ନୂଆଦିଲ୍ଲୀ: ପ୍ରଖ୍ୟାତ ଉର୍ଦ୍ଦୁ କବି ମୁନୱର ରାଣାଙ୍କର ଶନିବାର ୯୩ ବର୍ଷ ବୟସରେ ପରଲୋକ ହୋଇଯାଇଛି। ମୁନୱର ରାଣା ଦୀର୍ଘ ଦିନ ଧରି ରୋଗରେ ପୀଡ଼ିତ ଥିଲେ। ଲକ୍ଷ୍ନୌର ଏସଜିପିଜିଆଇରେ ସେ ଶେଷ ନିଶ୍ୱାସ ତ୍ୟାଗ କରିଛନ୍ତି। କବି ମୁନୱର ରାଣାଙ୍କ ସ୍ୱାସ୍ଥ୍ୟାବସ୍ଥା ଖରାପ ହେବାରୁ ତାଙ୍କୁ ଲକ୍ଷ୍ନୌସ୍ଥିତ ସଞ୍ଜୟ ଗାନ୍ଧୀ ମେଡିକାଲ କଲେଜ ଏବଂ ହସ୍ପିଟାଲରେ ଭର୍ତ୍ତି କରାଯାଇଥିଲା।
ଏହା ପୂର୍ବରୁ ତାଙ୍କୁ ଲକ୍ଷ୍ନୌର ମେଦାନ୍ତ ହସ୍ପିଟାଲରେ ଦୁଇ ଦିନ ପାଇଁ ଭର୍ତ୍ତି କରାଯାଇଥିଲା। ମୁନୱର ରାଣା ଦୀର୍ଘ ଦିନ ଧରି କିଡନୀ ଖରାପ ରୋଗରେ ପୀଡ଼ିତ ଥିଲେ ଏବଂ ସପ୍ତାହକୁ ୩ ଥର ଡାଏଲିସିସ୍ ମଧ୍ୟ କରୁଥିଲେ । ତାଙ୍କର କ୍ରନିକ କିଡନୀ ରୋଗ ଥିଲା, ଯେଉଁ କାରଣରୁ ସେ ଦୀର୍ଘ ଦିନ ଧରି ସାର୍ବଜନୀନ କାର୍ଯ୍ୟକ୍ରମରେ ଯୋଗ ଦେଇ ପାରିନଥିଲେ ।
ନିକଟରେ ସେ ଛାତିରେ ଯନ୍ତ୍ରଣା ଅନୁଭବ କରିବାରୁ ତାଙ୍କୁ ଡାକ୍ତରଙ୍କ ପାଖକୁ ନିଆଯାଇଥିଲା। ସେ ନିମୋନିଆରେ ପୀଡ଼ିତ ଥିବାରୁ ନିଶ୍ୱାସ ନେବାରେ ଅସୁବିଧା ହେଉଥିଲା। ମୁନୱର ରାଣା ହସ୍ପିଟାଲରେ ଅକ୍ସିଜେନ୍ ସପୋର୍ଟରେ ଥିଲେ। ମୁନୱର ରାଣା ଦେଶର ଜଣାଶୁଣା କବିମାନଙ୍କ ମଧ୍ୟରେ ପରିଗଣିତ । ତାଙ୍କୁ ସାହିତ୍ୟ ଏକାଡେମୀ ପୁରସ୍କାରରେ ମଧ୍ୟ ସମ୍ମାନିତ କରାଯାଇଛି । ଏହା ବ୍ୟତୀତ ତାଙ୍କୁ ମାଟି ରତନ ପୁରସ୍କାରରେ ମଧ୍ୟ ସମ୍ମାନିତ କରାଯାଇଛି ।
ରାଣା ସାହେବ ହୃଦ ରୋଗ ଓ ଅନ୍ୟାନ୍ୟ ରୋଗରେ ପୀଡ଼ିତ ହୋଇ ଦୀର୍ଘ ଦିନ ଧରି ଡାକ୍ତରଖାନାରେ ଭର୍ତ୍ତି ହୋଇଥିଲେ। ଉର୍ଦ୍ଦୁ କବିତା ଦୁନିଆରେ ତାଙ୍କର ଅନେକ ନାମ ରହିଛି। ୨୦୧୪ମସିହାରେ ତାଙ୍କୁ ସାହିତ୍ୟ ଏକାଡେମୀ ପୁରସ୍କାର ମଧ୍ୟ ମିଳିଥିଲା । ଶାହଦାବା କବିତା ପାଇଁ ତାଙ୍କୁ ଏହି ପୁରସ୍କାର ପ୍ରଦାନ କରାଯାଇଥିଲା। ଏହାବ୍ୟତୀତ ମା’ଙ୍କ ଉପରେ କବିତା ପାଇଁ ମୁନୱରଙ୍କୁ ସାରା ବିଶ୍ୱରେ ଖ୍ୟାତି ମିଳିଥିଲା । ଦେଶ ବିଦେଶର ଅନେକ ବଡ଼ ବଡ଼ ମଞ୍ଚରେ ମୁନୱର ରାଣା ଏକ ବଡ ନାମ। ଖାଲି ସେତିକି ନୁହେଁ ବଲିଉଡର ଶହେନଶାହ ଅମିତାଭ ବଚ୍ଚନ ମଧ୍ୟ ତାଙ୍କର ଜଣେ ପ୍ରଶଂସକ।