କୋରାପୁଟ: କଣ ଆପଣ ମଧ୍ୟ ମୋବାଇଲରେ ଗପି ଗପି ଗାଡ଼ି ଚଳାଉଛନ୍ତି । ଯଦି ହଁ ତେବେ ସାବଧାନ ହୋଇ ଯାଆନ୍ତୁ । ନଚେତ୍ ଜରିମାନା ଦେବା ସହ ବାତିଲ୍ ହୋଇଯିବ ଆପଣଙ୍କ ଡ୍ରାଇଭିଂ ଲାଇସେନ୍ସ । କୋରାପୁଟ ଟାଉନ୍ ଥାନା ପୋଲିସ ପକ୍ଷରୁ ଚେକିଂକୁ ଜୋରଦାର କରାଯାଇଛି । ବିଭିନ୍ନ ସ୍ଥାନରେ ପୋଲିସ ଚେକିଂ ବେଳେ ମୋବାଇଲରେ ଗପି ଗାଡ଼ି ଚଳାଉଥିବା ଚାଳକଙ୍କ ଉପରେ ନଜର ରଖୁଛି ।
ମଙ୍ଗଳବାର କୋରାପୁଟ ସହରର ବିଭିନ୍ନ ସ୍ଥାନରେ ପୋଲିସ ଚେକିଂ କରିଥିଲା । ମୋବାଇଲରେ ଗପି ଗାଡ଼ି ଚଳାଉଥିବା ୨୩ ଜଣଙ୍କ ଠାରୁ ୧ ଲକ୍ଷ ୧୫ ହଜାର ଟଙ୍କା ଜରିମାନା ଆଦାୟ କରାଯାଇଛି । ଏଥିସହ ଧରାପଡ଼ିଥିବା ୨୩ ଜଣଙ୍କ ଡ୍ରାଇଭିଂ ଲାଇସେନ୍ସ ବାତିଲ୍ ପାଇଁ ପଦକ୍ଷେପ ନେଇଛି ପୋଲିସ । ଆଗକୁ ମଧ୍ୟ ଏଭଳି ଅଭିଯାନକୁ ଜୋରଦାର କରାଯିବ ବୋଲି କହିଛନ୍ତି ଟାଉନ୍ ଥାନା ଅଧିକାରୀ ଧିରେନ ପଟ୍ଟନାୟକ ।