ଅଭାବୀ ଝିଅର ଅଭାବ ବୁଝିଲା ଅଟୋ

ନବରଙ୍ଗପୁର: କୁହନ୍ତି, ପୁରୁଷ କାନ୍ଧରେ ଦାୟିତ୍ବ ଆସିଲେ ସେ ଷ୍ଟିୟରିଂ ଧରେ । ଘରର ଦାୟିତ୍ବ ପୁରୁଷ କାନ୍ଧରେ ନ୍ୟସ୍ତ ଥାଏ । ହେଲେ ଆଜିର ନାରୀ ଚିନ୍ତାଧାରାର ଶିକୁଳିକୁ ମୁକ୍ତ କରିଛି । ପୁରୁଷ କାନ୍ଧରୁ ଦାୟିତ୍ବ ଓହ୍ଲାଇବା ଠାରୁ ଆରମ୍ଭ କରି ନିଜେ ଷ୍ଟିୟରିଂ ଧରି ଯାତ୍ରୀଙ୍କୁ ନେଇ ଗନ୍ତବ୍ୟସ୍ଥଳରେ ପହଞ୍ଚାଇବା ପର୍ଯ୍ୟନ୍ତ…. ଏବେ ନାରୀ ସବୁ ସଫଳ ରୂପକ କରିବାରେ ସିଦ୍ଧ ହସ୍ତୀ ହୋଇସାରିଛି । ଯାହାର ଝଲକ ସ୍ବରୂପ ଏବେ ନୂଆଦିଲ୍ଲୀ ଠାରୁ ଆରମ୍ଭ କରି ନବରଙ୍ଗପୁର ସବୁଠି ମହିଳା ଶକ୍ତିର ଚକ ଘିର ଘିର କରି ବୁଲୁଛି ।

ସେମିତି ଏବେ ଉପାନ୍ତ ଅଞ୍ଚଳର ଆଉ ଏକ ନାରୀ ପାଲଟି ଯାଇଚନ୍ତି ପୂରା ନବରଙ୍ଗପୁରର ଉତ୍ସାହ । ନବରଙ୍ଗପୁର ଜିଲ୍ଲାର ଚନ୍ଦାହାଣ୍ଡି ଭଳି ଉପାନ୍ତ ବ୍ଲକରେ ଜଣେ ମହିଳାଙ୍କ ସାହାରା ସାଜିଛି ଏବେ ଅଟୋରିକ୍ସା । ନିଜ କୁନି ଝିଅ ପେଟକୁ ମୁଠିଏ ଦାନା, ଆଉ ବୁଢା ବାପା ମାଙ୍କୁ ପୋଷିବା ପାଇଁ ପାଲଟିଥିଲେ, ପୂରା ନବରଙ୍ଗପୁର ଜିଲ୍ଲାର ପ୍ରଥମ ମହିଳା ଅଟୋଚାଳକ । ଏବେ ସେ ସ୍ବୟଂ ସିଦ୍ଧା, ଅଟୋ ଚଳାଇ ବେଶ୍ କିଛି ରୋଜଗାର କରି ଖୁସିରେ ନିଜ ପରିବାର ପୋଷୁଛନ୍ତି ଲକ୍ଷ୍ମୀ ।

