କଟକ: ଇତିହାସ ରଚିଛନ୍ତି ଓଡିଶା ବାରବାଟୀ-କଟକ ଆସନର କଂଗ୍ରେସ ବିଧାୟକ ସୋଫିଆ ଫିର୍ଦୋସ । ପ୍ରଥମ ମୁସଲମାନ ମହିଳା ବିଧାୟକ ଭାବେ ବିଧାନସଭାକୁ ନିର୍ବାଚିତ ହୋଇଛନ୍ତି ସୋଫିଆ । ସୋଫିଆ ପୂର୍ବତନ କଂଗ୍ରେସ ବିଧାୟକ ମହମ୍ମଦ ମୋକିମଙ୍କ ଝିଅ। ୨୦୨୪ ଲୋକସଭା ନିର୍ବାଚନରେ କଂଗ୍ରେସ ପ୍ରାର୍ଥୀ ସୋଫିଆ ବିଜେପିର ପ୍ରସିଦ୍ଧ ସ୍ତ୍ରୀ ରୋଗ ବିଶେଷଜ୍ଞ ପୁର୍ଣ୍ଣ ଚନ୍ଦ୍ର ମହାପାତ୍ରଙ୍କୁ ୮୦୦୧ ଭୋଟରେ ପରାଜୟ କରି ପ୍ରଥମ ମୁସଲିମ୍ ମହିଳା ବିଧାୟକ ଭାବରେ ନିର୍ବାଚିତ ହୋଇଛନ୍ତି । ଓଡିଶାର ୨୦୨୪ ବିଧାନସଭା ନିର୍ବାଚନରେ ସୋଫିଆଙ୍କୁ ୫୩,୧୯୭ଟି ଭୋଟ୍ ମିଳିଥିବା ବେଳେ ବିଜେପି ପ୍ରାର୍ଥୀଙ୍କୁ ୪୫,୨୨୩ଟି ଭୋଟ୍ ଏବଂ ବିଜେଡି ପ୍ରାର୍ଥୀଙ୍କୁ ୩୯,୯୩୪ଟି ଭୋଟ ମିଳିଥିଲା ।
୩୨ ବର୍ଷିୟ ସୋଫିଆ ଫିର୍ଦୋସ୍ ବରିଷ୍ଠ କଂଗ୍ରେସ ନେତା ମହମ୍ମଦ ମୋକିମଙ୍କ ଝିଅ। କଂଗ୍ରେସ ୨୦୨୪ ଓଡ଼ିଶା ବିଧାନସଭା ନିର୍ବାଚନରେ ମୋକିମଙ୍କ ସ୍ଥାନରେ ସୋଫିଆ ଫିର୍ଦୋସଙ୍କୁ ମଇଦାନକୁ ଓହ୍ଲାଇଥିଲା । ଶେଷରେ କଟକ-ବାରବାଟୀ ଆସନରୁ ବିଜୟୀ ହୋଇଥିଲା ସୋଫିଆ। ସୋଫିଆ ପେଶାରେ ଜଣେ ସିଭିଲ୍ ଇଞ୍ଜିନିୟର ଏବଂ ଏକ ରିଏଲ୍ ଇଷ୍ଟେଟ୍ ସଂସ୍ଥାର ନିର୍ଦ୍ଦେଶକ ମଧ୍ୟ । ସେ ୨୦୨୨ ମସିହାରେ ବାଙ୍ଗାଲୋରର ଇଣ୍ଡିଆନ୍ ଇନଷ୍ଟିଚ୍ୟୁଟ୍ ଅଫ୍ ମ୍ୟାନେଜମେଣ୍ଟରୁ ଏକଜିକ୍ୟୁଟିଭ୍ ଜେନେରାଲ୍ ମ୍ୟାନେଜମେଣ୍ଟ ପ୍ରୋଗ୍ରାମ ମଧ୍ୟ ସମାପ୍ତ କରିଛନ୍ତି । ୨୦୨୩ ମସିହାରେ କନଫେଡେରେସନ୍ ଅଫ୍ ରିଏଲ୍ ଇଷ୍ଟେଟ୍ ଡେଭଲପର୍ସ ଆସୋସିଏସନ୍ ଅଫ୍ ଇଣ୍ଡିଆର ଭୁବନେଶ୍ୱର ବ୍ରାଞ୍ଚର ସଭାପତି ହୋଇଥିଲେ ସୋଫିଆ। ସୋଫିଆ ବିଜନେସ୍ ମ୍ୟାନ ଶେଖ ମେରାଜ ଉଲ ହକଙ୍କୁ ବିବାହ କରିଛନ୍ତି |
ସୋଫିଆ ଫିର୍ଦୋସ୍ ସର୍ବଦା ସାମାଜିକ କାର୍ଯ୍ୟକ୍ରମରେ ସକ୍ରିୟ ଭାବରେ ଅଂଶଗ୍ରହଣ କରିଥାନ୍ତି । ନିର୍ବାଚନ ପ୍ରଚାରରେ ସେ ତାଙ୍କ ପିତାଙ୍କୁ ମଧ୍ୟ ଅନେକ ଥର ସାହାଯ୍ୟ କରିଛନ୍ତି । ତେବେ ସୋଫିଆ ଫିର୍ଦୋସ୍ ୧୯୭୨ ମସିହାରେ ସମାନ ବିଧାନସଭା ନିର୍ବାଚନମଣ୍ଡଳୀରୁ ପ୍ରତିନିଧିତ୍ୱ କରୁଥିବା ଓଡିଶାର ପ୍ରଥମ ମହିଳା ମୁଖ୍ୟମନ୍ତ୍ରୀ ନନ୍ଦିନୀ ସତପଥୀଙ୍କୁ ସର୍ବଦା ଅନୁସରଣ କରନ୍ତି । ତେବେ ଋଣ ଠକେଇ ମାମଲାରେ ମୋକିମଙ୍କ ଦଣ୍ଡ ଉପରେ ସୁପ୍ରିମକୋର୍ଟ ମନା କରିବା ପରେ କଂଗ୍ରେସ ସୋଫିଆଙ୍କୁ ଏହି ଆସନରୁ ପ୍ରାର୍ଥୀ କରିଥିଲା। ୨୦୨୪ ଓଡିଶା ବିଧାନସଭା ନିର୍ବାଚନରେ ବିଜେପି ୧୪୭ଟି ଆସନ ମଧ୍ୟରୁ ୭୮ଟି ଆସନରେ ଜିତି ବହୁମତ ହାସଲ କରିଛି । ଏଥିସହିତ ରାଜ୍ୟରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏବଂ ବିଜୁ ଜନତା ଦଳର ୨୪ ବର୍ଷର ଶାସନର ଅନ୍ତ ଘଟିଛି ।