ଇମ୍ଫାଲ: ମଣିପୁରରେ ଚାଲିଥିବା ଉତ୍ତେଜନା ଯୋଗୁଁ ସରକାର ତିନି ଦିନ ପାଇଁ ସ୍କୁଲ ଏବଂ କଲେଜ ବନ୍ଦ ରଖିବାକୁ ନିର୍ଦ୍ଦେଶ ଦେଇଛନ୍ତି। ଅଗଷ୍ଟ ୨୦ରୁ ୨୨ତାରିଖ ପର୍ଯ୍ୟନ୍ତ ଶିକ୍ଷାନୁଷ୍ଠାନ ବନ୍ଦ କରିବାକୁ ନିଷ୍ପତ୍ତି ନିଆଯାଇଛି।
ଜନଗଣନା ପୂର୍ବରୁ NRC ଅପଡେଟ୍ ଦାବି କରି ରାଜ୍ୟର କିଛି ସ୍ଥାନରେ ଚାଲିଥିବା ପ୍ରତିବାଦକୁ ଦୃଷ୍ଟିରେ ରଖି ସରକାର ଏହି ନିଷ୍ପତ୍ତି ନେଇଛନ୍ତି।
ରାଜ୍ୟ ଶିକ୍ଷା ବିଭାଗ ଦ୍ୱାରା ଜାରି ଏକ ଆଦେଶରେ କୁହାଯାଇଛି, ରାଜ୍ୟର ବର୍ତ୍ତମାନର ଆଇନ ଶୃଙ୍ଖଳା ପରିସ୍ଥିତିକୁ ଦୃଷ୍ଟିରେ ରଖି, ମଣିପୁର ରାଜ୍ୟପାଳ ମାଧ୍ୟମିକ ଶିକ୍ଷା ବୋର୍ଡ, ଉଚ୍ଚ ମାଧ୍ୟମିକ ଶିକ୍ଷା ପରିଷଦ, କେନ୍ଦ୍ରୀୟ ମାଧ୍ୟମିକ ଶିକ୍ଷା ବୋର୍ଡ କିମ୍ବା ଅନ୍ୟ କୌଣସି ପ୍ରତିଷ୍ଠାନ ସହିତ ଜଡିତ ସମସ୍ତ ଶିକ୍ଷାନୁଷ୍ଠାନର ପରୀକ୍ଷା ବାତିଲ କରିବାକୁ ନିଷ୍ପତ୍ତି ନେଇଛନ୍ତି।ସରକାରୀ, ଅନୁଦାନପ୍ରାପ୍ତ କିମ୍ବା ଅଣ-ଅନୁଦାନପ୍ରାପ୍ତ କ୍ଷେତ୍ର ଅଧୀନରେ ଥିବା କଲେଜ ଏବଂ ବିଶ୍ୱବିଦ୍ୟାଳୟ ସମେତ ସମସ୍ତ ଉଚ୍ଚଶିକ୍ଷା ପ୍ରତିଷ୍ଠାନ/ ସ୍କୁଲ ୨୦ରୁ ଅଗଷ୍ଟ ୨୨ ତାରିଖ ପର୍ଯ୍ୟନ୍ତ ବନ୍ଦ ଘୋଷଣା କରାଯାଇଛି।
ଅନ୍ୟପକ୍ଷରେ ରାଜ୍ୟରେ ଜନଗଣନା ପ୍ରକ୍ରିୟା ପୂର୍ବରୁ ଜାତୀୟ ନାଗରିକ ପଞ୍ଜିକାର (NRC)କୁ ଅପଡେଟ୍ କରିବା ଦାବିରେ କ୍ୟାମ୍ପେନ୍ ଫର୍ ଜଷ୍ଟ ଆଣ୍ଡ ଫେୟାର ଡିଲିମିଟେସନ୍ (JFD) ଦ୍ୱାରା ଡାକରାଯାଇଥିବା ୪୮ ଘଣ୍ଟାର ସାଧାରଣ ଧର୍ମଘଟର ଦ୍ୱିତୀୟ ଦିନରେ ପ୍ରଦର୍ଶନକାରୀମାନେ ମଣିପୁରର ଉପତ୍ୟକା ଜିଲ୍ଲାଗୁଡ଼ିକର ବିଭିନ୍ନ ସ୍ଥାନରେ ନେତାଙ୍କ କୁଶପୁତ୍ତଳିକା ଦାହ କରି ରାଲି କରିଥିଲେ।
JFD ଏହାର ଆନ୍ଦୋଳନର ଅଂଶ ସ୍ୱରୂପ ଗୁରୁବାରଠାରୁ ସମସ୍ତ ସରକାରୀ କାର୍ଯ୍ୟାଳୟ ବର୍ଜନ କରିବାକୁ ଘୋଷଣା କରିଛି। ଇମ୍ଫାଲ ପୂର୍ବ ଜିଲ୍ଲାର ଖୁରାଇ ଲାମଲଙ୍ଗରେ ପ୍ରଦର୍ଶନକାରୀ ମାନେ ବୁଧବାର ମୁଖ୍ୟମନ୍ତ୍ରୀ ୱାଇ. ଖେମଚାନ୍ଦ ସିଂହ ଏବଂ ଗୃହମନ୍ତ୍ରୀ ଗୋବିନ୍ଦାସ କନ୍ଥୌଜାମଙ୍କ କୁଶପୁତ୍ତଳିକା ଦାହ କରିଥିଲେ।