ଲକ୍ଷ୍ମୀଙ୍କ କାହାଣୀ ଆଜି ଲକ୍ଷ୍ମୀକୁ ବଡ କରିଛି । ନବରଙ୍ଗପୁର ଜିଲ୍ଲା ଚନ୍ଦାହାଣ୍ଡି ବ୍ଲକ ଜୁନାପାଣି ଗ୍ରାମର ସାହାସୀ ଝିଅ ଲକ୍ଷ୍ମୀ ସିହ୍ନା ଛତିଶଗଡ଼ ରାଜ୍ୟ ଗରୀୟାବନ୍ଦରେ ବାହା ହୋଇ ଥିଲେ । ହେଲେ ବାହା ହେବାର ତିନି ବର୍ଷ ପରେ ସ୍ୱାମୀ ସହ ନ ପଡିବାରୁ ନିଜ ଛୋଟ ଝିଅ ସହ ବାପା ଘର ଚାଲି ଆସିଥିଲେ । ଏହା ପରେ ଆଉ ପଛକୁ ଚାହିଁ ନାହାନ୍ତି ଲକ୍ଷ୍ମୀ । ବାପା, ମାଙ୍କର ପୁଅ ନାହିଁ, ସାହା ଭରଷା ସବୁ ଲକ୍ଷ୍ମୀ, ଆଉ କାଖରେ କୁନି ଝିଅ । ତାକୁ ବଡ କରି ମଣିଷ କରିବା, ବୁଢା ବାପାମାଙ୍କ ଯତ୍ନ ନେବା, ସବୁଗୁଡା ଦାୟିତ୍ବ ଯେମିତି ଲକ୍ଷ୍ମୀଙ୍କ ଆଖି ଆଗରେ ନାଚି ଉଠିଥିଲା । ତେଣୁ ନିଜ ସ୍ବାଭିମାନରେ ବଞ୍ଚିବାକୁ ସ୍ଥିର କରି ବାପା ମାଙ୍କ ଚାଷ ଜମି ବନ୍ଧକ ରଖି ସେଥିରେ ଇଲେକେଟ୍ରିକ ଅଟୋ ଖଣ୍ଡିଏ ଋଣ କରି କିଣିଲେ ଲକ୍ଷ୍ମୀ । ଏବେ ସେ ସେହି ଅଟୋ ଚଲାଇ ସ୍ବାବାଲମ୍ବୀ । ଅଟୋରେ ସ୍କୁଲରୁ ପିଲାଙ୍କୁ ନେବା ଆଣିବା, ମେଡିକାଲରୁ ରୋଗୀଙ୍କୁ ଘରେ ପହଂଚଇବା ଇତ୍ୟାଦି ହେଉଛି ଲକ୍ଷ୍ମୀଙ୍କର ଦିନ ତମାମ କାମ । ତା ସାଙ୍ଗକୁ ପୁଣି ଗୋଟେ ଛୋଟ ଦୋକାନ ଖୋଲିଛନ୍ତି ପରିବାର ପ୍ରତି ପୋଷଣ କରୁଛନ୍ତି ଲକ୍ଷ୍ମୀ ।

ହେଲେ ଏତିକିରେ ଲକ୍ଷ୍ମୀଙ୍କ ଦୁଃଖ ସରିନି, ଅଭାବୀ ଝିଅ ଏବେ ବି ସଂଘର୍ଷ କରୁଛି । ଅସହାୟ ନୁହେଁ ସତ ହେଲେ ସରକାରୀ ସହାୟତାରୁ ପୂରା ବଞ୍ଚିତ । ନିଜର ଘର ଖଣ୍ଡିଏ ନଥିବାରୁ ପଂଚାୟତର ଏକ ଷ୍ଟଲ ଭଡାରେ ନେଇ ସେଇଠି ରହୁଛନ୍ତି । ଏଥିପାଇଁ ଗଣମାଧ୍ୟମ ଜରିଆାରେ ସରକାରଙ୍କୁ ଅନୁରୋଧ କରିଛନ୍ତି ଲକ୍ଷ୍ମୀ । ଲକ୍ଷ୍ମୀଙ୍କ ସାହାସକୁ ସରକାରଙ୍କ ସହଯୋଗର ହାତ ଆବଶ୍ୟକ । ରହିବା ପାଇଁ ଘର ଖଣ୍ଡେ, ରାସନ କାର୍ଡ ଏବଂ ଝିଅର ପାଠ ପଢା ବାବଦ ସରକାରଙ୍କୁ ଅନୁରୋଧ କରିଛନ୍ତି ଲକ୍ଷ୍ମୀ । ତେବେ ଏନେଇ ଆମ ପ୍ରତିନିଧି ଚନ୍ଦାହାଣ୍ଡି ଗୋଷ୍ଠୀ ଉନ୍ନୟନ ଅଧିକାରୀ ସୁକାନ୍ତ କୁମାର ପଟ୍ଟନାୟକଙ୍କ ସହ ଯୋଗାଯୋଗ କରିବା ପରେ, ଲକ୍ଷ୍ମୀଙ୍କ ସାହସିକ ପଦକ୍ଷେପକୁ ପ୍ରଶଂସା କରି ସରକାରଙ୍କ ପକ୍ଷରୁ ଯାହା ସୁବିଧା ହେବ ତାହା ଯୋଗାଇ ଦେବେ ବୋଲି ମତ ରଖିଛନ୍ତି ଗୋଷ୍ଠୀ ଉନୟନ ଅଧିକାରୀ ।