ପ୍ରେମିକର ଘର ଆଗରେ ପ୍ରେମିକାଙ୍କ ଧାରଣା

ବ୍ରହ୍ମପୁର: ଗଞ୍ଜାମ ଜିଲାରେ ପୁଣି ଥରେ ପ୍ରେମ ଓ ପ୍ରତାରଣାର ଅଭିଯୋଗ ଆସିଛି । ପ୍ରେମିକଙ୍କ ଘର ଆଗରେ ଧାରଣା ଦେଇଛନ୍ତି ପ୍ରେମିକା । ଘଟଣା ହେଲା, ରାମଗିରି ଗ୍ରାମର ଶିବ ପ୍ରଧାନ କାମ ସନ୍ଧାନରେ ଗୁଜରାଟର ସୁରତକୁ ଯାଇଥିଲେ । ସେଠାରେ ଖଲିକୋଟ ଥାନା ସଚ୍ଛିନା ଗ୍ରାମର ଯୁବତୀ ଜଣକ ମଧ୍ୟ ରହୁଥିଲେ । ସୁରତରେ ଉଭୟଙ୍କ ମଧ୍ୟରେ ପ୍ରେମ ସଂପର୍କ ସୃଷ୍ଟି ହୋଇଥିଲା । ଉଭୟେ ସେଠାରେ ଏକ ମନ୍ଦିରରେ ବିବାହ କରିଥିଲେ । ବିବାହକୁ ପ୍ରାୟ ଦୁଇ ବର୍ଷ ହୋଇଗଲାଣି । ଗତ କିଛି ଦିନ ହେଲା ଶିବ କେଉଁଆଡ଼େ ଚାଲି ଯାଇଥିଲେ । ତାଙ୍କ ମୋବାଇଲ ମଧ୍ୟ ବନ୍ଦ ରହିଛି । ଏଣୁ ଶିବଙ୍କୁ ଖୋଜିଖୋଜି ପ୍ରେମିକା ଜଣକ ତାଙ୍କ ଗାଁରେ ପହଞ୍ଚିଛନ୍ତି । ମଙ୍ଗଳବାର ଶିବଙ୍କ ଘର ସମ୍ମୁଖରେ ସେ ଧାରଣା ଦେଇଥିଲେ । ଶେରଗଡ଼ ପୋଲିସ ପହଞ୍ଚି ତାଙ୍କୁ ବୁଝାସୁଝା କରିବା ପରେ ସେ ଫେରିଛନ୍ତି । ତେବେ ଶିବଙ୍କ ସନ୍ଧାନ ନ ମିଳିଲେ ପୁଣି ଥରେ ଆସିବି ବୋଲି ସେ ଚେତାବନୀ ଦେଇଛନ୍ତି।