ଚେନ୍ନାଇ: ଏଠାରେ ଚାଲିଥିବା ଜାତୀୟ ସିନିୟର ପୁରୁଷ ହକିରେ ଓଡିଶାର ପ୍ରଭାବୀ ପ୍ରଦର୍ଶନ ଜାରୀ ରହିଛି । ଶୁକ୍ରବାର ଅନୁଷ୍ଠିତ ସେମିଫାଇନାଲରେ ଓଡିଶା ୪-୨ ଗୋଲରେ ମଣିପୁରକୁ ପରାସ୍ତ କରି ଫାଇନାଲରେ ପ୍ରବେଶ କରିଛି । ଅନ୍ୟ ଏକ ସେମିଫାଇନାଲରେ ହରିୟାଣା ୩-୨ ଗୋଲରେ ଉତରପ୍ରଦେଶକୁ ପରାସ୍ତ କରିଛି । ଓଡିଶା ଓ ହରିୟାଣା ମଧ୍ୟରେ ଫାଇନାଲ ମ୍ୟାଚ ଖେଳାଯିବ । ଓଡିଶା ପ୍ରଥମ ଥର ପାଇଁ ଫାଇନାଲରେ ପ୍ରବେଶ କରିଛି । ଏହା ପୂର୍ବରୁ ତୃତୀୟ ସ୍ଥାନ ହାସଲ ଓଡିଶାର ଶ୍ରେଷ୍ଠ ପ୍ରଦର୍ଶନ ଥିଲା ।
ମ୍ୟାଚର ୭ମ ମିନିଟରେ ନୀଳକାନ୍ତ ଶର୍ମା ମଣିପୁର ପକ୍ଷରୁ ପ୍ରଥମ ଗୋଲ ସ୍କୋର କରିଥିଲେ । ୨୦ତମ ମିନିଟରେ ନୀଲମ ସଞ୍ଜୀପ ଖେସଙ୍କ ଗୋଲ ବଳରେ ଓଡିଶା ମ୍ୟାଚକୁ ୧-୧ ସମାନ ସ୍ଥିତିକୁ ଆଣିଥିଲା । ଗନେନ୍ଦ୍ରଜିତ ନିନୋଗୋମ୍ବାମ ୨୫ତମ ମିନିଟରେ ଗୋଲ କରି ମଣିପୁରକୁ ୨-୧ରେ ଅଗ୍ରଣୀ କରାଇଥିଲେ । ଦ୍ୱିତୀୟାର୍ଦ୍ଧରେ ଓଡିଶା ଟିମ ଆକ୍ରମଣାତ୍ମକ ପ୍ରଦର୍ଶନ କରି ମ୍ୟାଚକୁ ସମାନ ସ୍ଥିତିକୁ ଆଣି ଦେଇଥିଲା । ସୁଦୀପ ଚିରମାକୋ ଓ ପ୍ରଦୀପ କୁଜୁର ୨ଟି ଗୋଲ କରିବା ଫଳରେ ଓଡିଶା ବିଜୟ ହାସଲ କରିଥିଲା ।