‘ଟାଇଗର ଜିନ୍ଦା ହୈ’: ଏନଡିଏ ସରକାରର ଶପଥ ଗ୍ରହଣ ପୂର୍ବରୁ ପାଟନାରେ ଲାଗିଲା ନୀତିଶଙ୍କ ପୋଷ୍ଟର
ପାଟନା: ୨୦୨୪ ଲୋକସଭା ନିର୍ବାଚନରେ ଏନଡିଏର ବିଜୟ ପରେ ବିହାର ମୁଖ୍ୟମନ୍ତ୍ରୀ ନୀତିଶ କୁମାରଙ୍କ ସ୍ଥିତି ଆହୁରି ମଜଭୁତ୍ ହୋଇଛି । ଦଳୀୟ କର୍ମୀଙ୍କ ମଧ୍ୟରେ ମଧ୍ୟ ପୂର୍ଣ୍ଣ ଉତ୍ସାହ ରହିଛି । ଏହି ସମୟରେ ପାଟନାରେ ନୀତିଶ କୁମାରଙ୍କ ଏକ ଆକର୍ଷଣୀୟ ପୋଷ୍ଟର ଲଗାଯାଇଥିବା ଦେଖିବାକୁ ମିଳିଛି ।
ପାଟନାରେ ଲଗାଯାଇଥିବା ନୀତିଶ କୁମାରଙ୍କ ଏହି ପୋଷ୍ଟରକୁ ନେଇ ଏବେ ଚର୍ଚ୍ଚା ହେଉଛି । ପାଟନାର କୋତୱାଲି ପୋଲିସ ଷ୍ଟେଶନ ନିକଟରେ ଏହି ପୋଷ୍ଟର ଲଗାଯାଇଛି । ଯେଉଁଥିରେ ନୀତିଶ କୁମାରଙ୍କ ଫଟୋ ଦୁଇଟି ବାଘ ମଧ୍ୟରେ ରଖାଯାଇଛି । ଏହା ସହ ପୋଷ୍ଟରରେ ଲେଖାଯାଇଛି – ଟାଇଗର ଜିନ୍ଦା ହୈ । ପୋଷ୍ଟରରେ ଆଉ ଜଣେ ବ୍ୟକ୍ତିଙ୍କର ଫଟୋ ଲଗାଯାଇଥିବା ଦେଖିବାକୁ ମିଳିଛି । ବ୍ୟକ୍ତିଙ୍କ ନାମ ସୋନା ସିଂ ବୋଲି ଲେଖାଯାଇଛି ।
କହିରଖୁଛୁ ଯେ, ଏହା ହେଉଛି ସମାନ ସ୍ଥାନ ଯେଉଁଠାରେ କିଛି ଦିନ ପୂର୍ବରୁ ଡବଲ୍ ଇଞ୍ଜିନ ସରକାରଙ୍କ ଏକ ପୋଷ୍ଟର ଲଗାଯାଇଥିଲା, ଯେଉଁଥିରେ ଉଭୟ ନୀତିଶ କୁମାର ଏବଂ ପିଏମ ମୋଦିଙ୍କ ଫଟୋ ରହିଥିଲା । ତେବେ ଏହି ପ୍ରଶ୍ନ ଉଠୁଛି ଏହି ପୋଷ୍ଟର ଲଗାଯାଇ କଣ ବାର୍ତ୍ତା ଦେବାକୁ ଚାହୁଁଛନ୍ତି ।
ତେବେ ଲୋକସଭା ନିର୍ବାଚନରେ ଜେଡିୟୁ ୧୬ଟି ଆସନ ଏବଂ ବିଜେପି ୧୭ ଟି ଆସନରେ ପ୍ରତିଦ୍ୱନ୍ଦ୍ୱିତା କରିଥିଲେ । ଏହି ଲୋକସଭା ନିର୍ବାଚନରେ ଉଭୟ ବିଜେପି ଏବଂ ଜେଡିୟୁ ଦଳ ୧୨-୧୨ ଟି ଆସନ ପାଇଛନ୍ତି । ମୋଟାମୋଟି ଭାବେ କହିବାକୁ ଗଲେ ବିଜେପି ସର୍ବାଧିକ କ୍ଷତି ସହିଛି ।
ଏନଡିଏର ସବୁଠାରୁ ବଡ ଦଳ ହେଉଛି ବିଜେପି । ଏହା ପରେ ଟିଡିପି ଏବଂ ଜେଡିୟୁ ଅଟନ୍ତି । ଏଭଳି ପରିସ୍ଥିତିରେ ଆଲୋଚନା ହେଉଛି ଯେ ଏହି ଦୁଇ ନେତା ଯଦି ଏନଡିଏ ଛାଡିଦିଅନ୍ତି । ତେବେ ବିଜେପି କୁ ସରକାର ଗଠନ କରିବା କଷ୍ଟକର ହୋଇପଡିବ ।