ଅମାନିଆ ଗାଡ଼ି ଚାଳକ ସାବାଡ୍: ଜାନୁଆରୀରେ ବାତିଲ ହେଲାଣି ୪ହଜାରରୁ ଅଧିକ ଡ୍ରାଇଭିଂ ଲାଇସେନ୍ସ

ଭୁବନେଶ୍ୱର: ବେପରୁଆ ଢଙ୍ଗରେ ଗାଡ଼ି ଚାଳାଉଥିଲେ ସାବଧାନ ହୋଇ ଯାଆନ୍ତୁ । ନଚେତ୍ ଚେକିଂରେ ଧାରପଡିଲେ ତଣ୍ଡ ଗଣିବେ । ତାସହ ବାତିଲ ହେବ ଡ୍ରାଇଭିଂ ଲାଇସେନ୍ସ । ନୂଆବର୍ଷରୁ ରାଜ୍ୟରେ ଜୋରଦାର ହୋଇଛି ଟ୍ରାଫିକ ଧରପଗଡ଼ । ଅମାନିଆ ଗାଡ଼ି ଚାଳକଙ୍କ ଉପରେ କାର୍ଯ୍ୟାନୁଷ୍ଠାନ ହେଉଛି । ଜାନୁଆରୀ ପହିଲାରୁ ୨୧ ତାରିଖ ଭିତରେ ରାଜ୍ୟରେ ୪ହଜାର ୨୬୭ ଚାଳକଙ୍କ ଡ୍ରାଇଭିଂ ଲାଇସେନ୍ସ ତିନି ମାସ ପାଇଁ ରଦ୍ଦ ହୋଇଛି ।

ହେଲମେଟ୍ ନ ପିନ୍ଧିବା କାରଣରୁ ସର୍ବାଧିକ ୨ହଜାର ୬୮୮ ଜଣଙ୍କର ଡିଏଲ୍ ତିନି ମାସ ବାତିଲ କରାଯାଇଛି । ସେହିପରି ଦ୍ରୁତ ଗତିରେ ଗାଡ଼ି ଚଳାଇବା କାରଣରୁ ୭୨୮ଜଣ, ମୋବାଇଲ୍ ଫୋନରେ କଥା ହୋଇ ଗାଡ଼ି ଚାଳନାରୁ ୨୫୫, ମଦ ପିଇ ଗାଡ଼ି ଚଳାଇବା ବେଳେ ଧରାପଡ଼ିବାରୁ ୭୮ ଜଣ ଚାଳକଙ୍କ ଡିଏଲ୍ ରଦ୍ଦ ହୋଇଛି ।

ଭୁବନେଶ୍ୱର ଆରଟିଓ-୧ ପରିସରରୁ ସର୍ବାଧିକ ୬୫୪, ଭୁବନେଶ୍ୱର ଆରଟି-୨ ଅଧୀନରେ ୫୪୮, କଟକରେ ୫୩୭, ସମ୍ୱଲପୁରରେ ୪୧୦ ଓ ରାଉରକେଲା ଆରଟିଓ ଅଧୀନରେ ୨୭୯ ଜଣ ଗାଡ଼ି ଚାଳକଙ୍କ ଡ୍ରାଇଭିଂ ଲାଇସେନ୍ସ ତିନି ମାସ ପାଇଁ ରଦ୍ଦ କରାଯାଇଛି । ଏବେ ପଛରେ ବସିଥିବା ଲୋକ ବି ହେଲମେଟ୍ ପିନ୍ଧିବା ବାଧ୍ୟତାମୂଳକ ହୋଇଛି ।