ଟ୍ରାଫିକ୍ ଜାମ୍ ପାଇଁ ଗଲା ୩ ଜୀବନ: ଏନଏଚଏଆଇ କହିଲା- ବିନା କାମରେ କାହିଁକି ଘରୁ ବାହାରୁଛନ୍ତି ଲୋକେ

ଭୋପାଳ: ମଧ୍ୟପ୍ରଦେଶର ଇନ୍ଦୋରର ଇନ୍ଦୋର-ଦେବାସ ରାସ୍ତାରେ ୪୦ ଘଣ୍ଟା ଧରି ଟ୍ରାଫିକ ଜାମ ଯୋଗୁଁ ଶୁକ୍ରବାର ଦିନ ତିନି ଜଣଙ୍କର ମୃତ୍ୟୁ ଘଟିଛି। ସେମାନଙ୍କ ମଧ୍ୟରୁ ଦୁଇଜଣଙ୍କୁ ହୃଦଘାତ ହୋଇଥିଲା ଏବଂ ଜଣେ ରୋଗୀଙ୍କ ହସ୍ପିଟାଲ ପହଞ୍ଚିବା ପୂର୍ବରୁ ଅମ୍ଳଜାନ ସରିଯାଇଥିଲା। ଏହି କାରଣରୁ ଏହି ଲୋକମାନେ ମୃତ୍ୟୁବରଣ କରିଥିଲେ। ଏହି ମାମଲାର ଶୁଣାଣି ସମୟରେ, ମଧ୍ୟପ୍ରଦେଶ ହାଇକୋର୍ଟରେ ଭାରତୀୟ ଜାତୀୟ ରାଜପଥ ପ୍ରାଧିକରଣ (NHAI) ପକ୍ଷରୁ ଏକ ଆଶ୍ଚର୍ଯ୍ୟଜନକ ଯୁକ୍ତି ଦିଆଯାଇଛି।

ଟ୍ରାଫିକ ଜାମ ଯୋଗୁଁ ତିନି ଜଣଙ୍କ ମୃତ୍ୟୁ ପରେ, କେନ୍ଦ୍ର ସରକାର ଏବଂ NHAIକୁ ନୋଟିସ ଜାରି କରାଯାଇଥିଲା। ଏହି ନୋଟିସ୍ ହାଇକୋର୍ଟର ଇନ୍ଦୋର ବେଞ୍ଚର ବିଚାରପତି ବିବେକ ରୁସିଆ ଏବଂ ବିନୋଦ କୁମାର ଦ୍ୱିବେଦୀ ଜାରି କରିଛନ୍ତି। ମାମଲାର ଶୁଣାଣି ସମୟରେ, କୋର୍ଟ ସରକାର ଏବଂ NHAIକୁ କଡ଼ା ଭର୍ତ୍ସନା କରିଥିଲେ।

ଭାରତୀୟ ଜାତୀୟ ରାଜପଥ ପ୍ରାଧିକରଣ (NHAI)କୁ ତାଙ୍କ ପକ୍ଷ ରଖିବା ପାଇଁ କୋର୍ଟକୁ ଡକାଯାଇଥିଲା। NHAI ପକ୍ଷରୁ କୋର୍ଟରେ ହାଜର ହୋଇଥିବା ଓକିଲ ସେଠାରେ ଜାମ୍ ଏବଂ ମୃତ୍ୟୁକୁ ଭ୍ରାମକ ବୋଲି କହିଛନ୍ତି। ଏହା ସହିତ, ଲୋକମାନେ ଏତେ ଶୀଘ୍ର ଘରୁ କାହିଁକି ବାହାରୁଛନ୍ତି ବୋଲି ପ୍ରଶ୍ନ କରିଥିଲେ। ଏହି ଉତ୍ତରରେ ସେଠାରେ ଉପସ୍ଥିତ ସମସ୍ତେ ଆଶ୍ଚର୍ଯ୍ୟ ହୋଇଯାଇଥିଲେ। ତଥାପି, କୋର୍ଟ ଏହି ମାମଲାର ପରବର୍ତ୍ତୀ ଶୁଣାଣି ପାଇଁ ଜୁଲାଇ ୭ ତାରିଖ ଧାର୍ଯ୍ୟ କରିଛନ୍ତି।

ବିଳମ୍ବ ପାଇଁ NHAI କ୍ରଶର ୟୁନିଟଗୁଡ଼ିକର ୧୦ ଦିନିଆ ଧର୍ମଘଟକୁ ଦାୟୀ କରିଛି; ତଥାପି, କୋର୍ଟ କହିଛନ୍ତି ଯେ ରାସ୍ତା କାମ ଶେଷ କରିବା ପାଇଁ ସେ ତିନିରୁ ଚାରି ମାସ ସମୟ ମାଗିଛନ୍ତି।

ପୂର୍ବରୁ ମଧ୍ୟ ଖରାପ ରାସ୍ତା ମାମଲା କୋର୍ଟରେ ପହଞ୍ଚିଥିଲା, ସେହି ସମୟରେ କୋର୍ଟ NHAIକୁ ଗୋଟିଏ ମାସ ମଧ୍ୟରେ ରାସ୍ତା ମରାମତି କରିବାକୁ ନିର୍ଦ୍ଦେଶ ଦେଇଥିଲେ। ୭ ମାସ ପରେ ମଧ୍ୟ ପରିସ୍ଥିତି ସମାନ ରହିଛି। ବର୍ଷା ଯୋଗୁଁ ଲୋକମାନେ ପ୍ରତିଦିନ ଅନେକ ସମସ୍ୟାର ସମ୍ମୁଖୀନ ହେଉଛନ୍ତି।

ଅସମ୍ପୂର୍ଣ୍ଣ ରାସ୍ତା କାମ ଯୋଗୁଁ, ରାଜପଥରେ ଗାଡ଼ି ଚାଳକମାନେ ୪୦ ଘଣ୍ଟା ଧରି ଟ୍ରାଫିକ୍ ଜାମ୍‌ରେ ଫସି ରହିଥିଲେ, ଯାହା ଫଳରେ ତିନି ଜଣଙ୍କର ମୃତ୍ୟୁ ହୋଇଥିଲା। ମୃତକମାନେ ହେଲେ ଇନ୍ଦୋରର କମଳ ପାଞ୍ଚାଲ (୬୨), ଶୁଜଲପୁରର ବଳରାମ ପଟେଲ (୫୫) ଏବଂ ଗରୀ ପିପଲ୍ୟା ଗ୍ରାମର ସନ୍ଦୀପ ପଟେଲ (୩୨)। ରିପୋର୍ଟ ଅନୁଯାୟୀ, ଟ୍ରାଫିକ୍ ଜାମ୍ ସମୟରେ ଗରମରେ ଶ୍ୱାସରୁଦ୍ଧ ହୋଇ କଲାମ ପାଞ୍ଚାଲଙ୍କ ହୃଦଘାତରେ ମୃତ୍ୟୁ ହୋଇଥିଲା।