ନୂଆଦିଲ୍ଲୀ: ଭାରତୀୟ କ୍ରିକେଟ୍ ଦଳର ଦ୍ରୁତ ବୋଲର ମହମ୍ମଦ ଶାମି ତାଙ୍କ ଝିଅ ଆୟରାଙ୍କ ସହ ତାଙ୍କ ସମ୍ପର୍କ ବିଷୟରେ ଖୋଲାଖୋଲି ଭାବେ କହିଛନ୍ତି । ମହମ୍ମଦ ଶାମିଙ୍କ ଝିଅ ହସିନ ଜାହାନଙ୍କ ସହ ରୁହନ୍ତି । ମହମ୍ମଦ ଶାମି ନିକଟରେ ଏକ ବାର୍ତ୍ତାଳାପ ସମୟରେ ପ୍ରକାଶ କରିଛନ୍ତି ଯେ, ସେ ତାଙ୍କ ଝିଅ ଆୟରାଙ୍କୁ ବହୁତ ମିସ୍ କରନ୍ତି ଏବଂ ବେଳେ ବେଳେ ତାଙ୍କ ସହ କଥାବାର୍ତ୍ତା କରନ୍ତି | କ୍ରିକେଟର ପ୍ରକାଶ କରିଛନ୍ତି ଯେ, ହାସିନ ଜାହାନ ଆୟାରଙ୍କୁ ତାଙ୍କ ସହ ସବୁବେଳେ କଥାବାର୍ତ୍ତା ହେବାକୁ ଦିଅନ୍ତି ନାହିଁ ଏବଂ ଏହା ମଧ୍ୟ କହିଛନ୍ତି ଯେ, ତାଙ୍କର ଏବଂ ତାଙ୍କ ପତ୍ନୀଙ୍କର ପରସ୍ପର ସହ କଥାବାର୍ତ୍ତା ନ ଥିବାରୁ ସେ ଆୟରାଙ୍କୁ ବ୍ୟକ୍ତିଗତ ଭାବରେ ତାଙ୍କ ସହ ଭେଟିବାର ସୁଯୋଗ ଦିଅନ୍ତି ନାହିଁ ।
ସୂଚନାଯୋଗ୍ୟ ଯେ, ଶାମି ୨୦୧୪ରେ ହାସିନ ଜାହାନଙ୍କୁ ବିବାହ କରିଥିବାବେଳେ ଆୟାର ୨୦୧୫ରେ ଜନ୍ମ ହୋଇଥିଲେ । ମହମ୍ମଦ ଶାମି କହିଛନ୍ତି ଯେ, “କିଏ ବା ନ ଚାହିଁବ, ମୋତେ ଏପରି ଜଣେ ବ୍ୟକ୍ତିଙ୍କ ବିଷୟରେ କୁହ, ଯିଏ ନିଜର ପିଲା ଏବଂ ପରିବାରକୁ ମିସ୍ କରୁନଥିବେ । ହଁ, ଏଇଟା ଅଲଗା କଥା ଯେ ପରସ୍ଥିତି ସମସ୍ତଙ୍କର ଅଲଗା ଅଲଗା ଥାଏ । କିନ୍ତୁ ଯେଉଁଠି ପରସ୍ପରକୁ ମନେ ପକେଇବା କଥା ତ ମୋ ମତରେ ଏପରି କେହି ନାହାନ୍ତି ଯିଏ ତାଙ୍କ ରକ୍ତ ସମ୍ପର୍କୀୟଙ୍କୁ ମନେ ପକାଉନଥିବେ । ଆଉ ଇଏ ତ ମୋ ଝିଅ । ”
ସୂଚନାଯୋଗ୍ୟ ଯେ, ମହମ୍ମଦ ଶାମି ODI ବିଶ୍ୱକପ ପରଠାରୁ ଖେଳରୁ ଦୂରରେ ଅଛନ୍ତି। ସେ ପ୍ରଥମେ ଅଷ୍ଟ୍ରେଲିଆ ବିପକ୍ଷରେ ଏବଂ ପରେ ଦକ୍ଷିଣ ଆଫ୍ରିକା ବିପକ୍ଷ ସିରିଜରୁ ବଞ୍ଚିତ ହୋଇଥିଲେ। ଏହା ବ୍ୟତୀତ ଆଫଗାନିସ୍ତାନ ବିପକ୍ଷ ଟି -୨୦ ସିରିଜରେ ତାଙ୍କୁ ମଧ୍ୟ ଦେଖିବାକୁ ମିଳି ନଥିଲା। କେବଳ ଏତିକି ନୁହେଁ ଇଂଲଣ୍ଡ ବିପକ୍ଷ ପାଞ୍ଚ ଟେଷ୍ଟ ସିରିଜର ପ୍ରଥମ ଦୁଇଟି ମ୍ୟାଚରୁ ମହମ୍ମଦ ଶାମି ମଧ୍ୟ ବାହାରେ ରହିଛନ୍ତି। ଏହା ବ୍ୟତୀତ ସିରିଜର ଅବଶିଷ୍ଟ ତିନୋଟି ମ୍ୟାଚ୍ ପାଇଁ ତାଙ୍କର ଉପଲବ୍ଧତା ଉପରେ ସନ୍ଦେହ ରହିଛି।