ନିର୍ଭୟା ମାମଲାରେ ନୂଆ ଡେଥ୍ ୱାରେଣ୍ଟ ପିଟିସନର ଶୁଣାଣି କରିବେ ପଟିଆଲା ହାଉସ୍ କୋର୍ଟ

ନୂଆଦିଲ୍ଳୀ: ନିର୍ଭୟାଙ୍କ ଚାରି ଦୋଷୀ ଫାଶୀ ଖୁଣ୍ଟରେ କେବେ ଝୁଲିବେ? ଦୁଇ ଦୁଇ ଥର ଫାଶୀ ତାରିଖ ଘୁଞ୍ଚିବା ପରେ ଆଜି ନୂଆ ଡେଥ୍ ୱାରେଣ୍ଟ ଜାରି କରି ପାରନ୍ତି ପଟିଆଲା ହାଉସ୍ କୋର୍ଟ । ଏସମ୍ପର୍କିତ ପିଟିସନର ଆଜି ଶୁଣାଣି ରହିଛି । ନୂଆ ଡେଥ୍ ୱାରେଣ୍ଟ ଜାରି କରିବା ପାଇଁ ଗତକାଲି ପିଟିସନ୍ ଫାଇଲ୍ କରିଥିଲେ ନିର୍ଭୟାଙ୍କ ବାପା-ମାଆ । ଏହାପରେ ଆଜି ସୁଦ୍ଧା ଜବାବ ଦାଖଲ କରିବା ପାଇଁ ଚାରି ଦୋଷୀଙ୍କ ସମେତ ସମସ୍ତ ପକ୍ଷଙ୍କୁ ନୋଟିସ ଜାରି କରିଥିଲେ କୋର୍ଟ । ସେପଟେ ଗତକାଲି ଚାରି ଦୋଷୀଙ୍କୁ ଏକାସଙ୍ଗେ ଫାଶୀ ଦେବାକୁ ନେଇ ଦିଲ୍ଲୀ ହାଇକୋର୍ଟଙ୍କ ରାୟ ଉପରେ ସ୍ଥଗିତାଦେଶ ପାଇଁ କେନ୍ଦ୍ର କରିଥିବା ଆବେଦନର ଶୁଣାଣି ପାଇଁ ମନା କରିଥିଲେ ସୁପ୍ରିମକୋର୍ଟ । ଏହାସହ କୋର୍ଟ କହିଥିଲେ, ଯଦି ଦୋଷୀଙ୍କର କୌଣସି ଆଇନଗତ ପ୍ରକ୍ରିୟା ବାକି ନାହିଁ ତେବେ ନୂଆ ଡେଥ୍ ୱାରେଣ୍ଟ ପାଇଁ ତଳ କୋର୍ଟକୁ ଯାଅ ।