ନୂଆଦିଲ୍ଲୀ: ଆଗାମୀ ଦିନରେ ସୌର ଗତିବିଧି ବୃଦ୍ଧି ପାଇବାର ସମ୍ଭାବନା ରହିଛି ବୋଲି ନାସା ଚେତାବନୀ ଦେଇଛି । ଏହି ସୌର ଝଡ଼ ଦ୍ବାରା ପୃଥିବୀରେ ସଂଚାର, ନାଭିଗେସନ୍ ସିଷ୍ଟମ ଏବଂ ଏପରିକି ପାୱାର ଗ୍ରୀଡକୁ ମଧ୍ୟ ବାଧାପ୍ରାପ୍ତ ହୋଇପାରେ । ନାସାର ସୋଲାର ଡାଇନାମିକ୍ସ ଅବଜରଭେଟୋରୀ ଦ୍ୱାରା କଏଦ ହୋଇଥିବା ବର୍ଷର ସବୁଠାରୁ ଶକ୍ତିଶାଳୀ ସୌର ଜ୍ୱାଳା ପରେ ଏହି ଚେତାବନୀ ଆସିଛି ।
ସୂଚନା ମୁତାବକ, ଏକ ନୂତନ ସକ୍ରିୟ ସନ୍ ସ୍ପଟ୍ AR4087 ରୁ ଏକ ଶକ୍ତିଶାଳୀ X2.7 ଶ୍ରେଣୀର ସୌର ଜ୍ୱାଳା ଉଦଗରିତ ହୋଇଥିଲା ଏବଂ ମେ 14 ତାରିଖରେ ଏହାର ଶୀର୍ଷରେ ପହଞ୍ଚିଥିଲା, ଯାହା ଫଳରେ ୟୁରୋପ, ଏସିଆ ଏବଂ ମଧ୍ୟପ୍ରାଚ୍ୟର କିଛି ଅଂଶରେ ଅସ୍ଥାୟୀ ରେଡିଓ ବ୍ଲାକଆଉଟ୍ ହୋଇଥିଲା । ଆମେରିକା ସ୍ଥିତ ନ୍ୟାସନାଲ ଓସେନିକ୍ ଆଣ୍ଡ୍ ଆଟମୋସ୍ଫେରିକ୍ ଆଡମିନିଷ୍ଟ୍ରେସନ୍ (NOAA) ଅନୁଯାୟୀ, କିଛି ଅଞ୍ଚଳରେ ଉଚ୍ଚ ଆବୃତ୍ତି ସଂଚାର ବ୍ୟବଧାନ ପ୍ରାୟ ଦଶ ମିନିଟ୍ ପର୍ଯ୍ୟନ୍ତ ରହିଥିଲା ।
ନାସା ଏବଂ NOAAର ମହାକାଶ ପାଣିପାଗ ପୂର୍ବାନୁମାନ କେନ୍ଦ୍ର ଦ୍ୱାରା ସୌର ଗତିବିଧି ଉପରେ ନିରନ୍ତର ମନିଟରିଂ କରାଯାଏ । ନାସା ଚେତାବନୀ ଦେଇଛି ଯେ ଆଗକୁ ଆହୁରି ସୌର ଜ୍ୱାଳା ମହାକାଶଚାରୀ, ଉପଗ୍ରହ ଏବଂ GPS ସିଷ୍ଟମ, ନାଭିଗେସନ୍ ଏବଂ ପାୱାର ଗ୍ରୀଡ୍ ଭଳି ପୃଥିବୀ-ଭିତ୍ତିକ ପାଓ୍ବାର ଗ୍ରେଡ୍ କୁ ପ୍ରଭାବିତ କରିପାରେ ।
ସୌର ଜ୍ୱାଳା କ’ଣ?
ସୌର ଜ୍ୱାଳା ହେଉଛି ସୂର୍ଯ୍ୟ ପୃଷ୍ଠରୁ ହଠାତ୍ ତୀବ୍ର ବିକିରଣ ବିସ୍ଫୋରଣ, ଯାହା ପ୍ରାୟତଃ ସନ୍ ସ୍ପଟ୍ ଗତିବିଧି ସହିତ ଜଡିତ । ଏହି ଜ୍ୱାଳା ଗୁଡ଼ିକ ପୃଥିବୀର ଅନେକ ପ୍ରଣାଳୀକୁ ପ୍ରଭାବିତ କରିପାରେ । ଏଗୁଡ଼ିକ ଉଚ୍ଚ-ଶକ୍ତିଯୁକ୍ତ ଏବଂ ମାତ୍ର 8 ମିନିଟରେ ଆଲୋକର ବେଗରେ ପୃଥିବୀରେ ପହଞ୍ଚିଥାଏ । ଯେତେବେଳେ ସୂର୍ଯ୍ୟରୁ ନିର୍ଗତ ଏହି ତୀବ୍ର ଶକ୍ତି ଏବଂ ଚାର୍ଜିତ କଣିକା (ପ୍ରୋଟନ୍) ପୃଥିବୀର ବାୟୁମଣ୍ଡଳରେ ଆଘାତ କରେ, ତାହାକୁ ସୌର ଝଡ଼ କୁହାଯାଏ ।
କ’ଣ ପଡିବ ପ୍ରଭାବ?
ଆଜିର ବିଶ୍ୱ ସମ୍ପୂର୍ଣ୍ଣ ଭାବରେ ଟେକନୋଲୋଜି ଉପରେ ନିର୍ଭରଶୀଳ, ଯେଉଁଥିରେ ସାଟେଲାଇଟ୍, ବିଦ୍ୟୁତ୍ ଗ୍ରୀଡ୍ ଏବଂ ସଂଚାର ବ୍ୟବସ୍ଥା ଅନ୍ତର୍ଭୁକ୍ତ । ଏହି ସୌର ଝଡ଼ ଏହି ସିଷ୍ଟମଗୁଡ଼ିକୁ ସର୍ବାଧିକ କ୍ଷତି ପହଞ୍ଚାଇପାରେ । ୧୮୫୯ ମସିହାର କ୍ୟାରିଂଟନ୍ ଘୂର୍ଣ୍ଣିବାତ୍ୟା ଏତେ ଶକ୍ତିଶାଳୀ ଥିଲା ଯେ ଏହା ଟେଲିଗ୍ରାଫ୍ ତାରଗୁଡ଼ିକୁ ନଷ୍ଟ କରିଦେଇଥିଲା । ୨୦୦୩ ମସିହାରେ ଆସିଥିବା ହାଲୋୱିନ୍ ଝଡ଼ କ୍ୟାରିଂଟନ୍ ଝଡ ଅପେକ୍ଷା ଦଶ ଗୁଣା ଦୁର୍ବଳ ଥିଲା, ତଥାପି ଏହା ସାଟେଲାଇଟ୍ କକ୍ଷପଥରେ ଧ୍ୱଂସ ସୃଷ୍ଟି କରିଥିଲା । ୨୦୨୪ ମସିହାରେ ଆସିଥିବା ଘୂର୍ଣ୍ଣିବାତ୍ୟା ଗୈନନ୍ ମଧ୍ୟ ସାଟେଲାଇଟ୍ ସିଷ୍ଟମକୁ ଗୁରୁତର ଭାବରେ ପ୍ରଭାବିତ କରିଥିଲା ।
Comments are closed.