ମାଡ୍ରାସ: ବଲିଉଡରେ ସଫଳ କଳାକାରଙ୍କ ପିଲାମାନେ ଅଭିନୟ ପତି ବିଶେଷ ଭାବେ ଆକୃଷ୍ଟ ହେଉଥିବା ବେଳେ ଆର.ମାଧବନଙ୍କ ପୁତ୍ର ବେଦାନ୍ତଙ୍କ କ୍ଷେତ୍ରରେ କିନ୍ତୁ ଏଥିରେ ବ୍ୟତୀକ୍ରମ ଦେଖିବାକୁ ମିଳିଛି । ସେ ସନ୍ତରଣରେ କ୍ୟାରିୟର କରିବା ସହ ଦେଶ ପାଇଁ ଗୌରବ ଆଣିବା ନେଇ ଜିଦ ଧରିଛନ୍ତି । ରବିବାର ଜାତୀୟ ଜୁନିୟର ସନ୍ତରଣ ଚାମ୍ପିୟନଶିପରେ ରେକର୍ଡ କରିଛନ୍ତି ବେଦାନ୍ତ । ୧୫୦୦ ମିଟର ଫ୍ରିଷ୍ଟାଇଲ ଇଭେଂଟରେ ବେଦାନ୍ତ ନୂତନ ଜାତୀୟ ରେକର୍ଡ ସ୍ଥାପନ କରିଛନ୍ତି । ମାଧବନ ଏହି ଖୁସି ଖବର ସୋସିଆଲ ମିଡିଆରେ ପ୍ରଶଂସକଙ୍କ ସହ ଶେୟାର କରିଛନ୍ତି । ୟୁଜର୍ସମାନେ ମଧ୍ୟ ଉଭୟ ମାଧବନ ଏବଂ ତାଙ୍କ ପୁତ୍ରଙ୍କ ଉପଲବ୍ଧିକୁ ପ୍ରଶଂସା କରିଛନ୍ତି । ବିଜୟ ଧାରା ବଜାୟ ରହୁ ବୋଲି ମାଧବନ ପୁଅଙ୍କୁ ପ୍ରଶଂସା କରି ଲେଖିଛନ୍ତି । ଚଳିତ ବର୍ଷ ଏପ୍ରିଲରେ ବେଦାନ୍ତ ଡାନୀଶ ଓପନ ୮୦୦ ମିଟର ଫ୍ରିଷ୍ଟାଇଲରେ ସ୍ୱର୍ଣ୍ଣ ପଦକ ଜିତିଥିଲେ । ଏହି ଅବସରରେ ବେଦାନ୍ତ କୋଚ ପ୍ରଦୀପ ସାର ଓ ଭାରତୀୟ ସନ୍ତରଣ ଫେଡେରେଶନକୁ ସେ ଧନ୍ୟବାଦ ଜଣାଇଛନ୍ତି ।
