ନୂଆଦିଲ୍ଲୀ: ଭିଏତନାମା ବୋଝ ଉପରେ ନଳିତା ବିଡା…ତାଣ୍ଡବ ରଚାଇଛି ଭୂସ୍ଖଳନ, ବନ୍ୟା, ବର୍ଷା ବିତ୍ପାତ…ତ୍ରାହି ତ୍ରାହି ଡାକୁଛନ୍ତି ଲୋକେ…ଗଲାଣି ୪୧ ଜୀବନ
ପ୍ରବଳ ବର୍ଷା ବନ୍ୟା ଏବଂ ଭୂସ୍ଖଳନ ଏକା ସାଙ୍ଗରେ ଭିଏତନାମା ଉପରେ ଦାଉ ସାଧିଥିବାରୁ ଏବେ ବିପଦରେ ଜୀବନ । ଏହି ବିପର୍ଯ୍ୟୟରେ ଏପର୍ଯ୍ୟନ୍ତ ୪୧ ଜଣଙ୍କର ମୃତ୍ୟୁ ହୋଇଛି। ତେବେ ମଝି ଭିଏତନାମରେ ମୁଷଳଧାରାରେ ବର୍ଷା ଯୋଗୁଁ ବନ୍ୟା ଏବଂ ଭୂସ୍ଖଳନ ହୋଇଛି। ଉଦ୍ଧାର ଦଳ ପ୍ରଭାବିତ ଅଞ୍ଚଳରେ ରିଲିଫ୍ କାର୍ଯ୍ୟ କରୁଛନ୍ତି। ଲୋକମାନେ ବୁଡ଼ି ରହିଥିବା ଘରର ଛାତ ଉପରେ ଫସି ରହିଛନ୍ତି ଏବଂ ସେମାନଙ୍କୁ ଉଦ୍ଧାର ପାଇଁ ପ୍ରୟାସ ଜାରି ରହିଛି। ଗତ ତିନି ଦିନ ମଧ୍ୟରେ ଏହି ଅଞ୍ଚଳର ଅନେକ ସ୍ଥାନରେ ୧୫୦ ସେଣ୍ଟିମିଟରରୁ ଅଧିକ ବର୍ଷା ହୋଇଛି। ଆଉ ସବୁଠୁ ଦୁଃଖଦ ହେଉଛି ବନ୍ୟା ଅଞ୍ଚଳ ଏକ ପ୍ରମୁଖ କଫି ଉତ୍ପାଦନକାରୀ ଅଞ୍ଚଳ। ଯାହାକୁ ନେଇ ଏବେ ମୁଣ୍ଡରେ ହାତ ଦେଇଛନ୍ତି ଚାଷୀ । ଏହା ଏହାର ବେଳାଭୂମି ଏବଂ ପର୍ଯ୍ୟଟନ ପାଇଁ ଜଣାଶୁଣା। ଭିଏତନାମ ପରିବେଶ ମନ୍ତ୍ରଣାଳୟ ଅନୁଯାୟୀ, ଛଅଟି ପ୍ରଦେଶରେ ମୋଟ ୪୧ ଜଣଙ୍କର ମୃତ୍ୟୁ ହୋଇଛି। ଏହା ସହିତ, ନଅ ଜଣ ଏବେ ବି ନିଖୋଜ ଅଛନ୍ତି ଏବଂ ସେମାନଙ୍କୁ ଖୋଜା ଚାଲିଛି।
ସେପଟେ ବନ୍ୟା ଯୋଗୁଁ ୫୨ ହଜାରରୁ ଅଧିକ ଘର ବୁଡ଼ି ରହିଛି। ପ୍ରାୟ ୬୨ ହଜାର ଲୋକଙ୍କୁ ଉଦ୍ଧାର କରାଯାଇଥିବା ବେଳେ ସେମାନେ ଏବେ ବାସଚ୍ୟୁତ ହୋଇଛନ୍ତି । ପ୍ରବଳ ବର୍ଷା ଯୋଗୁଁ ଅନେକ ସ୍ଥାନରେ ଭୂସ୍ଖଳନ ମଧ୍ୟ ହୋଇଛି, ଯାହା ଅନେକ ପ୍ରମୁଖ ରାସ୍ତା ଅବରୋଧ କରିଛି। ଏହି ସମୟରେ, ପ୍ରାୟ ୧୦ ଲକ୍ଷ ଘରେ ବିଦ୍ୟୁତ୍ ଯୋଗାଣ ବନ୍ଦ ହୋଇଯାଇଛି।
ସେପଟେ ଭିଏତନାମ ନ୍ୟୁଜ୍ ଏଜେନ୍ସି ଅନୁଯାୟୀ, ଟାଇଫୁନ୍ କଲମାଇଗି ଭିଏତନାମା ମୁଣ୍ଡ ଉପରେ ଘୁରି ବୁଲୁଛି । ଏହା ଏବେ ପଶ୍ଚିମ ଏବଂ ଉତ୍ତର-ପଶ୍ଚିମ ଦିଗରେ ଗତି କରୁଛି ଏବଂ କେନ୍ଦ୍ରୀୟ ଭିଏତନାମରେ ସ୍ଥଳଭାଗ ଛୁଇଁବ ବୋଲି ଆଶା କରାଯାଉଛି। ଭିଏତନାମ ପାଣିପାଗ ବିଭାଗ ସତର୍କ କରିଛି ଯେ ହ୍ୟୁ ସିଟିରୁ ଡାକ୍ ଲାକ୍ ପ୍ରଦେଶ ପର୍ଯ୍ୟନ୍ତ ଉପକୂଳବର୍ତ୍ତୀ ଅଞ୍ଚଳରେ ଜଳସ୍ତର ୦.୩ ରୁ ୦.୬ ମିଟର ବୃଦ୍ଧି ପାଇପାରେ। ଘୂର୍ଣ୍ଣିଝଡ଼ ଯୋଗୁଁ ପ୍ରବଳ ବର୍ଷା ହେବାର ସମ୍ଭାବନା ଅଛି, ଯାହା ଛୋଟ ନଦୀ ଏବଂ ଝରଣାରେ ବନ୍ୟା ଏବଂ ଢାଲଗୁଡ଼ିକରେ ଭୂସ୍ଖଳନ ସୃଷ୍ଟି କରିପାରେ। ଏହା ବ୍ୟତୀତ ସହରାଞ୍ଚଳ ଏବଂ ଶିଳ୍ପ କ୍ଷେତ୍ରରେ ଜଳବନ୍ଦୀ ହୋଇପାରେ। ଯାହା ବିଗିଡିଥିବା ଅବସ୍ଥାକୁ ଆହୁରି ସଙ୍କଟାପନ୍ନ କରିଛି ।
Comments are closed.