ୱାକଫ ବିଲ୍‌ ସମର୍ଥନ ନେଇ ବିଜେଡି ସୁପ୍ରିମୋଙ୍କୁ ନରସିଂହଙ୍କ ଟାର୍ଗେଟ, ବାହ୍ୟ ଶକ୍ତି କଥା କହି ପ୍ରସନ୍ନ କଲେ ସନ୍ଦେହ

ଭୁବନେଶ୍ୱର: ବିଜୁ ଜନତା ଦଳ (ବିଜେଡି)ର ସଦସ୍ୟ ରାଜ୍ୟସଭାରେ ୱାକଫ (ସଂଶୋଧନ) ବିଲ୍‌କୁ ସମର୍ଥନ ଦେବା ନିଷ୍ପତ୍ତି ଦଳ ଭିତରେ ବିଭେଦ ସୃଷ୍ଟି କରିବା ସହ ବିରୋଧୀ ଦଳଗୁଡ଼ିକୁ ଆକ୍ରମଣର ସୁଯୋଗ ଦେଇଛି। ବରିଷ୍ଠ କଂଗ୍ରେସ ନେତା ତଥା ପୂର୍ବତନ ବିରୋଧୀ ଦଳ ନେତା ନରସିଂହ ମିଶ୍ର ରବିବାର ଗଣମାଧ୍ୟମ ଆଗରେ ବିଜେଡିର ଶୀର୍ଷ ନେତୃତ୍ୱ ବିରୋଧରେ ସଙ୍ଗୀନ ଅଭିଯୋଗ ଆଣିଛନ୍ତି। ସେ ଦଳର ସ୍ୱାୟତ୍ତତା ଓ ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ରାଜନୈତିକ ସ୍ୱାଧୀନତା ଉପରେ ପ୍ରଶ୍ନ ଉଠାଇଛନ୍ତି।

ନରସିଂହ ମିଶ୍ର ଅଭିଯୋଗ କରିଛନ୍ତି ଯେ ବିଜେଡି ସଭାପତି ନବୀନ ପଟ୍ଟନାୟକଙ୍କୁ କେବଳ ବର୍ତ୍ତମାନ ନୁହେଁ, ଅତୀତରେ ମଧ୍ୟ ‘ଗୃହବନ୍ଦୀ’ ଅବସ୍ଥାରେ ରଖାଯାଇଛି। ସେ କହିଛନ୍ତି, “ଓଡ଼ିଶାରେ ବିଜେଡିର ଅସ୍ତିତ୍ୱ ଆଉ ରହିବ ନାହିଁ। ଏପରି ଲାଗୁଛି ଯେ ବିଜେଡି ନେତାମାନେ ବିଜେପି ସହ ମିଶିବାକୁ ଯାଉଛନ୍ତି କିମ୍ବା ଏକ ମିଳିତ ମନ୍ତ୍ରିମଣ୍ଡଳ ଗଠନ ହୋଇପାରେ। ନବୀନ ପଟ୍ଟନାୟକଙ୍କର ଆଉ ଦଳରେ ନିୟନ୍ତ୍ରଣ ନାହିଁ। ତାଙ୍କ ମୁଖ୍ୟ ପରାମର୍ଶଦାତା ପରଦା ପଛରୁ ସବୁ ନିୟନ୍ତ୍ରଣ କରୁଛନ୍ତି। ତାଙ୍କୁ ପୁଣି ଥରେ ଗୃହବନ୍ଦୀ କରାଯାଇଛି, ଯାହା ପୂର୍ବରୁ ମଧ୍ୟ ହୋଇଥିଲା।”

ସେ ଆହୁରି ଅଭିଯୋଗ କରିଛନ୍ତି ଯେ ବିଜେଡି ନିଜର ସ୍ୱାଧୀନତା ହରାଇଛି ଏବଂ କେନ୍ଦ୍ର ସରକାରଙ୍କ ସହ ଏକ ‘ଭିତିରିଆ ଡିଲ କରିଛି। “ନବୀନଙ୍କୁ ଦିଲ୍ଲୀ ନିଆଯାଇ ତାଙ୍କ ନାଁରେ ଡିଲ କରାଯାଇଛି। ଏହା ଆଉ ସେହି ବିଜେଡି ନୁହେଁ, ଯାହା ବିଜୁ ପଟ୍ଟନାୟକଙ୍କ ଆଦର୍ଶକୁ ଆଧାର କରି ଗଠନ ହୋଇଥିଲା,” ବୋଲି ପୂର୍ବତନ ମନ୍ତ୍ରୀ କହିଛନ୍ତି।

