଆଇକୁ ପଠାଯିବ। ସୂତ୍ର ଦାବି କରିଛି ଯେ ଏମ୍ସର ଡିଏନଏ ରିପୋର୍ଟ ଉପରେ ଚୂଡ଼ାନ୍ତ ମତ ପରେ ସିବିଆଇ ଏହି ମାମଲାର ତଦନ୍ତ ଶେଷରେ ପହଞ୍ଚିବ।
ସିବିଆଇ ଏପର୍ଯ୍ୟନ୍ତ ୧୦୦ରୁ ଅଧିକ ଲୋକଙ୍କ ବୟାନ ରେକର୍ଡ କରିଛି। ସିବିଆଇ ୧୦ରୁ ଅଧିକ ଲୋକଙ୍କ ପଲିଗ୍ରାଫ୍ ପରୀକ୍ଷା ମଧ୍ୟ କରିଛି ଯାହା ଦ୍ୱାରା ଅପରାଧର କୌଣସି ଅଂଶ ଚାର୍ଜସିଟରେ ଅସମ୍ପୂର୍ଣ୍ଣ ରହିବ ନାହିଁ। ଏଥିସହିତ ମୃତକଙ୍କ ଡିଏନଏ ଏବଂ ଅଭିଯୁକ୍ତଙ୍କ ଡିଏନଏ ମେଳ ହୋଇଛି। ଏହାର ବିସ୍ତୃତ ରିପୋର୍ଟ ଆସିବା ପାଇଁ ଏହା ଅଧିକ ସମୟ ନେଇପାରେ।
ଗତ ମାସ ଆରଜି କରରେ ଜଣେ ଟ୍ରେନି ଡାକ୍ତରଙ୍କୁ ଦୁଷ୍କର୍ମ ଓ ହତ୍ୟା ଘଟଣା ପରେ ଗୋଟିଏ ପରେ ଗୋଟିଏ ମାମଲା ସାମ୍ନାକୁ ଆସିଛି। ସିବିଆଇ ଦୁଷ୍କର୍ମ ଓ ହତ୍ୟା ମାମଲାର ତଦନ୍ତ ଚଳାଇ ଥିବାବେଳେ ପୂର୍ବତନ ପ୍ରିନ୍ସିପାଲ ସନ୍ଦୀପ ଘୋଷଙ୍କ ବିରୁଦ୍ଧରେ ଆର୍ଥିକ ଘୋଟାଲାର ଅଭିଯୋଗ ଆସିଥିଲା। ସେ ସିବିଆଇ ହେପାଜତରେ ଥିବାବେଳେ ଆଜି ଇଡି ବେଙ୍ଗଲର ହାୱଡ଼ା, ସୋନାରପୁର ଏବଂ ହୁଗଳିର ବିଭିନ୍ନ ସ୍ଥାନରେ ଚଢାଉ କରିଛି। ହୁଗଳିରେ କେନ୍ଦ୍ରୀୟ ତଦନ୍ତକାରୀ ସଂସ୍ଥା ଚଢାଉ କରୁଥିବା ସ୍ଥାନ ମଧ୍ୟରୁ ଗୋଟିଏରେ ସନ୍ଦୀପ ଘୋଷଙ୍କ ସମ୍ପର୍କୀୟଙ୍କ ନାଁରେ ଥିବା ଜଣାପଡିଛି। ଅଗଷ୍ଟ ୯ ରେ ୩୧ ବର୍ଷୀୟ ଟ୍ରେନି ଡାକ୍ତରଙ୍କୁ ଦୁଷ୍କର୍ମ ଓ ହତ୍ୟା ଘଟଣା ପରେ ସେ ପ୍ରିନ୍ସିପାଲ ପଦରୁ ଇସ୍ତଫା ଦେଇଥିଲେ। ଆର୍ଥିକ ଘୋଟଲା, ଅସାଧୁ ଆଚରଣ, ଠକେଇ ଅଭିଯୋଗରେ ସେପ୍ଟେମ୍ବର ୨ରେ ସିବିଆଇ ତାଙ୍କୁ ଗିରଫ କରିଛି।
Comments are closed.