ବ୍ରହ୍ମପୁର: ପତ୍ନୀ ଓ ଦୁଇ ବର୍ଷର ଶିଶୁ କନ୍ୟା ଘରେ ଶୋଇଥିବା ବେଳେ ବିଷଧର ନାଗ ସାପ ଛାଡି ହତ୍ୟା କରିିଥିବା ଅଭିଯୋଗରେ ଗିରଫ ଅଭିଯୁକ୍ତ ଗଂଜାମ ଜିଲ୍ଲା କବିସୂର୍ଯ୍ୟନଗର କେ, ଗଣେଶପାତ୍ରଙ୍କୁ ସହଯୋଗ କରିଥିବା ଅଭିଯୋଗରେ ସାପୁଆ କେଳା ବସନ୍ତ ଆଚାର୍ଯ୍ୟ ଗିରଫ।
ଅକ୍ଟୋବର ୭ରେ ଚରିତ୍ର ଉପରେ ସନ୍ଦେହ କରି ମୁଖ୍ୟ ଅଭିଯୁକ୍ତ ଏହିପରି ଏକ ଅପରାଧ ଘଟାଇଥିଲା ବୋଲି ଅଭିଯୋଗ ରହିଛି। ଏବେ ଦେଢ ମାସ ପରେ ଏହି ଘଟଣା ଉପରୁ ପରଦା ହଟୁଛି।
ପୋଲିସ ଏବେ ଏହି ମାମଲାରେ ଅଭିଯୁକ୍ତ ସାପୁଆ କେଳାକୁ ଜଏମଏଫସି କୋର୍ଟରେ ହାଜର କରି ବୟାନ ରେକର୍ଡ କରିଛି। ଏବେ ଏହି ଘଟଣା ସମାଜରେ ଶୋକର ଛାୟା ଖେଳାଇ ଦେଇଥିବା ବେଳେ ସାପର ବେଆଇନ କାରବାରକୁ ନେଇ ଚିନ୍ତା ପ୍ରକଟ କରିଛି।
ଏପରି ଅପରାଧ ଘଟାଇବା ପାଇଁ 3 ମାସ ପୂର୍ବରୁ ହୋଇଥିଲା ପ୍ପାନିଂ। ସପ୍ତାହେ ପୂର୍ବରୁ ଅଭିଯୁକ୍ତ ଗଣେଶ ନୂଆ ସିମ୍ କିଣିଥିଲା। ଏହାପରେ ଅନେକ ସାପୁଆ କେଳାଙ୍କୁ ଯୋଗାଯୋଗ କରିଥିଲା। ଅଭିଯୁକ୍ତର କଲ ଡିଟେଲ୍ସ ରେକର୍ଡ ଆସିବା ପରେ ପୋଲିସ ଏହି ସୂଚନା ଦେଇଛି।
ପ୍ରଧାନ ମୁଖ୍ୟ ବନ ସଂରକ୍ଷକ (ପିସିସିଏଫ୍) ସୁଶାନ୍ତ ନାଡା ଘଟଣାର ତଦନ୍ତ ନିର୍ଦ୍ଦେଶ ଦେବା ସହ ଅଭିଯୁକ୍ତମାନେ କିଭଳି ନାଗସାପକୁ ପାଇଲେ ଏବଂ ତା’ପରେ ସରୀସୃପକୁ ହତ୍ୟା କରାଗଲା କି ନାହିଁ ସେ ନେଇ ରିପୋର୍ଟ ଦେବାକୁ ବିଭାଗୀୟ ବନ ଅଧିକାରୀ (ଡିଏଫ୍ଓ)ଙ୍କୁ ନିର୍ଦ୍ଦେଶ ଦେଇଛନ୍ତି।
ପୁଲିସ ତଦନ୍ତରୁ ଜାଣିବାକୁ ପାଇଛି ଯେ କବିସୂର୍ଯ୍ୟନଗର ଥାନା ଅଧିନ ଅଧେଇବାଡ଼ା ଗ୍ରାମର କେ. ଗଣେଶ ନାମକ ଜଣେ ପ୍ରବାସୀ ଶ୍ରମିକ ତାଙ୍କ ପତ୍ନୀ କେ. ବାସନ୍ତୀ ପାତ୍ର ଏବଂ ତାଙ୍କ ଦୁଇ ବର୍ଷର ଝିଅଙ୍କୁ ହତ୍ୟା କରିଛନ୍ତି।
ପୁଲିସ ପ୍ରଥମେ ସାପ କାମୁଡ଼ା ମୃତ୍ୟୁ ମାମଲା ରୁଜୁ କରିଥିବା ବେଳେ ପରେ ଏହା ଏକ ହତ୍ୟାକାଣ୍ଡ ବୋଲି ଜଣାପଡ଼ିବା ପରେ ତଦନ୍ତରୁ ଜଣାପଡ଼ିଥିଲା ଯେ ଗଣେଶ ହିଁ ନିଜ ସ୍ତ୍ରୀ ଓ ଝିଅକୁ ମାରିବା ପାଇଁ ଏହି ସାପକୁ ବ୍ୟବହାର କରିଥିଲା। ନଭେମ୍ବର ୨୩ ତାରିଖରେ ଗଣେଶଙ୍କୁ ଗିରଫ କରାଯାଇଥିଲା।
ପିସିସିଏଫ୍ ସୁଶାନ୍ତ ନାଡା ଗତକାଲି କହିଥିଲେ, ଏହି ସାପର ଉତ୍ସ, ଏହି ସାପ ଯୋଗାଣରେ କିଏ ଜଡ଼ିତ ଅଛନ୍ତି ଏବଂ ସାପଟି ଜୀବିତ ନା ମୃତ ତାହା ତଦନ୍ତ କରିବାକୁ ସମ୍ପୃକ୍ତ ଅଧିକାରୀଙ୍କୁ ନିର୍ଦ୍ଦେଶ ଦିଆଯାଇଛି। ସାପ ବ୍ୟବସାୟରେ ଲିପ୍ତ ଥିବା ପ୍ରତ୍ୟେକ ବ୍ୟକ୍ତିଙ୍କ ବିରୋଧରେ ଆଇନ ଅନୁଯାୟୀ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
ବିଷାକ୍ତ ସାପକୁ ବନ୍ୟପ୍ରାଣୀ ସୁରକ୍ଷା ଆଇନ୍ ୧୯୭୨ର ଅନୁସୂଚୀ-୨ ଅନୁଯାୟୀ ଆଇନ୍ ଦ୍ୱାରା ସୁରକ୍ଷା ଦିଆଯାଇଥାଏ। ଏହି ସାପକୁ ମାରିବା କିମ୍ବା ନିଜ ପାଖରେ ରଖିବା ପାଇଁ ସର୍ବାଧିକ ୩ରୁ ୭ ବର୍ଷ ଯାଏଁ ଜେଲ ଦଣ୍ଡ କିମ୍ବା ୧୦ ହଜାର ଟଙ୍କା ଯାଏଁ ଜୋରିମାନା ହୋଇପାରେ।
Comments are closed.