ଭୁବନେଶ୍ବର: ଆଜି ଅର୍ଥାତ୍ ଡିସେମ୍ବର ୨୬ ତାରିଖ, ବିଜୁ ଜନତା ଦଳର ୨୮ ତମ ପ୍ରତିଷ୍ଠା ଦିବସ । ୨୭ ବର୍ଷର ନିରବଚ୍ଛିନ୍ନ ସେବା ଦେଇଥିବା ବିଜେଡି ଏବେ କ୍ଷମତା ଚ୍ୟୁତ ହୋଇଛି । ଆଉ ଆଜି ୨୮ ବର୍ଷରେ ପାଦ ଥାପିଛି ବିଜେଡି । ବିଡେଡି ଦଳର ପ୍ରତିଷ୍ଠା ଦିବସ ଉପଲକ୍ଷେ ବିଭିନ୍ନ ସ୍ଥାନରେ ସ୍ୱତନ୍ତ୍ର କାର୍ଯ୍ୟକ୍ରମ ଅନୁଷ୍ଠିତ ହେଉଛି । ଏତିପାଇଁ ଶଙ୍ଖ ଭବନରେ ମଧ୍ୟ ରାଜ୍ୟସ୍ତରୀୟ କାର୍ଯ୍ୟକ୍ରମ ଆୟୋଜିତ ହୋଇଛି । ପ୍ରବାଦ ପୁରୁଷ ବିଜୁ ପଟ୍ଟନାୟକଙ୍କ ବିକଶିତ ଓଡିଶାର ସ୍ୱପ୍ନକୁ ସାକାର କରିବାରେ ନବୀନଙ୍କ ଗୁରୁତ୍ବପୂର୍ଣ୍ଣ ଭୂମିକା ଏବଂ ଏକ ବିକଶିତ ଓଡିଶା ଗଢିବାରେ ବିଜେଡିର ଭୂମିକା ନେଇ ଆଜି ଉଦବୋଧନ ଦେଇଛନ୍ତି ସୁପ୍ରିମୋ ନବୀନ ପଟ୍ଟନାୟକ ।
ଏନେଇ ନିଜ ଏକ୍ସରେ ବିଜେଡିର ୨୮ ତମ ବର୍ଷ ପୂର୍ତ୍ତି ଦିବସରେ ସାରା ଓଡିଶାବାସୀଙ୍କୁ ସମ୍ବୋଧିତ କରିଛନ୍ତି ନବୀନ । ଲେଖିଛନ୍ତି, ଓଡିଶାବାସୀଙ୍କ ବିଶ୍ୱାସ ଓ ଭରସାକୁ ଅତୁଟ ରଖି ବିଜେଡି ଦୃଢତାର ସହ ଆଗକୁ ବଢୁଛି । କର୍ମୀଙ୍କ ନିଷ୍ଠା ଓ ଉତ୍ସର୍ଗୀକୃତ କାର୍ଯ୍ୟ ବିଜେଡିକୁ ଶ୍ରେଷ୍ଠ ଆଞ୍ଚଳିକ ଦଳର ପରିଚୟ ଦେଇଛି । ଓଡିଶାର ହକ ପାଇଁ ଲଢେଇରେ ବିଜେଡି କେବେ ପଛଘୁଞ୍ଚା ଦେବ ନାହିଁ ବୋଲି ନବୀନ କହିଛନ୍ତି । ଏଥିସହିତ ଦଳର ୨୮ ତମ ପ୍ରତିଷ୍ଠା ଦିବସରେ ଏନେଇ ସଙ୍କଳ୍ପବଦ୍ଧ ହେବା ପାଇଁ ସମସ୍ତଙ୍କୁ ସମ୍ବୋଧିତ କରିଚନ୍ତି । ଏକ ହୋଇ ଓଡିଶାବାସୀଙ୍କ ସେବାରେ ଲଢେଇକୁ ଜୋରଦାର କରିବା ବୋଲି ଆହ୍ବାନ ଦେଇଛନ୍ତି ।