ମଦୁରାଇ: ସିପିଆଇ(ଏମ)ର ବରିଷ୍ଠ ନେତା ତଥା କେରଳର ପୂର୍ବତନ ମନ୍ତ୍ରୀ ଏମଏ ବେବି ଦଳର ନୂତନ ସାଧାରଣ ସମ୍ପାଦକ ଭାବେ ନିର୍ବାଚିତ ହୋଇଛନ୍ତି। ୭୧ ବର୍ଷୀୟ ଏହି ନେତା ସୀତାରାମ ୟେଚୁରୀଙ୍କ ସ୍ଥାନରେ ଦାୟିତ୍ୱ ଗ୍ରହଣ କରିଛନ୍ତି। ତାମିଲନାଡୁର ମଦୁରାଇରେ ଅନୁଷ୍ଠିତ ଦଳର ୨୪ତମ ପାର୍ଟି କଂଗ୍ରେସରେ ଏହି ଘୋଷଣା କରାଯାଇଛି। ଏମଏ ବେବି ସିପିଆଇ(ଏମ) ପୋଲିଟବ୍ୟୁରୋର ସଦସ୍ୟ। ସେ ୨୦୦୬ରୁ ୨୦୧୧ ପର୍ଯ୍ୟନ୍ତ କେରଳର ଶିକ୍ଷା ମନ୍ତ୍ରୀ ଭାବେ କାର୍ଯ୍ୟ କରିଥିଲେ ଏବଂ ୧୯୮୬ରୁ ୧୯୯୮ ମଧ୍ୟରେ ରାଜ୍ୟସଭା ସାଂସଦ ଭାବେ ଦାୟିତ୍ୱ ନିର୍ବାହ କରିଛନ୍ତି। କେରଳର ପ୍ରଥମ ମୁଖ୍ୟମନ୍ତ୍ରୀ ଇଏମଏସ ନମ୍ବୁଦ୍ଦିରିପାଡଙ୍କ ପରେ ଦଳର ନେତୃତ୍ୱ ନେଉଥିବା ସେ ଦ୍ୱିତୀୟ କେରଳୀୟ ନେତା ହୋଇଛନ୍ତି।
ଏମଏ ବେବି ଦଳର ଏହି ଶୀର୍ଷ ପଦବୀକୁ ନିର୍ବାଚିତ ହେବା ପରେ ବିଭିନ୍ନ ରାଜନୈତିକ ଦଳର ନେତାମାନେ ତାଙ୍କୁ ଶୁଭେଚ୍ଛା ଜଣାଇଛନ୍ତି। ବରିଷ୍ଠ କଂଗ୍ରେସ ନେତା ଶଶି ଥରୁର ସୋସିଆଲ ମିଡିଆ ପ୍ଲାଟଫର୍ମ ଏକ୍ସରେ ଲେଖିଛନ୍ତି, “ମୋ ବନ୍ଧୁ ଏମଏ ବେବିଙ୍କୁ ସିପିଆଇ(ଏମ)ର ସାଧାରଣ ସମ୍ପାଦକ ଭାବେ ନିର୍ବାଚିତ ହୋଇଥିବାରୁ ଅଭିନନ୍ଦନ। ମୋର ବିଶ୍ୱାସ ଯେ ସେ ତାଙ୍କ ଜ୍ଞାନ, ମାନବିକତା, ଶିଷ୍ଟାଚାର ଓ ସଚ୍ଚୋଟତାର ସହ ଦଳକୁ ନେତୃତ୍ୱ ଦେବେ।” ସେହିପରି ତାମିଲନାଡୁ ମୁଖ୍ୟମନ୍ତ୍ରୀ ଏମକେ ଷ୍ଟାଲିନ ମଧ୍ୟ ଶୁଭେଚ୍ଛା ଜଣାଇ କହିଛନ୍ତି ଯେ ବେବିଙ୍କ ଜୀବନଯାତ୍ରା ସଂକଳ୍ପ ଓ ଉଦ୍ଦେଶ୍ୟକୁ ପ୍ରତିଫଳିତ କରେ। ସେ କହିଛନ୍ତି, “ଛାତ୍ର ନେତା ଭାବେ ଜରୁରୀକାଳୀନ ପରିସ୍ଥିତିର ବିରୋଧ କରିବାରୁ ଆରମ୍ଭ କରି କେରଳର ଶିକ୍ଷା ନୀତିକୁ ପ୍ରଗତିଶୀଳ ଦିଗରେ ଢାଳିବା ପର୍ଯ୍ୟନ୍ତ ତାଙ୍କ ଯାତ୍ରା ଅତ୍ୟନ୍ତ ପ୍ରେରଣାଦାୟୀ। ଧର୍ମନିରପେକ୍ଷତା, ସାମାଜିକ ନ୍ୟାୟ ଓ ସଂଘୀୟତା ପାଇଁ ଆମର ମିଳିତ ସଂଗ୍ରାମରେ ଡିଏମକେ ସହଯୋଗ ଆଗକୁ ମଜଭୁତ ହେବ ବୋଲି ଆଶା ରଖୁଛି।”
କେରଳ ମୁଖ୍ୟମନ୍ତ୍ରୀ ପିନାରାୟୀ ବିଜୟନ ଦଳର ନେତୃତ୍ୱ ପରିବର୍ତ୍ତନ ସମ୍ପର୍କରେ କହିଛନ୍ତି ଯେ “ସମାଜର ସମସ୍ତ ବର୍ଗର ଲୋକଙ୍କୁ ଏକଜୁଟ କରି ସମାନତା ଓ ସାମାଜିକ ନ୍ୟାୟ ପାଇଁ ସିପିଆଇ(ଏମ)ର ସଂଗ୍ରାମକୁ ଶକ୍ତିଶାଳୀ କରିବା ଉଦ୍ଦେଶ୍ୟ।”
କେରଳର କୋଲ୍ଲମ ଜିଲ୍ଲାରେ ଜନ୍ମଗ୍ରହଣ କରିଥିବା ଏମଏ ବେବି ଛାତ୍ର ଆନ୍ଦୋଳନରୁ ରାଜନୀତିରେ ପ୍ରବେଶ କରିଥିଲେ। ସେ ଷ୍ଟୁଡେଣ୍ଟସ ଫେଡେରେସନ ଅଫ ଇଣ୍ଡିଆ (ଏସଏଫଆଇ) ଏବଂ ଡେମୋକ୍ରାଟିକ ୟୁଥ ଫେଡେରେସନ ଅଫ ଇଣ୍ଡିଆ (ଡିୱାଇଏଫଆଇ)ରେ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରିବା ପରେ ସିପିଆଇ(ଏମ)ରେ ବିଭିନ୍ନ ସ୍ତରରେ ନେତୃତ୍ୱ ଦେଇଛନ୍ତି।
ପାର୍ଟି କଂଗ୍ରେସରେ ଏକ ୮୫ ଜଣିଆ ନୂତନ କେନ୍ଦ୍ରୀୟ କମିଟି ମଧ୍ୟ ନିର୍ବାଚିତ ହୋଇଛି। ଏହା ପରେ ୧୮ ଜଣିଆ ପୋଲିଟବ୍ୟୁରୋ ଗଠନ ହୋଇଛି।
Comments are closed.