ଇମ୍ଫାଲ: ପୁଣି ଥରେ ମଣିପୁରରୁ ହିଂସା ଏବଂ ସଂଘର୍ଷର ଖବର ପ୍ରକାଶ ପାଇବାରେ ଲାଗିଛି। ଇମ୍ଫାଲ ପଶ୍ଚିମ ଜିଲ୍ଲାର କାଙ୍ଗଚୁପ ଅଞ୍ଚଳରେ କୋଟ୍ରୁକ ନିକଟରେ ଗୁଳି ବିନିମୟରେ ଜଣେ ମହିଳାଙ୍କ ସମେତ ଦୁଇ ଜଣଙ୍କର ମୃତ୍ୟୁ ଘଟିଥିବା ବେଳେ ତାଙ୍କ ଝିଅଙ୍କ ସମେତ ଅନ୍ୟ ଚାରିଜଣ ଆହତ ହୋଇଛନ୍ତି। ଅଭିଯୁକ୍ତମାନେ ଡ୍ରୋନ୍ ବୋମାମାଡ଼ କରିଛନ୍ତି।
କୋଟାରୁକ୍ ଗାଁର ଗ୍ରାମ ପଞ୍ଚାୟତ ସଭାପତିଙ୍କ ଅନୁଯାୟୀ ସନ୍ଦିଗ୍ଧ ସଶସ୍ତ୍ର ଉଗ୍ରବାଦୀମାନେ ରାତି ପ୍ରାୟ ୨ ଟାରେ ବିନା ଉତ୍ତେଜନାରେ ଗୁଳି ଚଳାଇବା ଆରମ୍ଭ କରିଥିଲେ। ଗାଁ ସ୍ବେଚ୍ଛାସେବୀମାନେ ସମ୍ବେଦନଶୀଳ ଅଞ୍ଚଳଠାରୁ ଦୂରରେ ଥିବାବେଳେ ଏହି ଆକ୍ରମଣ ହୋଇଥିଲା। ମୃତକଙ୍କ ମଧ୍ୟରୁ ଜଣେ ଫାୟେଙ୍ଗ ଉମାଙ୍ଗ ଲାଇକାଇର ସୁରବାଲା ଦେବୀ ବୋଲି ଜଣାପଡିଛି।
ଏହି ଆକ୍ରମଣରେ ଜଣେ ପୋଲିସ କର୍ମଚାରୀ ମଧ୍ୟ ଆହତ ହୋଇଛନ୍ତି। ଆହତ ମହିଳାଙ୍କୁ ଇମ୍ଫାଲର ଆଞ୍ଚଳିକ ଇନଷ୍ଟିଚ୍ୟୁଟ୍ ଅଫ୍ ମେଡିକାଲ ସାଇନ୍ସ (RIMS) ଡାକ୍ତରଖାନାକୁ ନିଆଯାଇଥିଲା। ଯେଉଁଠାରେ ତାଙ୍କୁ ମୃତ ଘୋଷଣା କରାଯାଇଥିଲା। ତାଙ୍କର ୧୩ ବର୍ଷର ଝିଅ ନାଗ ରୋଜିଆଙ୍କ ଡାହାଣ ହାତରେ ଆଘାତ ଲାଗିଛି ଏବଂ ବର୍ତ୍ତମାନ ସେହି ଡାକ୍ତରଖାନାରେ ଚିକିତ୍ସିତ ହେଉଛନ୍ତି ବୋଲି ଅଧିକାରୀମାନେ କହିଛନ୍ତି। ଆହତମାନଙ୍କ ମଧ୍ୟରେ ଆୱାଙ୍ଗ ଖୁନାଉ ମାନିଙ୍ଗ ଲାଇକାଇ ନିବାସୀ ୩୦ ବର୍ଷିୟ ପୋଲିସ ଅଧିକାରୀ ଆନ୍ ରୋବର୍ଟ ମଧ୍ୟ ଅଛନ୍ତି। ଅନ୍ୟ ଦୁଇ ଆହତ ବ୍ୟକ୍ତି, ଇନାଓ ଟାକେଲାମ୍ବମ୍ ଏବଂ ଥାଡୋଇ ହେଗ୍ରୁଜାମ ରାଜ ମେଡିସିଟି ହସ୍ପିଟାଲରେ ଭର୍ତ୍ତି ହୋଇଛନ୍ତି।
ଏହି ସମୟରେ ସ୍ଥାନୀୟ ପ୍ରଶାସନ ଇମ୍ଫାଲ ପଶ୍ଚିମ ଜିଲ୍ଲାରେ କର୍ଫ୍ୟୁ ଲାଗୁ କରିଥିବାବେଳେ ମଣିପୁର ସରକାର ଏହି ଆକ୍ରମଣକୁ ନିନ୍ଦା କରିଛନ୍ତି। କୁକି ଉଗ୍ରବାଦୀ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ପ୍ରତିଶୃତି ଦେଇଛନ୍ତି। ମଣିପୁର ଗୃହ ମନ୍ତ୍ରଣାଳୟ ପକ୍ଷରୁ ଜାରି ଏକ ପ୍ରେସ ବିଜ୍ଞାପ୍ତିରେ କୁହାଯାଇଛି ଯେ, ଡ୍ରୋନ୍, ବୋମା ଏବଂ ଏକାଧିକ ଅତ୍ୟାଧୁନିକ ଅସ୍ତ୍ରଶସ୍ତ୍ର ବ୍ୟବହାର କରି ଗ୍ରାମବାସୀଙ୍କ ଉପରେ ହୋଇଥିବା ଆକ୍ରମଣ ଅତି ଦୁର୍ଭାଗ୍ୟଜନକ ଘଟଣା। କୁକି ଉଗ୍ରବାଦୀଙ୍କ ଦ୍ୱାରା ଅନେକ ଲୋକ ଆହତ ହୋଇଛନ୍ତି।
Comments are closed.