କୋଟିଆ ରାଜନୀତି: ଧର୍ମେନ୍ଦ୍ରଙ୍କ ‘ଗୋ ବ୍ୟାକ ଆନ୍ଧ୍ର’ ନାରାକୁ ବିଜେଡିର ଉପହାସ, ମଧ୍ୟସ୍ଥତା ଦାବି

ଭୁବନେଶ୍ୱର: କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ‘ଗୋ ବ୍ୟାକ୍ ଆନ୍ଧ୍ର’ ସ୍ଲୋଗାନକୁ ‘ବ୍ୟର୍ଥ’ କହି ଉପହାସ କରିଥିଲା ବିଜୁ ଜନତା ଦଳ। ଏବେ ଏହାର କଡା ଜବାବ ଦେଇଛନ୍ତି ଧର୍ମେନ୍ଦ୍ର। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନେତୃତ୍ୱାଧୀନ ଶାସକ ଦଳ ପଡ଼ୋଶୀ ଆନ୍ଧ୍ରପ୍ରଦେଶ ସହ କୋଟିଆ ବିବାଦକୁ ନେଇ ବିବାଦରେ ଥିବାବେଳେ ରାଜସ୍ୱ ମନ୍ତ୍ରୀ ପ୍ରମିଳା ମଲ୍ଲିକଙ୍କ ମନ୍ତବ୍ୟ ଏହି ରାଜନୈତିକ ବୟାନବାଜିକୁ ଆହୁରି ଖୋରାକ ଯୋଗାଇଛି।

ରାଜସ୍ୱ ମନ୍ତ୍ରୀ ପ୍ରମିଳା ମଲ୍ଲିକ କହିଛନ୍ତି, ‘ଗୋ ବ୍ୟାକ ଆନ୍ଧ୍ର’ ନାରା ଦେବା ଦ୍ୱାରା ଆନ୍ଧ୍ର ସରକାର ପଛଘୁଞ୍ଚା ଦେବେ ନାହିଁ। ନଚେତ ଏତେ ବର୍ଷ ଧରି ସୁପ୍ରିମକୋର୍ଟରେ ଏହି ମାମଲା ବିଚାରଧୀନ ହୋଇ ନଥାନ୍ତା। ଓଡ଼ିଶା ଓ ଆନ୍ଧ୍ରପ୍ରଦେଶ ମଧ୍ୟରେ ମଧ୍ୟସ୍ଥତା କରି କୋଟିଆ ସମସ୍ୟାର ସମାଧାନ କରିବାକୁ ମୁଁ କେନ୍ଦ୍ର ସରକାରଙ୍କୁ ନିବେଦନ କରୁଛି। କେବଳ ଓଡ଼ିଶା ସରକାରଙ୍କୁ ଦୋଷ ଦେଲେ ଉଦ୍ଦେଶ୍ୟ ପୂରଣ ହେବ ନାହିଁ ବୋଲି ସେ କହିଛନ୍ତି।

କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ କହିଛନ୍ତି, ଯଦି କେହି ସୀମାରେ ଛିଡା ହୋଇ ଓଡ଼ିଶାର ଏକ ଅଂଶକୁ ନିଜର ବୋଲି ଦାବି କରୁଛି, ମୁଁ ବାରମ୍ୱାର କହିବି ‘ଗୋ ବ୍ୟାକ୍’। ବିଜେଡି କୋଟିଆରୁ ରାଜନୈତିକ ଫାଇଦା ନେବାକୁ ଚେଷ୍ଟା କଲେ କିଛି ଅସୁବିଧା ନାହିଁ, କିନ୍ତୁ ସେମାନଙ୍କୁ ପ୍ରଥମେ ସମସ୍ୟାର ସମାଧାନ କରିବାକୁ ପଡ଼ିବ। ପୂର୍ବରୁ ଅନେକ ଥର ମୁଖ୍ୟମନ୍ତ୍ରୀଙ୍କୁ ଚିଠି ଲେଖିଛି। ସେମାନେ ଏହାକୁ ତୁରନ୍ତ କାର୍ଯ୍ୟକାରୀ କରନ୍ତୁ ବୋଲି ଧର୍ମେନ୍ଦ୍ର ପ୍ରଧାନ କହିଛନ୍ତି।

ଉତ୍କଳ ଦିବସ ଅବସରରେ କୋରାପୁଟର ବିବାଦୀୟ ଅଞ୍ଚଳ କୋଟିଆ ଗସ୍ତ କରି ଧର୍ମେନ୍ଦ୍ର ପ୍ରଧାନ ସେଠାରେ ଉପସ୍ଥିତ ଆନ୍ଧ୍ର ଅଧିକାରୀଙ୍କୁ କୋଟିଆ କେବଳ ଓଡ଼ିଶାର ବୋଲି କହି ‘ଗୋ ବ୍ୟାକ୍’ କହିଥିଲେ।

ଉଲ୍ଲେଖଯୋଗ୍ୟ, ଓଡ଼ିଶା-ଆନ୍ଧ୍ର ମଧ୍ୟରେ କୋଟିଆ ବିବାଦ ଦୀର୍ଘ ଦିନ ଧରି ଲାଗି ରହିଥିବା ବେଳେ ଉଭୟ ରାଜ୍ୟ ସୀମାବର୍ତ୍ତୀ ଗାଁ ଉପରେ ମାଲିକାନା ଦାବି କରି ଆସୁଛନ୍ତି।