ଅନ୍ୟପକ୍ଷରେ, ବିଜେଡିର ବରିଷ୍ଠ ନେତା ପ୍ରସନ୍ନ ଆଚାର୍ଯ୍ୟ ମଧ୍ୟ ରବିବାର ଦଳର ଏହି ନିଷ୍ପତ୍ତି ନେଇ ଅସନ୍ତୋଷ ପ୍ରକାଶ କରିଛନ୍ତି। ଗଣମାଧ୍ୟମ ଆଗରେ ସେ କହିଛନ୍ତି, “ଷଡ଼ଯନ୍ତ୍ର ହୋଇଥିଲା କି ନାହିଁ, ମୁଁ ଜାଣିନାହିଁ। କିନ୍ତୁ ଏକ କଥା ସ୍ପଷ୍ଟ ଯେ ସସ୍ମିତ ପାତ୍ରଙ୍କର ଏତେ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ଏକାକୀ ନେବାର ଅଧିକାର ନାହିଁ।” ସେ ପ୍ରଶ୍ନ ଉଠାଇଛନ୍ତି ଯେ ସଂସଦର ସଦସ୍ୟମାନେ ବୈଠକରେ ବିଲ୍‌ର ବିରୋଧ କରିବାକୁ ନିଷ୍ପତ୍ତି ନେଇଥିବା ବେଳେ ପରେ ନିଷ୍ପତ୍ତି କିଏ ବଦଳାଇଲେ, କାହିଁକି ଓ କେଉଁ କାରଣରୁ ବଦଳାଇଲେ, ତାହା କେବଳ ସସ୍ମିତ ସ୍ପଷ୍ଟ କରିପାରିବେ।

ପରଦା ପଛରେ କିଏ ଶକ୍ତିଶାଳୀ?
ପ୍ରସନ୍ନ ଆଚାର୍ଯ୍ୟ ସୂଚନା ଦେଇଛନ୍ତି ଯେ ଦଳ ଭିତରେ ଏକ ଆଲୋଚନା ଚାଲିଛି ଯେ କିଏ ପରଦା ପଛରୁ ଗୁରୁତ୍ୱପୂର୍ଣ୍ଣ ନିଷ୍ପତ୍ତିଗୁଡ଼ିକୁ ପ୍ରଭାବିତ କରୁଛି। ସେ କହିଛନ୍ତି, “ଅନେକ ନେତାଙ୍କ ମନରେ ସନ୍ଦେହ ଉପୁଜିଛି ଯେ କେହି ଜଣେ ଛାୟାରେ ରହି ଦଳୀୟ କାର୍ଯ୍ୟ ପରିଚାଳନା କରୁଛନ୍ତି। ଏଭଳି ପଦକ୍ଷେପ କେତେବେଳେ ଦଳର ଲାଭ ଆଣେ, କିନ୍ତୁ ଅନେକ ସମୟରେ ଗୁରୁତର ପରିଣାମ ଭୋଗିବାକୁ ପଡ଼େ।”

“ଯଦି ବାହାରୁ କୌଣସି ଶକ୍ତି ଦଳର ନିଷ୍ପତ୍ତିକୁ ନିୟନ୍ତ୍ରଣ କରେ, ତାହେଲେ ଅସ୍ଥିରତା ହେବା ସ୍ୱାଭାବିକ। ଏହି ବାହ୍ୟ ହସ୍ତକ୍ଷେପର ଧାରଣାକୁ ତୁରନ୍ତ ସମାଧାନ କରାଯିବା ଦରକାର।” ଏହି ନିଷ୍ପତ୍ତି ପଛରେ କିଏ ଓ କାହିଁକି ଏହା ଘଟିଲା, ତାହା ସ୍ପଷ୍ଟ ନ ହେବା ଯାଏଁ ଦଳ ଭିତରେ ଅସନ୍ତୋଷ ଜାରି ରହିବ।

ଦଳ ଭିତରେ ଅସନ୍ତୋଷର ସ୍ୱର ଉଚ୍ଚରେ ଶୁଣାଯାଉଥିବା ବେଳେ ଆଗାମୀ ଦିନରେ ବିଜେଡି ନେତୃତ୍ୱ ଏହାର ଜବାବ ଦେବେ ନା ଚୁପ ରହିବେ, ତାହା ଉପରେ ସମସ୍ତଙ୍କ ନଜର ରହିଛି।